1-2. Ke ntaba Makreste ma tshwanele ma tihlupe ka taba ya go tsogela legedimong?

BATHO ba go tlala bo ba berekelang Jehova ba na le tshepo ya go phela ho lefaseng go ya go yye. Mara mogoba wo monyana wa Makreste ya go tlotsiwa, wona wo na le tshepo ya go ye phela legedimong. Bo ba gore ba tlotsiwwe ba nabela go tšiba ka lephelo la bona la ku mahlong, mara ke ntaba bowa ba nang le tshepo ya go phela ho lefaseng di ba yama? Re nyoko di bona gabutši gore tsogo ya legedimong yi nyoko maka gore le bo ba nang le tshepo ya go phela ho lefaseng go ya go yye ba rufege. Byalo le mo nkare re na le tshepo ya go ye phela legedimong kela lefaseng, di nyaka re nabele go tšiba ka tsogo ya legedimong.

² Modimo o butšwelele malata ya Jeso ya mangwana ya ku botala gore ma ngwale ka tshepo ya go ya legedimong. Johane wa lepostola o yitseri: “Gana byalo re bana ba Modimo, mara a di soko re yelela gore go nyoko makega ying ka rune ku mahlong. So re se tšibang ke gore mo yene a šele a di tšiba le rune re nyoko tshwana naye.” (1 Joh. 3:2) Byalo, Makreste ya go tlotsiwa a ma di tšibi gore ma nyoko ba ma le byang mo ma tsusiwa gore ma ye legedimong ka mmele wa moya. Mara, ma nyoko thogo bona Jehova mo ma kraya patela ya wona. Baebele a yi nape yi hlaya dilo ka moka ka taba ya go tsogela legedimong, mara go na le tse dingwana tso Pawulo wa lepostola a bolabodiyeng ka tsona. Bo ba go tlotsiwa ba nyoko ba le Kreste mo a šele a “fetsa ka memmušo ya lefase lo le matšhika ya lona.” Gana hone go kena le “lenaba la  mafelelo lo ba reng ke likgu.” Ke mokane Jeso—le bo a lawolang nabo—ba nyoko busetsa dilo ka mokana ga tsona ga Jehova. (1 Makor. 15:24-28) Yone go nyoko ba nako ya go jabodisa ka matla! *

3. Makorente wa Mathomo 15:30-32, yi re go tshepa taba ya tsogo, go gelepiye Pawulo gore a thogo maka ying?

³ Go tshepa taba ya tsogo go gelepiye Pawulo gore a thogo tiyisela dintshitshire tsa go sa fele. (Bala 1 Makorente 15:30-32.) O butsiye Makorente gore: “Ke nkgela ke likgu ka moka matšatši.” Fote o ngwadiye gore: “Ke lwile le diphoolwane tsa go tshosa tsa hlaga ku Efeso.” Di ka makega gore ke mo a bolabola ka go lwa le diphoolwane ga dipoleke tso ne go lwediwa ga tsona ku Efeso. (2 Makor. 1:8; 4:10; 11:23) Kela di ka makega gore ne a bolabola ka Majuda ya go ba le lešidi le ba bangwana ba go phela nkare ke “diphoolwane tsa go tshosa tsa hlaga.” (Meber. 19:26-34; 1 Makor. 16:9) Le mo re ka sa hlayisi gore o gahlanne le tsa go sasamela tsa mošaga mang. So se šalang ke gore Pawulo o yye a fo dula a naganne ka tsa gabutši tsa ku mahlong.—2 Makor. 4:16-18.

4. Taba ya gore go na le tshepo ya tsogo yi tiyisa Makreste ka makgo mang lekgono? (Lebelela sethombhe sa ka tawong.)

⁴ Re phela ga dinako tsa gore a dya loka. Magageru ya mangwana ma yye ma makiwa bošakašakane. Ya mangwana ma dula ga dipoleke tsa gore go fo dula go lwiwa fote ma tikwa ma sa tšhireletsega. Fote ya mangwana ma berekela Jehova ga dinaga tsa gore mmereko wa go tšhomayela ba wo rakele mara ma sa fo ya mahlong ma kene ma berekela Jehova le mo di ka maka gore ma kene mathatheng kela ma kgwe. Le mo go le ka mokgonone, magageru yawa ke mošupetso wa gabutši ga rune wa gore re sa lesetse go berekela Jehova. Go fo tšiba taba ya gore le mo ma ka kgwa, Jehova o ma beyele tsa gabutši ku mahlong, tsotsone di ma tiyisa ka matla.

