Ke nna wa 1955 fote ke nna ye monyana wa gona ga bašomanyana kararo ya bona. Ke golele thina le lewatle la borwa bya Finland, ga poleke ya gore gana byalo ba re ke toropo ya Vantaa.

Mmane waka o kolobetsiwe a ba Hlatse ya Jehova mengwaganyana ya mo ke soko bane ke belegiwa. Mara mo go le papa yene ke mo a sa kwane le nnete fote ne a sa nyake mmane a tšhuta le rune Bhayibele kela le mong go ya le rune megahlanong. Byalo, ke mo a re tšhutisa mong yona nnete ya Bhayibele mo papa a se šiyo.

Mo nkene ke ya mahlong ke gola, ke yye ka ganana le taba ya go sa theetsele Jehova. Mo re beyisa, mo ke sa na le kašupa ya mengwaga, thitšere yaka yi yye ya bilelana ka go kwata ka taba la gore ne ke sa nyake go ja verilättyjä (makuku ya gore ba ma bhakiye ka madi ya Finland). O yye a pota dikana tsowa ka letsogo ka lloši gore a thogo bula molomo wowa ke mokane ka letsogo le le lengwana o yye a liketsa go tšhela foroko ka ho ganong gaka ya gore yi na le lekuku la gore ba le bhakiye ka madi. Ke yye ka yi phagela ku kgole foroko yone ya gore yi letsogong lage.

Papaka o yye a hlokofala mo ke na le 12 ya mengwaga. Ka nthago ga hone ke yye ka kgona go ya megahlanong. Magageru ya ka ho phutegong ma yye ma šupetsa gore maa njabolela fote tsotsone di yye dya maka gore ke ye mahlong ga tso tsa Modimo. Ke yye ka thomisa go bala Bhayibele ka moka matšatši ke boya ke tšhuta le dikgatiso tsa rune tsa Sekreste ka matšato. Phela mokgwa wone wa gabutši wa go tšhuta Bhayibele wo yye wa nthulela lešuba la gore ke kolobetsiwe ke na le 14 ya mengwaga ka di 8 tsa August 1969.

 Ka nthagonyana mo ke fetsa sekolo, ke yye ka thomisa go ba mošupatsela wa nako ka moka. Di soko ya kgole ke yye ka ye berekela ga poleke ya gore go gayela batšhomayedi ku Pielavesi, thina le bogare bya Finland.

Ku Pielavesi, ke yye ka kraya kgareba ya gore yi yye ya ba mosadi waka ba re ke Sirkka. Ke f’lo kwa a ntšhoka ka taba la gore ke mo a tinyanafatsiye fote ga Jehova a mo nyaka ka matla. Ke mo a sa lelekisane le dilo tsa mayemo kela tsa go phela mabešebeše. Ka mokana ga rune ke mo re nyaka go maka so re ka se kgonang gore re berekele Jehova fote ne re tikemisele go mmerekela go gongwana le go gongwana mo ba reng re ye gona. Re šadhiye ka di 23 tsa March, 1974. A sanka ra ya mo batho ba gore ba sa tšwa go tseyana ba yang gona mara re yye ra ye berekela ku Karttula, ga gore ne go gayela ka matla batšhomayedi ba Mmušo wa Modimo.

Go tlugisela re šadhiye, Jehova o re šupetsiye gore o nyoko re pasopa ka tso re di gayelang mo re ka fo yetisa tsa Mmušo wage ku mahlong. (Mat. 6:33) Mo re beyisa, mo re le ku Karttula ke mo re se na koloyi. La mathomo ke mo re tisepelela ka bhayisikila. Mara mo go le marega, phefo ke mo yi remetsa. Gore re thogo tšhomayela ga phutego ya gore tšhomo ya gona ke ye kgolo ne di nyaka re na le koloyi. Mara sekwetše ke mo se sa tsoge gore re ka yi reka.

Wa tšiba re sa di nagana, bhuti waka a fo re palakata a re vakašela. O yye a fo re neya koloyi yage re sa kgopela. Ne ba yi patelele le mong inšorense. So ne yi šota ka sona ke go fo re re titšhelele pheterole. Phela re šele re na le koloyi ya gore ke mo re yi hloka.

Jehova o re šupetsiye gore ke yene ye a nyoko re pasopang ga tso re di gayelang. Mmereko wa rune ke mo go fo ba go yetisa tsa Mmušo wa Modimo ku mahlong.

