ISIFUNDO 55
Sekela Ibandla Okilo
Amamiliyoni wabantu ephasini loke athabela ukulotjha uJehova emabandleni aziinkulungwana ahlukahlukeneko. Athabela iseluleko nesinqophiso asifumanako begodu azimisele ukusekela amabandla ngeendlela ezinengi. Kghani yindlela ozizwa ngayo ngebandla okilo?
1. Ngiziphi ezinye iindlela ongasebenzisa ngazo isikhathi sakho namandlakho ukusekela ibandla okilo?
Soke singasiza emabandleni esikiwo. Ngokwesibonelo, inga-kghani abanye ebandleni okilo sele baluphele namkha batlhogonyelwa? Ungabasiza na bona bakghone ukuya esifundweni? Ungakghona na ukubasiza ngezinye iindlela, njengokubayela eentolo namkha ubasize ngemisebenzi yangendlini? (Funda uJakopo 1:27.) Singasekela nangokuhlwengisa nokutlhogomela amaWolo womBuso. Akunamuntu osikatelela bona senze izintwezi. Ithando ngoZimu nabafowethu lenza ‘sizinikele ngokuzithandela.’—IRhubo 110:3.
AboFakazi ababhajadisiweko bangakghona ukusekela ibandla ngeendlela ezinengi ezihlukahlukeneko. Abafowethu abaphila ngokweemfuneko zeBhayibheli bangasiza ebandleni njengeenceku ezisizako namkha abadala. Abafowethu nabodade basekela umsebenzi wokutjhumayela ngokuphayona. Abanye aboFakazi basiza ngokwakha iindawo zokulotjha uZimu namkha ngokufudukela emabandleni atlhoga isizo ngezinye iindlela.
2. Singayisebenzisa njani imali nepahlethu bona sisekele ibandla?
‘Singadumisa uJehova ngezinto [zethu] eziligugu.’ (IzAga 3:9) Sithabela ukunikela ngemali nezinye izinto zethu ukusekela amabandla esikiwo nomsebenzi wokutjhumayela ephasini loke. (Funda yesi-2 kwebeKorinte 9:7.) Iminikelwethu isetjenziselwa nomsebenzi wokuhlangula. Abanengi bakhetha ‘ukubekela ngeqadi okuthileko’ bona banikele qobe. (Funda yoku-1 kwebeKorinte 16:2.) Singanikela emabhoksini womnikelo esifundweni namkha ku-inthanethi ku-donate.dan124.com. UJehova usinikela ithuba lokumtjengisa ukuthi simthanda kangangani ngendlela esikhetha ngayo ukusebenzisa izinto zethu.
FUNDA NGOKUNGENELELEKO
Cabangela ezinye iindlela ongasekela ngazo ibandla.
3. Singasebenzisa izinto zethu
UJehova uthanda umuphi othabileko begodu uJesu uzizwa ngendlela efanako. Ngokwesibonelo, uJesu wawubona umzamo womhlolokazi otlhagileko wokufuna ukunikela. Funda uLukasi 21:1-4, bese nicoca ngemibuzo le:
-
Inga-kghani kufuze sinikele ngemali enengi bona sithabise uJehova?
-
UJehova noJesu bazizwa njani nasinikela sithabile?
Bona ubone ukuthi iminikelwethu isetjenziswa njani, dlala IVIDIYO. Bese nicoca ngemibuzo elandelako.
-
Iminikelwethu isetjenziswa njani bona isize amabandla ephasini loke?
4. Singavolontiya bona sisize
Ngeenkhathi zeBhayibheli abantu abalotjha uJehova bebazimisele ukusebenza bona balungise iindawo abalotjha kizo. Kodwana lokho bekungahlanganisi imali kwaphela. Funda yesi-2 yeenKronike 34:9-11, bese nicoca ngemibuzo le:
-
Ama-Israyeli bekasiza njani bona kutlhogonyelwe indlu kaJehova namkha indawo yokulotjha?
Ukubona indlela aboFakazi bakaJehova abalandela ngayo isibonelo sekadeni, dlala IVIDIYO. Bese nicoca ngemibuzo elandelako.
-
Kubayini kuqakathekile ukuhlwengisa amaWolwethu womBuso nokuthi ahlale asebujamweni obuhle?
-
Ngiziphi ezinye iindlela ongasiza ngazo?
5. Abafowethu bangasebenzela ukuthi benze imisebenzi engeziweko ebandleni
ImiTlolo ikhuthaza amadoda amaKrestu ukwenza koke okusemandlenawo ukusekela ebandleni. Ukubona isibonelo salokho, dlala IVIDIYO. Bese nicoca ngemibuzo elandelako.
-
Evidiyweni, khuyini uRyan ayenzako bona asize khulu ebandleni?
IBhayibheli lihlathulula okulindelwe kubafowethu abalotjha njengeenceku ezisizako namkha abadala. Funda yoku-1 kaThimothi 3:1-13, bese nicoca ngemibuzo elandelako:
OMUNYE ANGABUZA: “AboFakazi bakaJehova bayitholaphi imali yokwenza umsebenzabo?”
-
Ungaphendula njani?
ISIRHUNYEZO
Kumthabisa khulu uJehova nasisebenzisa isikhathi sethu, amandlethu nezinto zethu bona sisekele ibandla.
Buyekeza
-
Singasisebenzisa njani isikhathi namandlethu bona sisekele ibandla?
-
Singazisebenzisa njani izinto zethu bona sisekele ibandla?
-
Ungathanda ukulisekela ngaziphi iindlela ibandla?
HLOLA OKUNGENZASI
Funda bona kubayini uZimu angakalindeli bona abantu abamlotjhako banikele ngokwetjhumi.
“IBhayibheli Lithini Ngokunikela Ngokwetjhumi?” (Isihloko esiku-jw.org)
Funda ngokuthi kutjho ukuthini ‘ukufuna’ ukufanelekela ukusebenzela ibandla.
“Inga-kghani ‘Uyawalangazelela’ Amalungelo Ebandleni?” (IsiThala, Septemba 15, 2014)
Qala abanye aboFakazi ababa nesibindi bazidela bona balayitjhe iincwadi bazise kabanye abantu abalotjha kunye nabo.
Qala umahluko okhona hlangana neendlela umsebenzethu osekelwa ngayo ngokweemali nezinye iinhlangano zeenkolo.
“Umsebenzi WaboFakazi BakaJehova Usekelwa Njani Ngokweemali?” (Isihloko esiku-jw.org)
Okhunye Ongakuthabela
OKUBUZWAKO
Siyini Isifundo SeBhayibheli Esinikelwa BoFakazi BakaJehova?
Ehlelweneli lesifundo sasimahla esinikelwa boFakazi bakaJehova, ungasebenzisa nanyana ngiyiphi itjhugululo yeBhayibheli. Zizwe utjhaphulukile ukumema woke umndenakho nabangani bakho bona bahlanganyele nawe.
