ISIFUNDO 04
Ungubani UZimu?
Kusukela abantu baba khona ephasini, bebasolo balotjha abosingazimu. Nanyana kunjalo, iBhayibheli likhuluma ngoZimu munye, ‘omkhulu kunabo boke abanye abozimu.’ (2 IinKronike 2:5) Kghani ngubani loyo? Khuyini emenza abemkhulu kunabo boke abosingazimu abalotjhwa babantu? Esifundwenesi, uzokufunda ngendlela uZimu azethula ngayo kuwe.
1. Igama lakaZimu ngubani begodu singaqiniseka njani ukuthi ufuna silazi?
EBhayibhelini uZimu uyasazisa ukuthi ungubani. Uthi: “NginguJehova. Ngilelo igama lami.” (Funda u-Isaya 42:5, 8.) Igama elithi, “Jehova” liyihlathululo yelimi lesiHebheru elitjho ukuthi “Ubangela Bona Kube khona.” UJehova ufuna silazi igama lakhe. (Eksodusi 3:15) Singaqiniseka njani ngalokho? Ufake igama lakhe eBhayibhelini iinkhathi ezingaphezu kwezizii-7 000! a Igama elithi Jehova liqalisele ‘kuZimu weqiniso ezulwini nephasini.’—Duteronomi 4:39.
2. IBhayibheli lembulani ngoJehova?
IBhayibheli lithi hlangana nabo boke abozimu abalotjhwa babantu, uJehova nguye kwaphela uZimu weqiniso. Kubayini? Kuneenzathu ezinengi zalokho. UJehova unamandla amakhulu begodu yena yedwa “ungoPhezukoke ephasini loke.” (Funda IRhubo 83:18.) ‘UnguMninimandla Woke,’ okutjho bona unamandla wokwenza nanyana yini afuna ukuyenza. “Wadala zoke izinto” ephasini nezulwini. (IsAmbulo 4:8, 11) Ngokungafani nomunye umuntu, uJehova kade akhona begodu uzokuhlala akhona.—IRhubo 90:2.
FUNDA NGOKUNGENELELEKO
Hlolisisa umehluko okhona hlangana kweziqu zakaZimu negama lakhe lamambala. Bese ufunda ngokuthi kubayini aveze igama lakhe kuwe begodu uliveze njani.
3. UZimu uneziqu ezinengi kodwana unegama linye
Nawuzakubona umehluko hlangana kwegama lomuntu neziqu zakhe, dlala IVIDIYO, bese nicoca ngombuzo olandelako.
-
Uyini umehluko hlangana kwesiqu esithi, “Kosi,” negama?
IBhayibheli liyakuvuma ukuthi abantu balotjha abozimu abanengi namakhosi. Funda IRhubo 136:1-3, bese nicoca ngombuzo olandelako:
-
Ngubani “uZimu ophakeme ukudlula boke abanye abozimu” “neKosi yamakhosi”?
4. UJehova ufuna umazi begodu usebenzise igama lakhe
Khuyini etjengisa ukuthi uJehova ufuna usebenzise igama lakhe? Dlala IVIDIYO, bese niphendula imibuzo elandelako.
-
Ucabanga bona uJehova ufuna ukuthi igama lakhe laziwe? Kubayini?
UJehova ufuna abantu balisebenzise igama lakhe. Funda kwebeRoma 10:13, bese nicoca ngemibuzo elandelako:
-
Kuqakatheke kangangani ukusebenzisa igama lakaZimu elithi, Jehova?
-
Uzizwa njani lokha umuntu nakakhumbula igama lakho begodu akubize ngalo?
-
Ucabanga ukuthi uJehova uzizwa njani nakakuzwa usebenzisa igama lakhe?
5. UJehova ufuna utjhidele kuye
Umma we-Cambodia igama lakhe ngu-Soten uthi ukufunda ngegama lakaZimu kwamsiza “kwamlethela ithabo elinganakumadaniswa nalitho ephasini.” Dlala IVIDIYO, bese nicoca ngombuzo naku.
-
Evidiyweni le, ukwazi igama lakaZimu kumthinte njani u-Soten?
Ngaphambi kobana ube mngani womuntu, kufuze wazi igama lakhe qangi. Funda uJakopo 4:8a, bese nicoca ngemibuzo elandelako:
-
Khuyini uJehova akubawa ukuthi uyenze?
-
Ukwazi nokusebenzisa igama lakaZimu kungakusiza njani utjhidelane naye?
ABANYE ABANTU BATHI: “KunoZimu munye, yeke akunandaba ukuthi umbiza ngaliphi igama.”
-
Uyakholelwa ukuthi igama lakaZimu nguJehova?
-
Ungayihlathulula njani indaba yokuthi uZimu ufuna sisebenzise igama lakhe?
ISIRHUNYEZO
UJehova ligama lakaZimu weqiniso. Ufuna silazi begodu silisebenzise igamelo ukwenzela bona sitjhidelane naye.
Buyekeza
-
UJehova uhluke njani kwabanye abozimu abalotjhwa babantu?
-
Kubayini kufuze sisebenzise igama lakaZimu?
-
Khuyini etjengisa ukuthi uJehova ufuna utjhidele kuye?
HLOLA OKUNGENZASI
Hlolisisa iinzathu ezihlanu ezitjengisa bona uJehova ukhona.
“Kghani UZimu Ukhona?” (Isihloko esiku-jw.org)
Hlolisisa ukuthi kubayini ukukholelwa ukuthi uZimu ukhona kuyinto ezwakalako.
Funda ngokuthi kubayini kufuze sisebenzise igama lakaZimu ngitjho nanyana indlela ebelibizwa ngayo ekadeni ingaziwa.
“Ungubani UJehova?” (Isihloko esiku-jw.org)
a Bona ufumane imininingwana eyengeziweko malungana nehlathululo yegama lakaZimu nokuthi kubayini amanye amaBhayibheli angakalifaki, qala IsiThasiselo A4 eBhayibhelini ImiTlolo ECwengileko.
Okhunye Ongakuthabela
OKUBUZWAKO
Siyini Isifundo SeBhayibheli Esinikelwa BoFakazi BakaJehova?
Ehlelweneli lesifundo sasimahla esinikelwa boFakazi bakaJehova, ungasebenzisa nanyana ngiyiphi itjhugululo yeBhayibheli. Zizwe utjhaphulukile ukumema woke umndenakho nabangani bakho bona bahlanganyele nawe.
