1, 2. (a) Ngesakabani isinqophiso okufuze sisilalele? (b) Ngimiphi imibuzo esizokucoca ngayo esahlukwenesi?

USESEMNTWANA, ababelethi bakho bebavame ukukubawa bona wenze into ongathandi ukuyenza. Bewubathanda ababelethi bakho, begodu bewazi bona kufuze ubalalele. Kodwana kunesikhathi lapha bewungafuni ukubalalela khona.

² Siyazi ukuthi uJehova uBabethu uyasithanda. Uyasitlhogomela, aqiniseke bona usinikela yoke into esithabisako. Uyasinqophisa khona sizakuphumelela, bese akhethe nabantu abazasinikela iinqophiswezo. Ngikho nje kufuze siyihloniphe indlela kaJehova yokusilawula. (IzAga 24:21) Kodwana kubayini kubudisi kangaka ukulalela isinqophiso sakhe? Kubayini uJehova athi sisilalele? Nokuthi sibonakala njani bona siyayihlonipha indlelakhe yokusilawula?—Qala isiPhetho 9.

3, 4. Kuze njani bona abantu babe nesono? Kubayini kubudisi ngathi ukulalela isinqophiso esivela kwabanye?

³ Abantu banomukghwa wokungafuni ukulawulwa.  Lokho kwathoma ngokona kwabantu bokuthoma u-Adamu no-Eva. Ngitjho nanyana badalwa banganasono khenge bavume ukulawulwa nguZimu. Solo kwamhlokho, boke abantu babelethwa banesono. Isonwesi ngiso-ke esenza kube budisi ukuvuma ukulawulwa nguJehova namkha babanye abantu. Esinye isizathu kukuthi kwabona laba uJehova athi basilawule nabo banesono.—Genesisi 2:15-17; 3:1-7; IRhubo 51:5; Roma 5:12.

⁴ Isono senza umuntu azikhakhazise. Ukuzikhakhazisa ngikho okungenza kube budisi ukuvuma ukulawulwa. Ngokwesibonelo, kwa-Israyeli, uJehova wakhetha uMosi bona abe mdosi phambili wabantu bakhe. UKhorarhi, obesele alotjhe uJehova iminyaka eminengi, wavumela ukuzikhakhazisa kwamenza wangasahloniphi uMosi. UMosi bekamdosi phambili wabantu bakaJehova, kodwana khenge azikhakhazise. Kunalokho, bekaziwa ayindoda ebeyinommoya ophasi ngesikhatheso. Kodwana uKhorarhi khenge amlalele. Wakwazi nokukhohlisa abantu abanengi bona nabo bangasalaleli isinqophiso sakaMosi. Kwenzekani kibo? Babulawa. (Numeri 12:3; 16:1-3; 31–35) IBhayibheli linabantu abanengi esingafunda kibo ukuthi ukuzikhakhazisa kuyingozi.—2 IinKronike 26:16-21; qala isiPhetho 10.

5. Abanye abantu balisebenzise njani ilungelo labo lokulawula abantu?

⁵ Abantu bathi “ilungelo lokulawula liyamtjhentjha umuntu.” Solo kwadalwa umuntu, abantu  abanengi balisebenzisa kumbi ilungelweli. (Funda uMtjhumayeli 8:9.) Ngokwesibonelo, uSawula bekathobekile, azilungele lokha uJehova nakamkhetha bona abe yiKosi yakwa-Israyeli. Kodwana umona nokuzikhakhazisa kwabolisa ihliziywakhe, lokho kwamenza watlhorisa uDavida onganacala. (1 Samyela 9:20, 21; 10:20-22; 18:7-11) Ngokukhamba kwesikhathi uDavida waba yikosi elunge ukuzidlula zoke kwa-Israyeli. Nakuya azalisebenzisa kumbi ilungelo lakhe lokuba yikosi. Walala noBhathi-Tjheba, umka-Uriya, walinga nokufihla isonwesi ngokulayela bona u-Uriya abulawe epini.—2 Samyela 11:1-17.

