ISIFUNDO 15
Ngubani UJesu?
UJesu ngomunye wabantu abadume khulu emlandweni. Nanyana kunjalo, ngaphandle kwegama lakhe, abantu abanengi abazi okunengi ngaye begodu banemibono ehlukahlukeneko ngokuthi uJesu ngubani. IBhayibheli lithini ngaye?
1. Ngubani uJesu?
UJesu uyingilozi enamandla ehlala ezulwini. Wabunjwa nguJehova uZimu ngaphambi kokuthi kubunjwe ezinye izinto. Kungebangelo abizwa ngokuthi ‘ulizibulo layo yoke indalo.’ (Kolose 1:15) IBhayibheli lithi uJesu ‘uyiNdodana ebelethwe yodwa’ ngombana nguye kwaphela owabunjwa nguJehova ngokunqophileko. (Jwanisi 3:16) UJesu wasebenza noYise uJehova, wamsiza ukudala zoke ezinye izinto. (Funda izAga 8:30.) UJesu usathabela ubuhlobo obutjhideleneko noJehova. Ngokuthembeka, usebenza njengomkhulumeli kaZimu, “unguliZwi,” udlulisela imilayezo neenqophiso zakaZimu.—Jwanisi 1:14.
2. Kubayini uJesu eza ephasini?
Pheze eminyakeni ezii-2 000 eyadlulako, ngekarisomraro uJehova wasebenzisa ummoyakhe ocwengileko ukudlulisela ukuphila kwakaJesu kusukela ezulwini kuya esibelethweni sentombi enguMariya. Ngendlela le, uJesu wabelethwa amumuntu. (Funda uLukasi 1:34, 35.) UJesu weza ephasini bona abe nguMesiya othenjisiweko namkha uKrestu nokuthi asindise abantu. a Zoke iimphorofido zeBhayibheli ezimalungana noMesiya zazaliseka kuye ukusiza abantu babone uJesu ‘njengoKrestu, iNdodana kaZimu ophilako.’—Matewu 16:16.
3. Ukuphi uJesu?
Ngemva kokuhlongakala kwakhe ephasini, uZimu wamvusa bona abe yingilozi bewabuyela ezulwini. Lapho “uZimu wamphakamisela esikhundleni esiphezulu.” (Filipi 2:9) Nje uJesu uyingilozi enamandla khulu, nguJehova kwaphela onamandla amakhulu ukudlula wakaJesu.
FUNDA NGOKUNGENELELEKO
Funda ngokungeziweko ukuthi uJesu ungubani nokuthikubayini ukufunda ngaye kuqakatheke khulu.
4. UJesu akasinguZimu uMninimandla Woke
Nanyana iBhayibheli lifundisa ukuthi uJesu uyingilozi enamandla ezulwini, ulalela uZimu uBabakhe uJehova. Kubayini sitjho njalo? Dlala IVIDIYO ukubona ukuthi iBhayibheli lithini ngendima uJesu ayidlalako nokuthi uhluke ngani kuZimu umninimandla woke.
Imitlolo elandelako isisiza sizwisise ubuhlobo uJesu anabo noJehova. Funda umtlolo ngamunye bese nicoce ngemibuzo elandelako.
Funda uLukasi 1:30-32.
-
Ingilozi ibuhlathulule njani ubuhlobo bakaJesu noJehova uZimu, ‘oPhezukoke’?
Funda uMatewu 3:16, 17.
-
UJesu nakabhajadiswako, lathini ilizwielivela ezulwini?
-
Ucabanga bona bekulilizwi lakabani?
Funda uJwanisi 14:28.
-
Ngubani omdala nonamandla amakhulu? Ngubaba namkha yindodana?
-
UJesu bekatjho ukuthini nakabiza uJehova ngoBabakhe?
Funda uJwanisi 12:49.
-
Inga-kghani uJesu ucabanga ukuthi banoBabakhe bamumuntu munye? Ucabangani?
5. UJesu watjengisa ukuthi unguMesiya
IBhayibheli lineemphorofido ezinengi ezisiza abantu bakwazi ukubona uMesiya, uZimu amkhethileko bona asindise abantu. Dlala IVIDIYO bona ufumane isethulo sezinye zeemphorofido uJesu azizalisa lokha nakasephasini.
Funda iimphorofido zeBhayibhelezi, bese nicoca ngemibuzo elandelako:
Funda uMikha 5:2 ukufumana ukuthi uMesiya bekazokubelethelwa kuphi. b
-
Inga-kghani ukubelethwa kwakaJesu kwasizalisa isiphorofidwesi?—Matewu 2:1.
Funda IRhubo 34:20 noZakariya 12:10 ukufumana lokho okwaphorofidwako ngokuhlongakala kwakaMesiya.
-
Kghani zazaliseka na iimphorofidwezi?—Jwanisi 19:33-37.
-
Ucabanga ukuthi kuyakghonakala na ukuthi uJesu wabangela iimphorofidwezi bona zizaliseke?
-
Lokhu kukutjelani ngoJesu?
6. Ukufunda ngoJesu kuyasizuzisa
IBhayibheli lithi kuqakatheke khulu ukufunda ngoJesu nangendimakhe. Funda uJwanisi 14:6 no-17:3, bese nicoca ngombuzo lo:
-
Kubayini kuqakathekile ukufunda ngoJesu?
UJesu usivulele indlela yokuba bangani bakaZimu. Usifundise iqiniso ngoJehova begodu ngaye singafumana ukuphila okungapheliko
ABANYE ABANTU BATHI: “AboFakazi bakaJehova abakholelwa kuJesu.”
-
Wena ungaphendula njani?
ISIRHUNYEZO
UJesu uyingilozi enamandla. UyiNdodana kaZimu begodu unguMesiya.
Buyekeza
-
Kubayini uJesu abizwa ngokuthi ‘ulizibulo layo yoke indalo’?
-
Bekenzani uJesu ngaphambi kobana eze ephasini?
-
Sazi njani bona uJesu unguMesiya?
HLOLA OKUNGENZASI
Funda okungeziweko ngendima kaJesu yokuba nguMesiya.
“Kghani Iimphorofido ZakaMesiya Zifakazela Bona UJesu BekanguMesiya?” (Isihloko esiku-jw.org)
Fumana ukuthi iBhayibheli liyakufundisa na ukuthi uZimu ube ngubaba kaJesu ngendlela abantu ababa nabantwana ngayo.
“Kubayini IBhayibheli Libiza UJesu Ngokuthi Yindodana KaZimu?” (Isihloko esiku-jw.org)
Funda ngendlela ukuphila komunye umma okwatjhuguluka ngayo ngemva kokuthi ahlolisise iBhayibheli ngalokho elikutjhoko ngoJesu.
“Umma OmJuda Uhlathulula Bona Kubayini Ahlolisisa Ukukholwa Kwakhe” (Phaphama!, Meyi 2013)
a Esifundweni 26 no-27 sizokucoca ngokuthi kubayini abantu batlhoga ukusindiswa nokuthi uJesu usisindisa njani.
b Qala Isithasiselo 2 bona ufunde ngesiphorofido esihlathulula ukuthi uJesu bekazokuvela nini ephasini.
Okhunye Ongakuthabela
OKUBUZWAKO
Siyini Isifundo SeBhayibheli Esinikelwa BoFakazi BakaJehova?
Ehlelweneli lesifundo sasimahla esinikelwa boFakazi bakaJehova, ungasebenzisa nanyana ngiyiphi itjhugululo yeBhayibheli. Zizwe utjhaphulukile ukumema woke umndenakho nabangani bakho bona bahlanganyele nawe.
