ISIFUNDO 06
Yathoma Njani Ipilo?
“Wena [Zimu] umthombo wokuphila.” (IRhubo 36:9.) Kghani uyakukholelwa lokho? Abanye abantu bacabanga ukuthi ukuphila kwase kwazivelela. Nangabe kunjalo, lokho kutjho ukuthi sibe khona ngengozi ephasina. Nangabe nguJehova uZimu owasidalako, kutjho ukuthi wasidalela into ekhona, akusinjalo? a Akhe sikhulume ngalokho iBhayibheli elikutjhoko ngokuthi ukuphila kwathoma njani nokuthi kubayini kuqakathekile lokho.
1. Izulu nephasi kwathoma njani?
IBhayibheli lithi: “Ekuthomeni uZimu wadala izulu nephasi.” (Genesisi 1:1) Abososayensi abanengi bayavumelana ukuthi izulu nephasi kunala kwathoma khona. UZimu wazidala njani izintwezi? Wasebenzisa ‘ummoyakhe,’ okumumoya ocwengileko ukwenza zoke izinto ezikhona ephasini nezulwini, kuhlanganise nemithala yeenkwekwezi namaplanethi.—Genesisi 1:2.
2. Kubayini uZimu adala iphasi?
UJehova ‘akhenge alidalele ilize, ulenze bona kuhlalwe kilo.’ (Isaya 45:18) Wenza iphasi bona sizigedle kilo besihlale unomphela. (Funda u-Isaya 40:28; 42:5.) Isayensi iveza ukuthi iphaseli lihlukile kunamanye amaplanethi. Ngiyo yodwa iplanethi le ekwazi ukumumatha ukuphila.
3. Abantu bahluke njani eenlwaneni?
Ngemva kobana abumbe iphasi, uJehova wenza ukuphila. Kokuthoma, wazalisa iphaseli ngeenlwana neentjalo. Ngemva kwalokho, “UZimu wadala umuntu wamenza wafana naye.” (Funda uGenesisi 1:27) Abantu bahluke njani? Njengombana senziwe ngomfanekiswakhe, siyakghona ukuba nobuntu obufana nebakaZimu, njengethando nobulungiswa. Wasenza saba nekghono lokufunda amalimi ahlukahlukeneko, sakghona ukuthabela ubukghwari nombhino. Ngokungafani neenlwana, thina siyakghona ukumlotjha uMdalethu.
FUNDA NGOKUNGENELELEKO
Akhesiqale ubufakazi obutjengisa ukuthi ukuphila kwadalwa nokuthi lokho okukhulunywa liBhayibheli kunengqondo. Akhesifumane ukuthi ubuntu obutjengiswa babantu busifundisani ngoZimu.
4. Ukuphila kwadalwa
Abantu bayabukwa ngemisebenzabo abayisusele endalweni. Kuhlekuhle ngubani ekufuze abukwe? dlala IVIDIYO, bese niphendula umbuzo olandelako.IVIDIYO: Kholelwa KuZimu (2:43)
-
Khuyini abantu abayisusele endalweni?
Enye nenye indlu itlanywe beyakhiwa mumuntu. Ngubani otlame bewadala indalo? Funda amaHebheru 3:4, bese nicoca ngemibuzo elandelako:
-
Khuyini oyithandako endalweni?
-
Kunengqondo na ukukholelwa ukuthi koke okusephasini nezulwini kwatlanywa? Kubayini utjho njalo?
Kghani bewazi?
Ungafumana iinhloko namavidiyo malungana nendaba le ku-jw.org ngaphasi kweenhloko ezimlandelande “Kghani Kwabunjwa?” nesithi “Imibono Yabantu Ngokuthi Ukuphila Kwavelaphi.”
“Kwamambala, enye nenye indlu yakhiwa ngothileko kodwana owakhe zoke izinto nguZimu”
5. Lokho okutjhiwo liBhayibheli ngendalo kuyazwisiseka
KuGenesisi isahluko 1, iBhayibheli likhuluma ngokuthoma kokuphila nephasi. Uyakukholelwa lokho namtjhana kuyinolwana? Dlala IVIDIYO, bese nicoca ngemibuzo elandelako.
-
Kghani iBhayibheli lifundisa ukuthi iphasi nokuphila okusephasini kwadalwa ngamalanga asithandathu anama-iri ama-24?
-
Kghani lokho okutjhiwo liBhayibheli malungana nokudalwa kwephasi kuyezwakala na? Sekela ipendulwakho
Funda uGenesisi 1:1, bese nicoca ngombuzo naku:
-
Abososayensi bathi izulu nephasi kunalapho kwathoma khona. Indlela abazwisisa ngayo le ikhambisana njani nalokho oqeda ukukufunda eBhayibhelini?
Abantu bayazibuza ukuthi kghani uZimu usebenzise ukuziphendukela kwemvelo bona adale ukuphila? Funda uGenesisi 1:21, 25, 27, bese nicoca ngemibuzo nasi:
-
Kghani iBhayibheli lifundisa ukuthi uZimu wadala into yinye, kwathi into leyo yatjhuguluka yaba yifesi, ziinlwana ezizala ezinye iinlwana kunye nabantu? Namkha wazidala zoke “ngokuhlukahluka kwazo?” b
6. Abantu bayindalo kaZimu ehlukileko kwenye
Asifani neenlwana uJehova azidalileko. Funda uGenesisi 1:26, bese nicoca ngombuzo olandelako:
-
Ngombana senziwe ngomfanekiso kaZimu, ukukghona kwethu ukuthanda nokuzwela, kutjho ukuthini ngobuntu bakaZimu?
ABANYE ABANTU BATHI: “Indaba eseBhayibhelini yokudalwa kwendalo iyinolwana.”
-
Wena ucabangani? Kubayini ucabanga njalo?
ISIRHUNYEZO
UJehova wadala izulu nephasi nakho koke okuphilako.
Buyekeza
-
Khuyini okufundiswa liBhayibheli malungana nokuthi lavelaphi izulu nephasi?
-
Kghani uZimu wadala into yinye, kwathi zoke zavela kiyo namkha wazidala zoke ngokuhlukahluka kwazo?
-
Abantu bahluke njani?
HLOLA OKUNGENZASI
Funda ngezinto ezisendalweni ezitjengisa ukuthi kunomtlami.
Funda ngokuthi ubaba angayihlathululela njani indodanakhe lokho okutjhiwo liBhayibheli ngendalo.
Yenza irhubhululo, ubone ukuthi ifundiso yokuziphendukela kwemvelo iyakhambisana na nalokho okufundiswa liBhayibheli.
“Kghani UZimu Wasebenzisa Ukuziphendukela Kwemvelo Bona Adale Yoke Imihlobo Yezinto Eziphilako?” (Isihloko esiku-jw.org)
a Esifundweni 25, sizokucoca ngomnqopho kaZimu ngabantu.
b EBhayibhelini, igama elithi, “ngokuhlukahluka kwazo” litjho koke okuphilako.
Okhunye Ongakuthabela
OKUBUZWAKO
Siyini Isifundo SeBhayibheli Esinikelwa BoFakazi BakaJehova?
Ehlelweneli lesifundo sasimahla esinikelwa boFakazi bakaJehova, ungasebenzisa nanyana ngiyiphi itjhugululo yeBhayibheli. Zizwe utjhaphulukile ukumema woke umndenakho nabangani bakho bona bahlanganyele nawe.