6, 7. (a) Ukuthanda kwethu uJehova kusihlohlozela bona senzeni? (b) Singasizwa yini bona silalele uZimu nanyana kubudisi?

⁶ Siyakuhlonipha ukulawulwa nguJehova ngombana siyamthanda. Ukuthanda kwethu uJehova kunanyana yini kusenza sifune ukumthabisa. (Funda IzAga 27:11; Markosi 12:29, 30.) Kusukela ngesikhathi u-Adamu no-Eva basahlala esimini ye-Edeni, uSathana bekasolo aphikisana nokulawulwa nguJehova. UDeveli ufuna sicabange ukuthi uJehova akanalo ilungelo lokusitjela bona senzeni. Kodwana siyazi bona mamala lawo. Sivumelana namezwi la: “Ufanele, Jehova Zimethu, ukwamukela iphazimulo, idumo namandla, ngombana wadala zoke izinto, begodu ngebanga lentando yakho zaba khona zadalwa.”—IsAmbulo 4:11.

 ⁷ Ngesikhathi usesemntwana, kungenzeka wafundiswa bona kufuze ulalele ababelethi bakho ngitjho nanyana ungafuni. Nakithi kunjalo, akusilula ukulalela uJehova njengombana siziinceku zakhe nje. Kodwana siyamthanda uJehova, siyamhlonipha, ngikho senza koke esingakwenza bona simlalele. Isibonelo sethu nguJesu. Walalela uJehova ngitjho nanyana kubudisi. Ngikho atjela uYise ukuthi: “Akungenzeki intandwami, kodwana akwenzeke yakho.”—Lukasi 22:42; qala isiPhetho 11.

8. Ziindlela bani uJehova asinqophisa ngazo? (Qala ibhoksi elithi “ Lalela Isiluleko.”)

⁸ Namhlanjesi uJehova usilawula ngeendlela ezinengi. Ngokwesibonelo, usebenzisa iBhayibheli, nabadala bebandla. Sihlonipha uJehova ngokuhlonipha labo abakhethe bona basinqophise. Ukwala isizo labo kukwala uJehova. Ngesikhathi ama-Israyeli ala uMosi, uJehova khenge ayeqisele amehlo indaba leyo. Kuye bekufana nokuthi bala yena.—Numeri 14:26, 27, qala isiPhetho 12.

9. Ithando lisenza njani bona silalele iinqophiso?

⁹ Nasivuma ukulawulwa, sisuka sitjengisa abanakwethu nabodadwethu bona siyabathanda. Akhucabange nganaku. Nakunehlekelele yemvelo, isiqhema sabahlanguli siyabambisana bona sisindise abantu abanengi ngendlela esingakghona ngayo. Kodwana nasizakuphumelela, elinye nelinye ilunga kufuze lilalele iinqophiso. Kungenzekani nakungaba nelunga elingalaleliko, lizenzele umathanda? Nanyana bekafuna ukusiza, ukungalaleli kwakhe  kungabanga imiraro esiqhemeni, bekulimaze nabanye abantu. Nathi nasingahlala singalaleli labo uJehova abakhethe bona basinqophise kungalimaza abanye abantu. Kodwana nasilalela uJehova sizokuthanda abanakwethu ngokuhlonipha indlela kaJehova yokusilawula.—1 Korinte 12:14, 25, 26.

10, 11. Sizokucoca ngani okwanje?

¹⁰ Koke uJehova asibawa bona sikwenze kusiza thina. Ukuvuma ukunqotjhiswa ziinkhulu zakarhulumende, babelethi ekhaya, nabadala ebandleni, kusiza thina.—Duteronomi 5:16; Roma 13:4; Efesu 6:2, 3; Hebheru 13:17.

¹¹ Nasingazwisisa kuhle bona kubayini kufuze sihloniphe abanye kungasisiza. Akhe sinabe khudlwana sicoce ngeendawo ezintathu lapha kufuze sihloniphe khona abasiphetheko.