5. Ke mokgwa wofeng wa go tseya dilo wo wo ka makang gore tumelo ya rune ga taba ya tsogo yi tekateke?

⁵ Pawulo o yye a pasopisa magagabo ka taba ya go tseya dilo ka mokgwa wa go sa loka, wa gore ne wo šele wo kenne ba bangwana, wa go tshwana le wa gore: “Mo nkare bo ba kgwileng ba ka sa tsusiwi, ‘tla re jeneng fote re nweneng, ka taba la gore ka motshwana re nyoko kgwa.’” Mokgwa wone ke botala wo kene wo le gona le ka dinako tsa mo Pawulo a soko bane a segela. Di ka makega gore ne a bolabola ka Jesaya 22:13, ya gore yi rela ka mokgo Maisrayele ne ma tseya dilo ka gona. Ma kgetiye go lelekisana le dilo tsa go tijabodisa ke mokane ma phagela ku thoko taba ya go tiyisa senghana sa wona le Modimo. Gabutšibutši mokgwa wa Maisrayele wo tshwana le mokgwa wo batho ba nang nawo lekgono wa gore “re tikwise ka lephelo, tsa ka motshwana a re di tšibi.” Ka mokgo ne ba tseya dilo ka gona di ngwadiwwe ka ho Baebeleng gore a dya ba berekela.—2 Dikor. 36:15-20.

6. Tshepo yo re nang nayo ka tsogo, di nyaka yi re kutšetsela ka mokgo mang mo re kgeta banghana?

⁶ Di fo ba lekgwaying gore mo re kgeta banghana, di nyaka re kutšetsele ke taba ya gore Jehova o nyoko tsosa bo ba kgwileng. Magageru ya ku Korente ne di nyaka ma kganele kgole le go nghanelana le batho ba gore ba phigisa taba ya tsogo. Go na le so le rune re se tšhutang: Go nghanelana le batho ba gore a ba tihlupi ka tso di nyoko makegang ku mahlong, di ka re tšhela mošohlong. Go fokatsa le ba mošaga wonone go ka sinyanya ka mokgo Makreste ya mannete ma bonang dilo ka gona le maphelelo ya gabutši. Fote tsotsone di ka maka gore motho a feleletse ka go sinyela Modimo. Nka taba lo Pawulo a yyeng a re: “Hlahlama ka mokgwa wa go loka fote o sa tlwayele go sinya.”—1 Makor. 15:33, 34.

7. Makorente wa Mathomo 15:35-38, yi re ke diputsiso tsa mošaga mang tso ba bangwana ba yyeng ba di butsisa ka taba ya tsogo?

⁷ Bala 1 Makorente 15:35-38. Ye mongwana a ka maka gore ba bangwana ba kamake taba ya tsogo ka go butsisa gore: “Anthe bo ba kgwileng ba nyoko tsusiwa ka mokgo mang?” Re ko ba re maka gabutši mo re nagana ka phetolo ya Pawulo, ka taba la gore batho ba go tlala lekgono a ba dumele dilo tsa go tshwana ga taba ya mo motho a kgwile. Anthe mara Baebele yi tšhutisa ying?

8. Ke mošupetso wofeng wo wo ka re gelepang go kwisisa taba ya go tsogela legedimong?

⁸ Mo motho a kgwa, mmele wage wo fo ya wo kene wo sinyega. Mara Ye a makiyeng legedimo le lefase, a ka di kgona go tsosa motho yene a boya a mo neya mmele wa gabutši. (Gen. 1:1; 2:7) Pawulo o yye a berekisa mošupetso go šupetsa gore Modimo a di mo tleme gore a tsose motho ka mmele wonola. Nagana ka “thoro” kela “pewu” ya semelane. Mo o gaša pewu, ya thunya ke mokane ya ba semelane. Semelane sone se fapana kgole le pewu. Pawulo o berekisiye mošupetso wowa go re šupetsa gore ye a re Makiyeng a ka tšhentšha “mmele gore go be wo wo [nyakang] ke yene.”