Ka 1978 mo re ya ga Sekolo sa Mašupatsela, Raimo Kuokkanen a wa gore ke ye mongwana wa bo ne ba re tšhutisa o yye a re hlohletsela gore re ngwalele go ya ga Sekolo sa Gilead. Byalo, re yye ra thomisa go tšhuta Sekgowa re nyaka go segelela taba ya gore re thogo tshwanelega go ya gona. Mara, ka bo 1980 mo re soko ngwalela go ya Gilead ba yye ba re mema gore re tl’le berekela ga ofisi ya lekala ya ku Finland. Ka nako yonone, batho ba Bethele ke mo ba sa tshwanela gore ba ngwalele go ya Gilead. Mara rune ke mo re nyaka go berekela mo Jehova a bonang gore go re lokele, re sa yi ka gore rune re bona kaye. Byalo, re yye ra yamogela sememo sone. Le mo go le ka mokgonone, re yye ra fo ya mahlong re tšhuta Sekgowa gore  mo go ka thulega lešuba la gore re ngwalele go ya Gilead re sa hlupegi ka selo.

Ka nthago ga mengwaganyana, bo ba Mogoba wa go Lawola ba yye ba re ba go bereka Bethele le bona ba ka ngwalela go ya Gilead. Ye naa, re yye ra napa re tlatsa fomo ka nako yonone mara ne go se ka taba la gore tsa Bethele re tinnwe ka tsona. Ne go se ka mokgonone le ka go nyana! Ke mo re fo nyaka go berekela go gongwana le go gongwana mo go gayelang dibereki, solanka re tshwanelega. Ba yye ba re yamogela Gilead fote re yye ra yaloga ga tlelase ya bo 79 ka September 1985. Ne re ye berekela Colombia.

Ku Colombia, ba yye ba thomisa ka go re romela go ye berekela ga ofisi ya lekala. Ke yye ka liketsa ka matla gore ke make so nka se kgonang ga mmereko waka mara ka nthago ga mongwaga ke le ga lekala lone ne ke šele ke kwa gore di nyaka gore go tšhentšhe se sengwana. Ke mo go le la mathomo lephelong laka ke kgopela gore ba nneye mmereko wo mongwana. Ke mokane ba ye ba re re ye tšhomong re ye bereka re le barumiwa ga mutši wa Neiva, poleke ya Huila.

Ke mo ke dula ke jabolela mmereko wa go tšhomayela. Ku Finland mo ke sa le mošupatsela wa gore aa soko šadha ka dinako tse dingwana ne ke tšhomayela go tlugisela ka bošego go segela ka malobana. Fote nna le Sirkka ba gore a yi botala re šadhiye ne re fetsa matšatši ya go tlala re le tšhomong. Mo re berekela ga tšhomo ya gore yi kgole, ne re fela re yetsela ka koloying. Tsotsone ne di re fokotsela nako ya go sepela leyeto la go lefa ke mokane ra thogo thomisa letšatši le lengwana go sa le ka bošego.

Ka gore re barumiwa, re sa na re jabolela tšhomo go fo tshwana le mathomisong. Phutego ya rune yi yye ya gola fote magageru ya Colombia ke mo ma hlompa, ma šupetsa go nyakanana fote ma kwana le taba ya go leboga.

Ga poleke ya gore a yi kgole ka matla le mo re berekelang gona ku Neiva ne go na le ditoropo tsa gore a go na Dihlatse. Ne ke hlupa ke taba ya gore ditaba tsa go bafala di nyoko segela byang ga dipoleke tsone. Mara ka taba la dintwa tsa gore di baka ke masole ya gore a ma molawong, dipoleke tsone ne di sa tšhireletsega ga batho ba gore a ba tšwe hone ga tsona. Byalo, ke yye ka rapelela taba ya gore ye mongwana gana hone ga toropo yone a be Hlatse. Ne ke nagana gore motho yene di nyaka a dule Neiva gore a thogo tšhuta nnete. Fote ke yye ka rapelela le gore ka nthago ga mo motho yene a kolobetsiwwe, o nyoko ba mogageru wa gore o butšwiye ke mokane a boyela ga poleke ya gabo gore a ye tšhomayeleng. Hala ke tšibiye gore Jehova go na le so a se naganang sa kawone go phala nna nke ke sa tihlupa.

Ka nthagonyana ga gana hone, ke yye ka thomisa go tšhuta Bhayibele le morene mongwana ba re ke Fernando González. O dula ku Algeciras, ga ditoropo tsela tsa gore a go na Dihlatse. Fernando o sepela dikhilomitha tsa go teya ka ku ga 50 a tla Neiva mmerekong. Ke mo a dula a lukiselela gabutši mo re tl’le tšhuteng fote ka nako yonone o yye a thomisa le go tla megahlanong. Beke ya mathomo ya mo Fernando a sa tšwa go tšhuta Bhayibele, o yye a khunghula ba bangwana polekeng ya gabo ke mokane a ba tšhutisa tso a di tšhutiyeng.