12. Indoda ingatjengisa njani bona iyayihlonipha indlela kaJehova yokulawula?

¹² UJehova wadala umndeni, wabela ilunga elinye nelinye indima okufuze liyidlale. Ilunga ngalinye nalingazwisisa kuhle lokho uJehova athi likwenze, umndeni ungathaba usizeke. (1 Korinte 14:33) UJehova ukhethe indoda bona ibe yihloko yomndeni. Ulindele bona indoda itlhogomele umamakwayo nabantwana, ibanqophise ngethando. Yeke indoda izoziphendulela kuJehova ngendlela ebatlhogomela ngayo. Indoda emKrestu kufuze ibe nomusa  nethando, iphathe umndenayo ngendlela uJesu aphatha ngayo ibandla. Nayenza njalo itjengisa bona iyamhlonipha uJehova.—Efesu 5:23; qala isiPhetho 13.

13. Umfazi angatjengisa njani bona uyayihlonipha indlela kaJehova yokulawula?

¹³ Umfazi omKrestu naye unendima ehloniphekileko ayidlalako. Usekela ubabakwakhe osebenza budisi bona abe yihloko ehle yomndenakhe. Bobabili, kufuze babandule abantwababo. Umma ubafundisa ihlonipho ngokuthi yena ababekele isibonelo. (IzAga 1:8) Uyayihlonipha indodakwakhe begodu abambisane nayo eenquntweni ezithetheko. Ngitjho nanyana angekhe avumelane nayo kizo zoke izinto, uwaveza ngehlonipho amazizwakhe. Nangabe umma omKrestu utjhade nendoda engakholwako, uba sebujamweni obuhlukileko. Nalapho kusafuze ayihloniphe. Kungenzeka ngelinye ilanga ubabakwakhe afune ukwazi ngoJehova bekamlotjhe.—Funda 1 Pitrosi 3:1.

14. Abantwana bangatjengisa njani bona bayayihlonipha indlela kaJehova yokulawula?

¹⁴ Abantwana baligugu kuJehova, begodu kufuze bavikelwe bebabandulwe. Yeke abantwana nabalalelako, ababelethi babo bayathaba. Okuqakatheke khulu, nabalalelako basuke bahlonipha uJehova bathabise ihliziywakhe. (IzAga 10:1) Emindenini eminengi abantwana bakhuliswa mbelethi munye kwaphela. Lokho kungaba budisi ebantwaneni nembelethini. Kodwana abantwana nabalalelako, basekela uyise namkha unina, kuba mnandi emndenini.  Awukho umndeni ongatjhaphiko. Kodwana boke nabangalalela isinqophiso sakaJehova bangathaba. Lokho kuphazimulisa uJehova, uMdali wemindeni yoke.—Efesu 3:14, 15.

15. Singatjengisa njani bona sihlonipha indlela kaJehova yokulawula ibandla?

¹⁵ UJehova usinqophisa ngebandla lobuKrestu, begodu unikele uJesu ilungelo lokulawula ibandla. (Kolose 1:13) Bese uJesu wabela “inceku ethembekileko nehlakaniphileko” bona itlhogomele abantu bakaZimu ephasini. (Matewu 24:45-47) Namhlanjesi “inceku ethembekileko nehlakaniphileko” siHlopha esiBusako. Sisinikela esikutlhogako ngesikhathi esifaneleko bona siqinise ukukholwa kwethu. Abadala, iinceku ezisizako, kunye nababonisi besigodi bathola iinqophiso esiHlopheni esiBusako bese basekela amabandla. Boke kufuze basitlhogomele. Baphendula kuJehova ngendlela abasitlhogomela ngayo. Nasihlonipha amadoda la, sihlonipha uJehova.—Funda 1 Thesalonika 5:12; Hebheru 13:17; qala isiPhetho 14.

