Pheze sekuziinyanga ezisithandathu uJwanisi uMbhabhadisi atjhumayela. UJesu, osekaneminyaka engaba ma-30, uza kuye eMlanjeni iJordani. Uzokwenzani? Akakezi ngokuvakatjha, begodu akakezi ukuzokubona ukuthi umsebenzi kaJwanisi uraga njani. UJesu uze ukuzokubawa uJwanisi bona ambhabhadise.

UJwanisi akavumi ukumbhabhadisa, uphendula uJesu uthi: “Ngimi otlhoga ukubhajadiswa nguwe, alo-ke wena uza kimi?” (Matewu 3:14) Phela uJwanisi uyazi ukuthi uJesu yiNdodana kaZimu ekhethekileko. Khumbula bona nakasese ngesibelethweni sakanina, uJwanisi weqa ngethabo, lokha uMariya obekazithwele uJesu nakavakatjhela unina kaJwanisi, u-Elisabethi. Kufanele ukuthi uJwanisi nakakhulako, unina wamcocela ngesenzakalwesi. Godu kufanele ukuthi wezwa ngesimemezelo esenziwa nguGabhariyeli kuMariya ngokubelethwa kwakaJesu. Kufanele nokuthi wezwa ngeengilozi ezavela emadodeni ebekalusa ngobusuku uJesu abelethwa ngabo.

UJwanisi uyazi ukuthi ubhabhadisa abantu abatjhuguluke ezonweni zabo. Kodwana uJesu akanasono. Naphezu kokwala kwakaJwanisi, uJesu uyaphikelela uthi: “Ungangivimbi, ngombana ngokwenza lokho senza koke okusehlelweni lakaZimu.”—Matewu 3:15.

Kubayini uJesu afuna ukubhajadiswa? Kuye, ukubhajadiswa akusilitshwayo lokutjhuguluka ezonweni zakhe. Kunalokho, ukubhajadiswa kwakhe kutjengisa ukuthi uzinikela bona enze intando kaYise. (Hebheru 10:5-7) UJesu bekambazi, kodwana njenganje sekusikhathi sokuthi athome umsebenzi uYise osezulwini amthumele bona azowenza ephasini. Ucabanga bona ikhona into engakajayeleki uJwanisi alindele bona yenzeke nakabhabhadisa uJesu?

Ngokukhamba kwesikhathi uJwanisi uyabika: “Loyo owangithuma bona ngibhabhadise ngamanzi wathi kimi: ‘Loyo ozokubona ummoya wehlela phasi bese uhlala kuye, loyo nguye obhabhadisa ngommoya ocwengileko.’” (Jwanisi 1:33) Lokhu kutjengisa ukuthi uJwanisi ulindele bona ummoya kaZimu uhlale kothileko azombhabhadisa. Nje-ke kungenzeka ukuthi uJwanisi akarareki nakabona “ummoya kaZimu wehla njengejuba, wehlela [kuJesu]” nakaphuma ngemanzini.—Matewu 3:16.

Kodwana akusingilokho kwaphela okwenzeka nakubhajadiswa uJesu. UmTlolo uthi ‘izulu lavulekela [kuJesu].’ Kutjho ukuthini lokhu? Kungenzeka  lokhu kutjho ukuthi ngesikhathi sokubhajadiswa kwakaJesu, umkhumbulo wepilwakhe yezulwini ngaphambi kokuthi eze ephasini uyabuya. Nje-ke, uJesu ukhumbula ngesikhathi ayindodana kaJehova emummoya, kuhlanganise namaqiniso uZimu amfundise wona ngaphambi kokuthi eze ephasini.

Ukungezelela, nakubhajadiswa uJesu, kuzwakala ilizwi elivela ezulwini limemezela lithi: “Le yiNdodanami, engiyithandako, engiyamukeleko.” (Matewu 3:17) Ngubani okhulumako? Ngeze kwaba nguJesu, ngombana ula noJwanisi. NguZimu okhulumako. Kusemtarini ukuthi uJesu yiNdodana kaZimu. UJesu akasinguZimu.

Tjheja ukuthi uJesu yindodana kaZimu emumuntu, njengombana nomuntu wokuthoma u-Adamu bekabizwa njalo. Ngemva kokuhlathulula ukubhajadiswa kwakaJesu, umfundi uLukasi uyatlola: “UJesu nakathoma umsebenzakhe, bekaneminyaka engaba ma-30 ubudala, abantu bebacabanga bona, uyindodana kaJosefa, indodana kaHeli, indodana kaDavida, . . . indodana ka-Abrahama, . . . indodana kaNowa, . . . indodana ka-Adamu, indodana kaZimu.”—Lukasi 3:23-38.

Njengombana u-Adamu ‘bekayindodana kaZimu’ emumuntu, noJesu naye ubizwa njalo. UJesu nakabhajadiswako, ubudlelwana bakhe noZimu bungena esigabeni esitjha, uba yiNdodana kaZimu ezokuphila njengommoya ezulwini. Nje-ke, uJesu sekangafundisa iqiniso ngoZimu begodu afundise indlela yokufumana ukuphila okungapheliko. UJesu uthoma umsebenzi ozokuswaphelisa ngokuthi anikele ngokuphila kwakhe kube sihlengo sabantu abanesono.