Fernando o yye a kolobetsiwa ka nthago ga kobodi ya dikgwedi a tšhuta Bhayibele ka January 1990. Ke mokane ka nthagonyana o yye a ba mošupatsela wa nako ka moka. Ka taba la gore go šele go na le Hlatse ka yyoši ga poleke ya Algeciras, phela go šele go le kawone ka matla fote go tšhireletsegiye gore ofisi ya lekala yi ka romela mašupatsela ya go hlawolega ga poleke yone. Ka February 1992, go yye gwa thomisa go ba le phutego hone toropong.

Ayitsano Fernando ne a tšhomayela a tshwere ya go kgana ga toropo ya gabo? Dho! Ka nthago mo a šele a  šadhiye, yene le mosadi wage ba yye ba rorela San Vicente del Caguán, ga toropo ye nngwana ga gore ne go se na Dihlatse. Ye lune, phela le gana hone ba yye ba gelepa ka matla gore go thomise phutego. Ka 2002, Fernando ba yye ba mo kgeta gore a bereke go le mopotulugi fote yene le mosadi wage ba yye mahlong ba le ga mmereko wone wa go potologa go segela le lekgono lowa.

Ga tso ke gahlanneng natso ka mokana ga tsona, ke tšhutiye ka mokgo go leng taba ye kgolo ka matla go rapelela ditaba tsa go yelana le Mmušo wa Modimo. Jehova o maka dilo tsa gore re ka sa kgone go di maka. Le gona, taba ya go buna a yi ya rune, ke yage.—Mat. 9:38.

Ka 1990 ba yye ba re neya mmereko wa go potologa. Mo re yyeng ra potologa gona la mathomo ne go le Bogotá, toropo ya gore ba yi tseyela gedimo. Mmereko wowa ne wo re tshosa ka matla. Phela nna le mosadi waka re fo ba batho nje fote a go na sa gore re ko re re se teya ka matla. Fote a sanka ra dula ga toropo ya gore batho ba dula ba yemayema. Mara, Jehova o yye a maka tso a di tshepisiyeng tsa gore di ga Mafilipi 2:13 ya gore yi re: “Modimo ke yene a makang gore le be le matšato fote o maka gore le nabele go maka mmereko a boya a le neya le matšhika ya go wo maka.”

Ka nthago, ba yye ba re re ye potologa ga poleke ya Medellín, ga toropo ya gore ke thomisiye ke bolabola ka yona. Batho ba hone ga go tlala ba dula ba maka bokgohlane ho diterateng fote a go na le sa go ba tshosa. Mo re beyisa, tšatši le lengwana ke sa tšhutisa ye mongwana Bhayibele, go yye gwa kwagala nkare batho baa thunyana ka ho tawong ga ntlo yo ne ke vakašiye ga yona. Ne ke šele ke nyaka go patlama ho fase mara mo ke lebelela ye ke tšhutang naye Bhayibele o fo ya mahlong a bala direle fote a kene a kgibiye. Mo a fetsa go bala o yye a re wa boya ke mokane a tšwela ka tawong. Ka nthagonyana, o yye a boya a na le bana ka babedi ba banyana fote a bolabola a kene a kgibiye a re, “Ke masopo barena ne ke tshwanele ke ye tseya bana baka.”

Ne go na le dinako tse dingwana tsa gore ne re le kotsing. Letšatši le lengwana mo re le ga mmereko wa go kena ntlo le ntlo, mosadi waka o yye a tla a taboga a libiye ho gaka, a yitseri kwayee ka botšhwewu. O yitseri morene mongwana o thunnye sethunya a libisiye ho gage. Ke yye ka tšhoga ka matla. Mara, ka nthago re yye ra di bona gore morenene ke mo a sa re o thunya Sirkka; ke mo a thunya monna ye mongwana wa gore ne a feta thina le Sirkka.

Mo nako yi kene yi ya bokgohlane byone ke mo bo sa sa re šekedisa. Ne re tiyisa ke ka mokgo Dihlatse tsa go dula gana hone ne di tiyelele ka gona ka gore tsona ne di dula di gahlana le seyemo sa mošaga wowa fote le sa go feta sowa. Re fetsiye ka gore mo nkare Jehova ke mo a ba gelepa, le rune a ka sa re lisetsi o nyoko maka se sengwana. Ne re dula re sa di takisi maahlo tso bagolo ba poleke yone ne ba re yeletsa ka tsona ke mokane tso tse dingwana re di šiya le Jehova.

Ke nnete gore, go gongwana seyemo ne se se kotsi ka mokgo ne re naganne. Ke yye ka kwa mantsu ya basadi ka babedi ba rasa ba boya ba ro rogelelana ka tawong ga legaye lo ne ke vakašiye ga lona. Ne ke sa di jabolele le go nyaka go kwa gore ba lwela ying mara mong wa mutši wone o mputsiye gore ke tle ga gore nkare ke leforanta ga gore ba dulela gona. Ye barena, phela taba yela ya go “lwa” gabutšibutši ne go le dinonyane tsela tsa go bolabola ka dipedi, ne di yekisela tso bayagelane ba di bolabolang.

