Kunini begodu kubayini lokha umfazi omKrestu kufuze athwale ehloko malungana nekonzo yakhe? Akhe sicabangele amezwi wompostoli uPowula aphefumulelweko ngendaba le. Wanikela isinqophiso esisitlhogako bona senze iinqunto ezilungileko, ezidumisa uZimu. (1 KwebeKorinte 11:3-16) UPowula uveza amaphuzu amathathu okufuze acatjangelwe: (1) iimberego efuna bona umfazi athwale, (2) ubujamo okufuze athwale kibo, begodu (3) nonobangela wokobana athwale ehloko.

Iimberego. UPowula wakhuluma ngeembili: umthandazo nokuporofida. (Indima 4, 5) Ukuthandaza kukukhulekela ngokukhuluma noJehova. Namhlanjesi, ukuporofida kubandakanya nanyana ngiyiphi ifundo esekelwe eBhayibhilini isikhonzi esimKrestu esiyenzako. UPowula gade atjho bona umfazi kufuze athwale ehloko nanyana kunini nathandazako namtjhana afundisa iqiniso leBhayibhili? Awa. Ubujamo umfazi athandaza namtjhana afundisa kibo ngibo obutjhoko bona kufuze athwale nofana awa.

Ubujamo. Amezwi kaPowula akhuluma ngobubili—ekhaya nebandleni. Wathi: ‘Ihloko yowesifazana yindoda . . . Wesifazana othandazako kumbe aporofide angakathwali ehloko, uhlazisa indoda yakhe eyihloko yakhe.’ (Indima 3, 5) Elungiselelweni  lomndeni, indoda yomfazi ngiyo uJehova ayikhethe bona ibe yihloko yakhe. Ngaphandle kobana atjheja igunya lendodakhe, uzabe uhlazisa indodakhe nengabe uthwala iimthwalo uJehova ayabele yona. Isibonelo, nengabe kuyatlhogeka bona arage isifundo seBhayibhili indodakhe ikhona, uzokuhlonipha igunya layo ngokuthwala. Uzokwenza njalo kungakhathaliseki bona ibhabhadisiwe nofana awa, njengombana iyihloko yomndeni. * Nengabe kufuze athandaze namtjhana afundise kukhona indodanakhe encani ebhabhadisiweko, kufuze ngokufanako athwale ehloko, ingasi ngombana iyihloko yomndeni, kodwana ngebanga legunya abazalwana ababhabhadisiweko abamalungu webandla lobuKrestu abanikelwe lona.

UPowula waveza ubujamo bebandla, wathi: “Nengabe ukhona ophika ikani ngalokhu, engikutjhoko kukobana thina namabandla kaZimu asinalo elinye isiko ekonzweni.” (Indima 16) Ebandleni lobuKrestu, ubuhloko bunikelwe abazalwana ababhabhadisiweko. (1 KuThimothi 2:11-14; KumaHebheru 13:17) Bazalwana kwaphela abakhethwa njengabadala neenceku ezikhonzako ngesibopho abasinikelwe nguZimu sokobana batlhogomele umhlambi Wakhe. (IZenzo 20:28) Nokho, ngezinye iinkathi, ubujamo bungenza kufuneke bona umfazi omKrestu aphathe umberego ngokuvamileko owenziwa mzalwana obhabhadisiweko ofanelekako. Isibonelo, kungatlhogeka bona arage umhlangano wekonzo yesimini ngombana angekho umzalwana obhabhadisiweko ofanelekako. Nofana angaraga isifundo seBhayibhili sekhaya esihleliweko kukhona umzalwana obhabhadisiweko. Ngombana iimberego enjalo iyingcenye yebandla lobuKrestu, uzokuthwala ehloko ukutjengisa bona uyatjheja bonyana wenza umberego ngokuvamileko owabelwa abazalwana.

Ngakelinye ihlangothi, iindlela ezinengi zokukhulekela azitlhogi bona udade athwale ehloko. Isibonelo, akutlhogeki bona athwale nekaphendulako emhlanganweni yobuKrestu, nekasekonzweni yomuzi nomuzi nendodakhe namtjhana omunye  umzalwana obhabhadisiweko, nakafunda nofana nathandaza nabantwabakhe abangakabhabhadiswa. Liqiniso, kungavela neminye iimbuzo, nengabe udade akaqiniseki ngendaba leyo, angenza irhubhululo elingeziweko. * Godu nengabe akaqiniseki begodu isazela sakhe simenza bona enze njalo, ukuthwala ngeze kube kumbi, njengombana kutjengiswe esithombeni.

Unobangela. Endimeni-10, sifumana iinzathu eembili ezenza umfazi omKrestu afune ukuthwala ehloko: “Ngebanga leengilozi wesifazana kufanele bona athwale ehloko yakhe, ze akhombise bona ungaphasi komthetho wendoda yakhe.” Kokuthoma, tjheja amezwi athi, “ze akhombise bona ungaphasi komthetho.” Ukuthwala ehloko kuyindlela umfazi atjengisa ngayo bona uyalitjheja igunya uJehova alinikele abazalwana ababhabhadisiweko ebandleni. Ngokwenza lokho, utjengisa ithando nokuthembeka kwakhe kuJehova uZimu. Ibanga lesibili lifumaneka emezwini athi “ngebanga leengilozi.” Umfazi uzithinta njani iimbunjwa zomoyezo ezinamandla ngokuthwala ehloko?

Iingilozi ziyakareka nezibona bona igunya laphezulu liyahlonitjhwa kiyo yoke ihlangano kaJehova, ezulwini nephasini. Godu ziyazuza neembonelweni zabantu abanesono endabeni le. Ngaphezu kwakho koke, nazo kufuze zithobeke elungiselelweni lakaJehova—isivivinyo esahlula ezinengi zazo esikhathini esidlulileko. (KaJuda 6) Nje, iingilozi zingabona umfazi omKrestu onelemuko elikhulu nelwazi elinengi, nohlakaniphe ukudlula umzalwana obhabhadisiweko ebandleni; kodwana azithobe ngokuzithandela egunyeni lakhe. Kobunye ubujamo, umfazi loyo mKrestu ozesiweko ozokuba ngomunye weendlalifa  ezizokuba noKrestu. Umfazi onjalo kamva uzokukhonza esikhundleni esiphakame ukudlula seengilozi begodu abuse noKrestu ezulwini. Qala bona sibonelo esihle kangangani iingilozi ezisibonako nje! Kwamambala, boke abodade banelungelo lokutjengisa ukulalela ngokuthembeka nokuziphatha ngokuthobeka emehlweni weengidi zeengilozi ezithembekileko.