16. Kutjhiwo ngaliphi nakuthiwa abadala neenceku ezisizako zikhethwa mmoya ocwengileko?

¹⁶ Abadala neenceku ezisizako zisiza ibandla bona lihlale lithembekile linobunye. Iye, babantu abangakapheleli njengathi. Bakhethwa njani? Bakhethwa ngokwalokho okutlolwe eBhayibhelini. (1 Thimothi 3:1-7, 12; Titosi 1:5-9) UJehova wasebenzisa ummoya ocwengileko ukusiza abatloli beBhayibheli bahlathulule bona amadoda la kufuze  abe babantu abanjani. Nabadala bebandla babawa ummoya kaJehova ubasize bakhethe umzalwana ozokuba mdala namkha inceku esizako. Kuliqiniso, amabandla anqotjhiswa nguJesu noJehova. (IzEnzo 20:28) Yeke, amadoda akhethwe bona asitlhogomele asisipho esivela kuZimu.—Efesu 4:8.

17. Khuyini okufuze yenziwe ngudade etjengisa ihlonipho?

¹⁷ Kwesinye isikhathi kungenzeka bangabi khona abadala neenceku ezisizako bona benze umsebenzi othileko ebandleni. Abanakwethu ababhajadisiweko bangasiza. Nabangekho, abodade bangayenza imisebenzi eyenziwa banakwethu ababhajadisiweko. Nakunjalo-ke, kufuze athwale ehloko, afake ingwani namkha isikhafu. (1 Korinte 11:3-10) Nakenza njalo utjengisa bona uyayihlonipha indlela kaJehova yokulawula, ekhaya nebandleni.—Qala isiPhetho 15.

18, 19. (a) Sifundani encwadini yebeRoma 13:1-7? (b) Sizihlonipha njani iinkhulu zakarhulumende?

¹⁸ Namhlanjesi uJehova uvumele aborhulumende bona basilawule, ngikho nje kufuze sibahloniphe. Bahlela iinarha nemiphakathi bona izinto zikhambe kuhle, babenzele nezinto ezitlhogekako. AmaKrestu wona kufuze alalele okutlolwe kwebeRoma 13:1-7. (Ufunde.) Sihlonipha ‘iimphathimandla eziphakemeko,’ silalele nemithetho yenarha namkha yomphakathi esihlala kiwo. Imithetho le ithinta imindenethu, ezamabubulo nezinto esinazo. Ngokwesibonelo, kufuze sibhadele umthelo, sibanikele nemininingwana abayifunako. Alo, senzani  nangabe urhulumende ufuna senze izinto ezingakhambisani nemithetho kaZimu? Umpostoli uPowula wathi: “Kufuze silalele uZimu njengombusi kunabantu.”—IzEnzo 5:28, 29.

¹⁹ Nasikhuluma neenkhulu zakarhulumende, njengamajaji namkha amapholisa kufuze siwahloniphe. AmaKrestu amatjha kufuze ahloniphe abotitjhere nabanye abasebenza esikolweni. Emsebenzini kufuze sihloniphe abaqatjhi bethu nanyana abanye abasebenzi bangabahloniphi. Nasenza nje silingisa umpostoli uPowula, owahlonipha iimphathimandla nanyana bekubudisi. (IzEnzo 26:2, 25) Ngitjho nanyana abanye basiphatha kumbi, ihlonipho yona asiyilahli.—Funda amaRoma 12:17, 18; 1 Pitrosi 3:15.

20, 21. Nasihlonipha abanye kungenzekani ehle?

²⁰ Ephasini loke, abantu abadeleli babuya nakusako. Kodwana abantu bakaJehova bayahlonipha. Lokho kumgomethu. Silandela okutjhiwo nguPitrosi nakathi: “Hloniphani yoke imihlobo yabantu.” (1 Pitrosi 2:17) Nasihloniphako abantu bayakulemuka lokho. UJesu yena wathi: “Ukukhanya kwenu akukhanye kibo boke abantu, khona bazakubona imisebenzenu emihle, badumise uYihlo osezulwini.”—Matewu 5:16.

²¹ Nasihlonipha abasiphetheko emndenini, ebandleni nakezinye iindawo epilwenethu, singasiza abanye bafunde ngoJehova. Ukuhlonipha abanye kutjho ukuhlonipha uJehova. Kwenza uJehova athabe, kumtjengise nokuthi siyamthanda.