Ka 1997, ba yye ba nkgeta gore ke tšhutise ga Sekolo sa Batšhomayedi. b Ne ke dula ke jabolela go kena dikolo tsa go yelana le tsa Mmušo wa Modimo mara a sanka ka yi nagana taba ya gore nko tsoga ke thulegele ke lešuba la gore ke tšhutise.

Ka nthagonyana, ke yye ka bereka ke le mopotulugi wa go sepelela megahlano ye megolonyana. Mo mmereko wone ne ba nneyye wona wo yema, ke yye ka boyela ka bereka ga mmereko wa go potologa. Byalo, gana hala ga go teya ka ku ga 30 ya mengwaga, ke yye ka jabolela go bereka ke le wa go tšhutisa fote ke le mopotulugi. Mmereko wowa ke wona ne wo maka gore re rufiwe ka matla. Mara, a yi dilo ka mokana ga tsona tsa gore ne di fo thelela. Yema ke fo hlatolla ka gonyana.

Ke tšibega ka go ba le mokgwa wa gore a ke thogathoge fote a ke fo lla go kamaka. Tsotsone di n’gelepiye gore ke teye ke tshwarelele le mo seyemo sa go thathafa se n’gutulanya. Mara, ka dinako tse dingwana ne ke fela ke ba le matšato ya go fetelela ke re nnabeng ke liketsa go lukisa ditaba tsa phutego. Go gongwana ke yye ka hlohletsela ba bangwana ke tiyisiye letsogo ga taba ya gore ba šupetse go nyakanana le go naganelana. Phela ne di fo šupetsa gore ka dinako tsotsone le nna ne ke gayela mekgwa yone.—Marom. 7:​21-23.

Ka taba la gore ke fela ke maka tsa go tšiba ke nna, tsotsone di ya nkgongwetsa wa tšiba. (Marom. 7:24) Phela ke yye ka feleletsa ke botsa Jehova ka thapelo gore go ka ba kawone gore ke lisetse mmereko wa borumiwa ke mokane ke boyele Finland. Ka malobana wonone ke yye ka kena mogahlano wa phutego. Tso ke di kwileng mo ke le mogahlanong di nhlohletsele gore ke sa thogathoge fote ke ye mahlong nkene ke kikirisana le taba yone yaka ya gore ke fela ke kekemisa. Go segela le lekgono lowa ke tikisa ke taba ya gore di fo ba lekgwaying gore Jehova o fetodiye morapelo waka. Go tokegela gana hone, ke yi leboga ke sa fetsi taba ya gore o n’gelepiye a kene a šupetsa gore o nkwela go baba gore ke hlule tsa go nghula.

Nna le Sirkka re mo leboga re sa fetsi ga Jehova gore le rune re yye ra thulegela ke lešuba la gore re fetse matšatši ya go tlala mo re kene re sa phela re le ga mmereko wa nako ka moka. Fote ke šitega le go hlaya gore nka mo leboga ke re king ga Jehova ka taba la go nneya mosadi wa gore o šupetsa go nyakanana ka matla a boya a ro tshepega mengwaga yowa ka mokana ga yona.

Go se botala nko ba ke na le 70 ya mengwaga fote nko ba ke sa sa bereka ke le wa go tšhutisa gore tšhomo yi makamakiwa byang le mmereko wa go potuluga. Mara, tsone a di nkgongwetsi le ka gonyana. Ke ntaba? Ka taba la gore ke yemme ke sa thogathoge ga taba ya gore ke tshepa gore so se thanakisang Jehova ka matla ke gore re mmerekele re kene re tšiba mo re kgerang gona le gore re mo gadimisa ka dipelo tsa go fufuma go nyakanana le go leboga. (Mmik. 6:8; Mar. 12:​32-34) Gore re thogo maka gore Jehova a thanakiwe, a di nyake re na le mmereko wa mayemo ya gedimo.

Mo ke lebelela ku nthago ga mebereko yo ke yyeng ka yi jabolela, ke di bonne gore a ke ya wo kraya ka taba la gore ke kawone go phala ba bangwana fote a ke ya wo kraya ka taba la gore ke nna sekokotla. A go ka mokgonone wa tšiba! Mara, Jehova o f’lo ya mahlong a nneya mmereko wowa ka taba la gore o nkwele go baba. O f’lo nthulela lešuba lowa le mo nkene ke le motho wa go šitelana. Ke ya di tšiba gore ke kgonne go maka mmereko wowa ka taba la gore ne ke gelepa ke Jehova. Go fo ba ka mokgonone gore, mo ke lelemela matšhika ya Modimo maa thanakiwa.—2 Makor. 12:9.