9. King so Makorente wa Mathomo 15:39-41, yi se bolabolang ka mmele wa go sa tshwane?

⁹ Bala 1 Makorente 15:39-41. Pawulo o di bonne gabutši gore go na le go sa tshwane ga dilo tso Modimo a di makiyeng. Mo re beyisa, mmele wa dikgomu, dinonyane le wa dihlapi wo fapana kgole. O hlayye gore ku gedimo, re bona ka mokgo letšatši le fapanang ka gona le ngwedi. Fote a boya a re “dinanedi a di tshwane ka go gadima.” Nnete ke gore le mo re ka sa di bone ka maahlo, mara go na le tso ba sayense ba reng ke di-red giant stars, di-white dwarfs le di-yellow stars tsa gore di tshwana le letšatši la rune. Pawulo o tokegele ka gore “go na le mmele wa legedimong le mmele wa lefaseng.” Byang mara? Ho lefaseng, re na le mmele wa nama, mara ku legedimong go na le mmele wa moya wa go tshwana le wo mangeloyi ma nang nawo.

10. Go sa tshwane ga mmele go yelana byang le tsogo?

 ¹⁰ Fote Pawulo mo a ya mahlong o yitseri: “Go fo tshwana le tsogo ya bakgu. Wo gašiwa go le wa go sinyega; wa tsusiwa go le wa go sa sa sinyega.” Mo motho a kgwa, mmele wage wa sinyega ke mokane wa boyela leroleng. (Gen. 3:19) Byalo di kgonega byang gore mmele wo ka “tsusiwa go le wa go sa sa sinyega”? Pawulo ke mo a sa bolabole ka motho wa gore o nyoko tsusiwa gore a tl’le phela ho lefaseng, go fo tshwana le bo ba yyeng ba tsosa ke Eliya, Eliša le Jeso. Pawulo ke mo a bolabola ka motho wa gore o tsusiwa a na le mmele wa legedimong, go leng, “mmele wa moya.”—1 Makor. 15:42-44.

11-12. Ke go tšhentšha ga mokgo mang ga gore go makegele Jeso nakwela a tsusiwa fote bo ba gore ba tlotsiwwe bona go ba makegela ka mokgo mang?

¹¹ Mo Jeso a sa phela ho lefaseng, ke mo a na le mmele wa nama. Mara mo a tsusiwa “o yye a ba moya wo wo neyang lephelo” ke mokane a boyela legedimong. Le wona Makreste ya go tlotsiwa ma nyoko tsusiwa ma na le mmele wa gore ma thogo phela legedimong. Pawulo o yitseri: “Ka taba la gore re yapere mmele wa motho wa go makiwa ka lerole, re nyoko boya re yapara mmele wa legedimong.”—1 Makor. 15:45-49.

¹² Taba ya Pawulo ya go bolabola ka tsogo ke mo yi šele yi segela mo yi khanyang gona. Di nyaka re sa lebale gore Jeso aa tsusiwa a na le mmele wa nama. Pawulo mo a yi beya nje, o yitseri: “Nama le madi di ka sa wo bone Mmušo wa Modimo” ku legedimong. (1 Makor. 15:50) Mapostola le bo ba go tlotsiwa ba ka sa tsusiwi gore ba ye legedimong ba na le mmele wa nama le madi wa gore wo nyoko sinyega. Ba nyoko tsusiwa leng? Pawulo o yi beyye lekgwaying gore tsogo yone yi nyoko makega ku mahlong; ne yi ka sa makege ka go yakgoswa ka nthago ga mo ba šele ba kgwile. Nakwela Pawulo a ngwala Makorente wa Mathomo, malata ya mangwana ya Jeso ke mo ma šele ma “yetsele boroko bya likgu,” mo re beyisa, Jakobo wa lepostola ke ye mongwana wa bona. (Meber. 12:1, 2) Mapostola ya mangwana le bo ba go tlotsiwa ne ba soko bane ba yetsela “boroko bya likgu.”—1 Makor. 15:6.

13. Go nyoko makega ying mo Jeso a šele a segele?

¹³ Jeso le Pawulo ba bolabodiye ka dinako tsa go makatsa tso di nyoko makegang ku mahlong—mo Kreste a šele a segele. Ka dinako tsotsone tsa mo Kreste a šele a segele, go nyoko ba le dintwa, go tekateka ga lefase, malwele le tse dingwana tsa go tshosa tso di nyoko makegang lefaseng ka mokana ga lona. Seporofeto sowa sa Baebele re se bonne se thomisa go makega ka mongwaga wa 1914. Ne go sa nyoko makega sekopa se sengwana se segolo sa mošupetso wowa. Jeso o yitseri ditaba tsa go bafala tsa gore Mmušo wa Modimo wo šele wo lawola di nyoko tšhomayediwa “lefaseng ka mokana ga lona gore batho ba ditšhaba ka mokana ga tsona, ba tiponele ke mokane go [nyoko] fela ka lefase.” (Mat. 24:3, 7-14) Pawulo o hlayye gore “mo Morena a šele a segele,” go ko ba go le nako ya gore go tsusiwe Makreste ya go tlotsiwa ya gore “ma yetsele boroko bya likgu.”—1 Mathes. 4:14-16; 1 Makor. 15:23.

