ISIFUNDO 49
Umndenakho Ungathaba Njani?—Ingcenye 1
Abatjhadikazi abatjha banethemba lokuthi ithabo ebebanalo ngelanga labo lomtjhado lizokuhlala unomphela begodu lokho kungenzeka. AmaKrestu esele anesikhathi eside atjhadile begodu asebenza budisi bona asebenzise iinluleko ezivela eBhayibhelini ayazi bona kungakghoneka.
1. Ngisiphi iseluleko iBhayibheli elisinikela amadoda?
UJehova ukhethe indoda bona ibe yihloko yomndeni. (Funda kwebeEfesu 5:23.) UJehova ulindele bona indoda ithathe iinqunto ezizokuzuzisa umndeni. IBhayibheli liluleka amadoda lithi “Ragelani phambili nithanda abafazi benu.” (Efesu 5:25) Kutjho ukuthini lokho? Indoda enethando imphatha kuhle umkayo ekhaya nalokha nabanabantu. Iyamvikela, imenze athabe begodu iyamtlhogomela. (1 Thimothi 5:8) Okuqakatheke khulu kukuthi iyamsiza abe nobuhlobo obuseduze noJehova. (Matewu 4:4) Ngokwesibonelo, ingathandaza beyifunde iBhayibheli nomkayo. Indoda nayimphatha ngethando umkayo imtlhogomele, iba nobuhlobo obuhle noJehova.—Funda yoku-1 kaPitrosi 3:7.
2. Ngisiphi iseluleko iBhayibheli elisinikela abafazi?
IliZwi lakaZimu lithi “umfazi kufuze ayihloniphe khulu indodakhe.” (Efesu 5:33) Angakwenza njani lokho? Angacabanga ngobuntu obuhle indodakwakhe enabo nangalokho ekwenzako bona itlhogomele yena nabantwana babo. Godu angatjengisa ukuthi uyayihlonipha ngokusekela iinqunto ezenzako, ngokukhuluma nayo kuhle begodu ayikhulume kuhle ngitjho nanyana ingalotjhi uJehova.
3. Abatjhadikazi bangawuqinisa njani umtjhadwabo?
IBhayibheli lithi ngabantu abatjhadileko: “Ababilaba bazokuba yinyama yinye.” (Matewu 19:5) Lokhu kutjho ukuthi kufuze balwisane nananyana yini engabenza bangasatjhidelani. Benza lokhu ngokuzipha isikhathi sokuba ndawonye, bakhulumisane ngokutjhaphulukileko begodu bakuveze ngethando lokho abakucabangako nendlela abazizwa ngayo. Abavumeli nanyana yini namkha nanyana ngubani ngaphandle kwakaJehova bona abe ngoqakatheke ukudlula umlinganabo. Batjhejisisa khulu bona bangatjhidelani khulu nomunye umuntu.
FUNDA NGOKUNGENELELEKO
Qala bona ngiziphi iinkambisolawulo zeBhayibheli ezingaqinisa umtjhadwakho.
4. Madoda thandani abafazi benu begodu nibatlhogomele
IBhayibheli lithi “amadoda kufuze athande abafazi bawo njengemizimbawo.” (Efesu 5:28, 29) Kutjho ukuthini lokho? Dlala IVIDIYO, bese nicoca ngombuzo olandelako.
-
Ngiziphi ezinye iindlela indoda engatjengisa ngazo bona iyamthanda umkayo nokuthi inendaba naye?
Funda kwebeKolose 3:12, bese nicoca ngombuzo lo:
-
Indoda ingabutjengisa njani ubuntobu emtjhadwenayo?
