Nerhemiya 6:1-19
6 Nje-ke ngemva kobana uSanibhalathi,+ uThobiya, uGetjhemu umArabhu+ nawo woke amanabethu batjelwe bona ngakhe kabutjha iboda+ begodu azisekho iinkhala kilo (ngitjho nanyana bengingakafaki iimvalo emasangweni bekube sikhatheso),+
2 msinyana uSanibhalathi noGetjhemu bathumela umlayezo lo kimi: “Yewize, asihlele isikhathi sokuhlangana kwenye yeendawo zemRhobeni oThabaleleko we-Ono.”+ Kodwana bebaluka amano wokungilimaza.
3 Nje-ke ngathumela iinthunywa kibo, ngathi: “Ngimajadu ngomsebenzi omkhulu, angekhe ngakghona ukwehlela kini. Kubayini kufuze ngijamise umsebenzi ngize kini?”
4 Bangithumela umlayezo ofanako amahlandla amane, nami ngasolo ngibanikela ipendulo efanako.
5 Nje-ke uSanibhalathi wathumela isisebenzi sakhe kimi ngomlayezo ofanako ihlandla lesihlanu, siphethe nencwadi evuliweko ngesandla.
6 Beyithi: “Kunekulumo erhatjhekileko hlangana neentjhaba, noGetjhemu+ uyayifakazela, bona wena namaJuda nihlela ukuvukela.+ Kungebangelo nakha iboda; begodu ngokuya ngemibiko le wena uzokuba yikosawo.
7 Ubeke nabaphorofidi bona bamemezele ngawe eJerusalema yoke, bathi, ‘Kunekosi kwaJuda!’ Nje-ke zoke izintwezi zizokubikelwa ikosi. Yewize khesidembe indaba le.”
8 Nokho ngamphendula ngathi: “Zoke izinto okhuluma ngazo azikenzeki; uyazithomela.”
9 Ngombana boke bebalinga ukusithusa, bathi: “Izandla zabo zizokubogaboga emsebenzinabo, angekhe bawuqede.”+ Kodwana ngathandaza ngathi, “Zimu, qinisa izandla zami.”+
10 Nje-ke ngaya endlini kaTjhemaya indodana kaDelaya indodana kaMehethabheli njengombana bekazivalele lapho. Wathi: “Asihlele isikhathi sokuhlangana endlini kaZimu weqiniso, ngaphakathi kwethempeli, sivale iminyango yethempeli, ngombana bayeza bazokubulala. Bayeza bazokubulala ebusuku.”
11 Ngathi kuye: “Kghani indoda enjengami kufuze ibaleke? Ucabanga ukuthi indoda enjengami ingangena ethempelini ingafi?+ Angekhe ngingene!”
12 Ngabona lapho ukuthi akakathunyelwa nguZimu, kodwana uqatjhwe nguThobiya noSanibhalathi+ bona atjho isiphorofidwesi malungana nami.
13 Bekaqatjhelwe bona angithusele bekangenze ngone, khona bazokuba namabanga wokungona igama bona bangihlambalaze.
14 Zimami, ungazikhohlwa zoke izinto uThobiya+ noSanibhalathi abazenzileko, ungamkhohlwa noNowadiya umphorofidikazi nabo boke abaphorofidi ebebasolo balinga ukungithusela.
15 Nje-ke iboda laqedwa ngelanga lama-25 lenyanga ka-Elulu,* ngamalanga ama-52.
16 Msinyana ngemva kobana woke amanabethu ezwe lokhu nazo zoke iintjhaba ezisibhodileko nazibona lokhu, zaphathwa ziinhloni khulu,+ zalemuka bona umsebenzi lo wenziwe ngesizo lakaZimethu.
17 Emihleni leyo iinkhulu+ zakwaJuda bezithumela iincwadi ezinengi kuThobiya, begodu uThobiya bekaziphendula.
18 Abanengi kwaJuda benza isifungo sokuba sehlangothini lakhe, ngombana bekamkhwenyana kaTjhekaniya indodana ka-Ararhi,+ begodu indodanakhe uJehorhanani beyithethe indodakazi kaMetjhulamu+ indodana kaBherekiya.
19 Bebahlala bangitjela izinto ezihle ngaye begodu bambikele ukuthi ngitheni. Nje-ke bekathumela iincwadi zokungithusela.+
Imitlolo Ephasi
^ Qala Isith. B15.