14. Bo ba gore ba tlotsiwwe, ba gore ba kgwa mo Jeso a šele a segele ba nyoko tlela ke tsa mošaga mang?

¹⁴ Bo ba gore ba tlotsiwwe, mo ba kgwa gana byalo ba tsusiwa ka go yakgoswa gore ba ye phela legedimong. Pawulo o napiye a šihlela taba yowa ga Makorente wa Mathomo 15:51, 52, mo a re: “A yi ka mokana ga rune bo re nyoko yetselang boroko bya likgu, mara ka mokana ga rune re nyoko tšhentšha, ka go yakgoswa, ka go ponya ga lihlo, mo go lla porompeta ya mafelelo.” Mantsu ya Pawulo ma kene maa makega gana byalo! Bo bhuti ba Kreste ba nyoko jabola stereka mo ba tsusiwa; ba boya ba ‘dula ba na le Morena.’—1 Mathes. 4:17.

15. Bo ba gore ba nyoko ba tšhentšha ka “go ponya ga lihlo” ba yemele ke mmereko wa mošaga mang?

¹⁵ Baebele yi re botsa gore ke mmereko wa mošaga mang wa gore wo nyoko maka ke bo ba gore ba nyoko ba tšhentšha “ka go ponya ga lihlo”  ku legedimong. Jeso o ba butsiye gore: “Ye a hlulang le go latelela tso ke di makang go segela mafelelong, ke nyoko mo neya matšhika ya go lawola ditšhaba, fote o nyoko disa batho a berekisa thoka ya tshipi la go šinya a ba psyitlanya go tshwana le sitša sa letsopa, go fo tshwana le mo Papa le nna a nneyye.”(Kut. 2:26, 27) Ba nyoko theetsela Ndhuna ya bona mo ba kene ba maka mmereko wone—ba disa ditšhaba ka thoka ya tshipi.—Kut. 19:11-15.

16. Batho ba go tlala ba nyoko hlula likgu ka mokgo mang?

¹⁶ Di fo ba lekgwaying gore bowa ba gore ba tlotsiwwe ba nyoko hlula likgu. (1 Makor. 15:54-57) Tsogo ya bona yi nyoko maka gore ba thogo tšhela letsogo gore ba tluse dilo tsa go befa lefaseng ka mokana ga lona ka ntwa ya Aremaghedoni. Dimiliyoni tsa Makreste ya banna le basadi di nyoko “tšwa ga motšhatšhamelo wo mogolo” ke mokane ba kena ga lefase la nyuwane. (Kut. 7:14) Bo ba phonneng ho lefaseng ba nyoko di bona ka maahlo mo likgu le hludiwa fote—mo go tsusiwa dibhiliyoni tsa batho bo ba kgwileng ku botala. Ye lune, a yi mojabolo, a yi mojabolo mo tsotsone di makega! (Meber. 24:15) Ka mokana ga bona bo ba tshepegang ga Jehova ba nyoko hlula likgu lo ba le yanngweng. Ba ko thogo phela go ya go yye.

17. Makorente wa Mathomo 15:58, yi re hlohletsela gore re make ying gana byalo?

¹⁷ Mokreste ye mongwana le ye mongwana di nyaka a tiyise ke mantsu ya Pawulo ya a ma ngwadiyeng ga Makorente ka taba ya tsogo. Di ya kwagala mo re yamogela mantsu ya Pawulo ya gore re dule re kenne fase re maka ‘mmereko wa Morena.’ (Bala 1 Makorente 15:58.) Mo re dula re maka so re ka se kgonang ga mmereko wowa, re ko ba re tithulela lešuba la gore le rune re kraye lephelo la go jabodisa la ku mahlong. Lephelo lone le phala dilo ka mokana ga tsona tso motho a ka di naganang. Di napa di šupetsa gabutši gore ne re sa berekele mahala ga Morena.