5. Bafazi thandani amadodenu begodu niwahloniphe
IBhayibheli likhuthaza umfazi bona ahloniphe indodakhe nanyana ilotjha uJehova namkha ingamlotjhi. Funda yoku-1 kaPitrosi 3:1, 2 bese nicoca ngemibuzo le:
-
Nange indodakho ingakholwa asinakuzaza bona ufuna ilotjhe uJehova. Ngiyiphi indlela engcono yokuyisiza, ucabanga ukuthi kufuze uyitjhumayeze ngaso soke isikhathi nofana ucabanga ukuthi kungcono ukuba mfazi olungileko, onomusa begodu ohloniphako? Kubayini ucabanga njalo?
Amadoda nabafazi bangenza iinqunto ezihle ndawonye. Ngezinye iinkhathi umfazi angaba nombono ohlukileko kunewendodakhe. Nange kunjalo angatjela indodakhe lokho akucabangako kodwana akwenze ngommoya ophasi nangehlonipho, akhumbula bona uJehova unikele indodakhe umthwalo wokuthatha iinqunto ezilungele umndeni. Nje-ke kufuze enze koke angakghona ukukwenza bona asekele isiqunto esithethwe yindodakhe. Nakenza njalo usiza umndenakhe woke bona uthabe. Funda yoku-1 kaPitrosi 3:3-5 bese nicoca ngombuzo lo:
-
UJehova uzizwa njani lokha umfazi nakahlonipha indodakhe?
6. Ningayihlula imiraro eniqalana nayo emtjhadweni
Awukho umtjhado onganamiraro. Nje-ke abatjhadikazi kufuze basebenzisane bona bakghone ukuhlula imiraro abaqalana nayo. Dlala IVIDIYO, bese nicoca ngemibuzo elandelako.
-
Evidiyweni le, ngiziphi izinto ebezitjengisa bona ubuhlobo babatjhadikazaba besele bubogaboga?
-
Ngiziphi izinto abazenzileko bona baqinise umtjhadwabo?
Funda yoku-1 kwebeKorinte 10:24 nekwebeKolose 3:13. Ngemva kokufunda umtlolo ngamunye nicoce ngombuzo lo:
-
Ukusebenzisa iselulekwesi kungawuqinisa njani umtjhado?
IBhayibheli lithi kufuze sihloniphane. Ukuhlonipha umuntu kutjho ukumphatha ngomusa. Funda kwebeRoma 12:10, bese nicoca ngemibuzo elandelako:
-
Inga-kghani indoda namkha umfazi kufuze alinde kube mlinganakhe omhlonipha qangi? Kubayini utjho njalo?
ABANYE ABANTU BATHI: “Mina nomlinganami asikatjhidelani ngendlela ebesitjhidelene ngayo ekuthomeni.”
-
Ungabahlathululela njani ukuthi iBhayibheli lingabasiza?
ISIRHUNYEZO
Indoda nomfazi bangathaba lokha nabathandanako, bahloniphana begodu basebenzisa iinkambisolawulo zeBhayibheli.
Buyekeza
-
Indoda ingenza njani bona kube nethabo emtjhadweni?
-
Umfazi angenza njani bona kube nethabo emtjhadweni?
-
Nangabe utjhadile, ngiyiphi ikambisolawulo yeBhayibheli engakusiza bona uqinise umtjhadwakho?
HLOLA OKUNGENZASI
Funda ngezinto ongazenza bona umndenakho uthabe.
Qala bona ungalihlonipha njani ihlelo lakaJehova lokuthi indoda ibe yihloko yomndeni
“Bafazi Kubayini Kufuze Nizithobe Emadodenenu?” (IsiThala, Meyi 15, 2010)
Qala bona iseluleko seBhayibheli singabasiza njani abatjhadikazi.
Okhunye Ongakuthabela
OKUBUZWAKO
Siyini Isifundo SeBhayibheli Esinikelwa BoFakazi BakaJehova?
Ehlelweneli lesifundo sasimahla esinikelwa boFakazi bakaJehova, ungasebenzisa nanyana ngiyiphi itjhugululo yeBhayibheli. Zizwe utjhaphulukile ukumema woke umndenakho nabangani bakho bona bahlanganyele nawe.
