Genesi 37:1-36
37 Jakobo a ya mahlong a dula nageng ya Kanana, ga gore papage ne a dula gona go le motho wa go tšwa a sepela.
2 Tsowa ke tsa lephelo la Jakobo.
Nakwela Josefa a na le 17 ya mengwaga, mosogana yewa ke mo a disa morape le barwayi ba Bhilha le barwayi ba Zilpa, basadi ba papage. Byalo Josefa a tla a botsa papage dilo tsa go sa loka tso bobhuti bage ba di makang.
3 Byalo, Israyele ke mo a kwana le Josefa ka matla go phala barwayi bage ka moka, ka taba la gore o mo krayye a šele a tsofele fote a mo makela kobo ya go lefa ya go bafala.
4 Mo bobhuti bage ba di bona gore papa wa bona o kwana le Josefa ka matla go ba phala ka moka, ba thomisa go mo hloya fote ke mo ba fo dula ba mo kgwasolanya.
5 Ka nthago, Josefa a lora ke mokane a botsa bobhuti bage tso a di loriyeng, ba napa ba mo hloya ka matla.
6 A re ga bona: “Ke kgopela le theetsele tso ke di loriyeng.
7 Ke mo re tlema dingata tsa korong ku gare ga mašomo ke mokane ngata yaka ya yema thwii, dingata tsa lune dya yi dukulugela dya yi kgotamela.”
8 Bobhuti bage ba re gage: “Ayitsano o nyoko timaka kgoši gore o re lawole?” Byalo, ba napa ba mo hloya ka matla ka taba la tso a di loriyeng le tso a di hlayyeng.
9 Ka nthago a lora fote, ke mokane a botsa bobhuti bage tso a di loriyeng a re: “Ke loriye fote. Gana byalo letšatši, ngwedi le dinanedi 11 ya tsona ke mo di nkgotamela.”
10 A botsa papage le bobhuti bage tso a di loriyeng, ke mokane papage a mo lakatsa a re: “Di ra gore king dilo tso o di loriyeng? O ra gore nna le mmane wago le bobhuti bago re nyoko tla re tl’le kgotamela wene?”
11 Ke mokane bobhuti bage ba napa ba mo jelasela ka matla, mara papage a dula a gopola tso a di hlayyeng.
12 Bobhuti bage ba ya thina le Šikeme gore ba thogo disa morape wa papa wa bona.
13 Ka nthagonyana, Israyele a re ga Josefa: “Bobhuti bago ba disa morape thina le Šikeme akere? Tla ke go rome ku ga bona.” Mo a reyane, Josefa a re: “Nrome!”
14 Byalo a re gage: “Ke kgopela o ye o hlole gore ayitsano bobhuti bago ba sa le gabutši, le gore morape wo byang, ke mokane o tle o mpotse.” Byalo Josefa a tloga moyeding wa Hebhrone a baka Šikeme.
15 A kraya ke monna ye mongwana mo a kene a yinghayingha ku mašomong. Monna yene a mmutsisa gore: “O nyakana le ying?”
16 Yene a re: “Ke nyakana le bobhuti baka. Ke kgopela o mpotse gore ba disa kakaye.”
17 Monna yene a ya mahlong a re: “Ba tlugiye howa ka gore ke ba kwile ba re, ‘Koriyeneng Dothane.’” Byalo Josefa a šala bobhuti bage nthago ke mokane a ba kraya Dothane.
18 Ba mmona a sa tla kgole, mo a soko segela mo ga bona ba thomisa go mo polanela gore ba nyoko mmolaya.
19 Ba re: “Motho yela wa go lora ke ye a tlang.
20 Tla re mmolayeneng re mmošele mokoting,* re ko fo re o jile ke phoolwane ya hlaga. Re boneneng gore go nyoko makega ying ka tso a di loriyeng.”
21 Mo Rubeni a ba kwa ba reyane, a liketsa go mo phonisa a re: “Tla re sa mmolayeneng.”
22 Rubeni a re ga bona: “Le sa falatse madi. Mmošeleneng mo mokoting wo wo leng mo mašahleng, mara le sa mo kwaletsi.” Ke mo a tiputsiye gore o nyoko mo phonisa gore a ko thogo mmusetsa ga papage.
23 Mo Josefa a segela ga bobhuti bage, ba mo yapola kobo yage, kobo yela yage ya go bafala yo ne a yi yapere,
24 ba mo tseya ba mmošela ka ku mokoting. Ka nako yone ke mo go se na meetši ka hala mokoting.
25 Ke mokane ba dula fase ba ja. Mo ba tsosa dihlogo ba bona sekotšikara sa Maišimayele se tšwa Ghiliyade. Dikamela tsa bona ke mo di rwele bolepo bya go nkgela,* bhalesamo* le magagapi* ya mohlare, fote ke mo ba ya Egepita.
26 Ke mokane Juda a re ga bobhuti bage: “Di nyoko re thuša ka ying go bolaya bhuti wa rune re fetsa re fatela madi yage?”
27 Tla re sa mo make selo, re mo rekiseleneng Maišimayele. Phela ke bhuti wa rune, madi ya rune.” Byalo, ba theetsela bhuti wa bona.
28 Mo Maišimayele* yala ma feta, bobhuti ba Josefa ba mo ntsha ka hala mokoting ba mo rekisela Maišimayele yane ka 20 ya ditšheleta tsa silva. Banna bowa ba tseya Josefa ba ya naye Egepita.
29 Ka nthago, mo Rubeni a boya a kraya Josefa a se šiyo ka hala mokoting, a tlerolanya dikobo tsage.
30 Mo a boyela ga bobhuti bage a re: “Ngwanela aa šiyo! Yo nna yoo! Nko bona ke makiye ying mara?”
31 Ba bolaya pudi ya pholo, ba tseya kobo yela ya Josefa ba yi yenela ka teng ga madi.
32 Ka nthago, ba yisa kobo yela ya go bafala ga papa wa bona, ba re: “Re krayye kobo yowa. Re kgopela o yi lebelele gore ayitsano a yi ya morwayi wago.”
33 Ke mokane a yi lebelela a re: “Ke kobo ya morwayi waka! O tshwanele go ba a bolayye ke phoolwane ya hlaga! Yi mo jile!”
34 Jakobo a napa a tlerola dikobo tsage, a tlema lesaka mo masekeng fote a fetsa matšatši ya go tlala a llela morwayi wage.
35 Barwayi bage le barwediya bage ka moka ke mo ba liketsa go mo kgomoletsa mara ke mo a sa nyake ba mo kgomoletsa a re: “Ke nyoko llela morwayi waka go segela ke ya Lebitleng!”* Papage a fo ya mahlong a mo llela.
36 Maišimayele yala ma mo rekisela Potifaro wa ku Egepita, Potifaro ke mo go le lelata la Faro fote go le yene ndhuna ya masole ya go pasopa Faro.
Ditwaba
^ Di šupetsa go le mokoti wa gore batho ba wo makiye gore go kene meetši.
^ Gabutšibutši ke “Labhodanamo.”
^ Ke makgura ya go nkgela ya gore ma tšwa ga dimelane kela mehlare ye mengwana.
^ Hala magagaping go tšwa bolepo bya gore ba maka tsa go nkgela ka byona.
^ Kela “batho ba go rekisa ba Mamidiyane.”
^ Kela “Sheol,” ya gore ke lebitla la batho ka mokana ga bona. Bala ga Dihlatollo Tsa Mantsu.
