1. Ke leng mo di ka thathafang go berekela Jehova?

KE LENG mo o bonang nkare di thathafa ka matla go berekela Jehova—ke mo go na le tsa go go ghula kela ke mo dilo di go sepelela gabutši? Mo go na le tsa go re ghula, di lula go tisamela ka Jehova. Mara re maka ying mo dilo di re sepelela gabutši? Ayitsano re na le go lebala gore re tshwanele re berekele Modimo? Jehova o yye a pasopisa Maisrayele ka taba yonowa.—Dot. 6:10-12.

2. Kgoši Asa o re beyele mošupetso wa mošaga mang?

² Kgoši Asa ke mošupetso wa gabutši wa motho wa gore o hlalefiye ka taba la gore o yye a tisamela ka Jehova ka pelo yage ka mokana ga yona. Ke mo a berekela Jehova mo dilo di mo sepelela gabutši le mo di sa mo sepelele gabutši. Go tlugisela botala, “Asa ne a tineyele ga Jehova ka pelo yage ka mokana ga yona.” (1 Mag. 15:14.) Se sengwana so a se makiyeng go šupetsa gore o tineyele ga Jehova ke go tlosetsela borapedi bya medimo ya dithombhe ku Juda. Baebele yi re “o yye a tlosa dialetare tsa medimo ya matsaka le diwolo, a šilanya dikholomo tsa go hlawolega, a boya a ro kopetsela diphate tsa go hlawolega.” (2 Dikor. 14:3, 5) O yye a ro tlosa le mong kokwane wage wa mosadi ye ba reng ke Maakha setulong sage sa ka ntlong ya bogoši. Ke ntaba? Ka taba la gore sekgekolane sowa ne se kutšetsela batho gore ba rapele medimo ya dithombhe.—1 Mag. 15:11-13.

3. Re nyoko bolabola ka ying ga hlogotaba yowa?

³ Asa aa felela gana hone ga go tlosetsela medimo ya matsaka. Mara o yye a gelepa batho ba Juda gore ba boyele ba rapele Jehova fote. Jehova o yye a rufa Asa le Maisrayele ka go maka gore ba be ga seyemo sa go beba. * Ka lesome la mengwaga la mo go lawola  Asa, “go yye gwa kgiba ga poleke yone.” (2 Dikor. 14:1, 4, 6) Ga hlogotaba yowa, re nyoko petapeta ka dilo tso Asa a di makiyeng nakwela seyemo se sa kgibiye ka mokgonone. Ke mokane re nyoko bolabola ka Makreste ya ku botala ya gore le wona ma yye ma maka go tshwana le Asa, ma berekisa nako ya wona gabutši mo seyemo se sa bebiye. Re nyoko feleletsa ka go fetola putsiso ya gore: Ho yi le gore wene o dula ga poleke ya gore a ba rakele mmereko wa Dihlatse, o ka maka ying gore o berekise nako yone gabutši?

4. Dikoronika tsa Bobedi 14:2, 6, 7 yi re Asa o berekisiye byang nako ya mo go bebiye?

⁴ Bala 2 Dikoronika 14:2, 6, 7. Asa o butsiye batho gore ke Jehova ye a ba “neyyeng seyemo sa go beba nako ka moka.” Asa ne a sa tseye gore nako yowa ke ya go fo naama mawoto. Mara o yye a yaga ditoropo, mapharo, diwokamelo le digheyiti. O butsiye batho ba Juda gore: “Naga yowa go sa le ya rune.” Asa ke mo a ra gore king tsotsone? Ne a rela gore a go na manaba ya gore ne ma ka ba šitisa go maka mmereko wa go yaga hone ga poleke yone ya gore Modimo ke mo a ba neyye yona. O kgopele batho gore ba yi berekise gabutši nako ya mo go sa bebiye.

5. Ke ntaba Asa a yye a jimisa masole yage?

⁵ Se sengwana so Asa a se makiyeng nakwela go bebiye ke go jimisa masole yage. (2 Dikor. 14:8) Ayitsano sosone se rela gore ne a sa mo tshepe ga Jehova? Awwa. Asa ke mo go le Kgoši, byalo ne a di tšiba tsa gore ke mmereko wage gore a pasope batho mo ba ka fo kutulugela ke tse dingwana ku mahlong. Asa ne a di tšiba tsa gore le mo dilo di sepela gabutši hone Juda, go ka sa fo dula go le ka mokgonone, fote ke mo a resa.

6. Makreste ya ku botala ma makiye ying nakwela go sa bebiye?

⁶ Le mo Makreste ya ku botala ne ma dula ma hlorisiwa, dilo ne di na le go ma sepelela  gabutši. Ne ma maka ying mo go thulega mašuba ya mohlobo wonone? Makreste yawa ya go tshepega ne ma tšhomayela ditaba tsa go bafala ka mokgo ma ka kgonang ka gona. Taba yo yi leng ga Mebereko yi šupetsa gore “ne ma tšhaba Jehova.” A maa lesetsa go tšhomayela ditaba tsa go bafala, sosone se makiye gore ma ye “mahlong ma yeketsega.” Di fo ba lekgwaying gore Jehova o yye a ma rufa nakwela ma tšhomayela mo go sa kgibiye.—Meber. 9:26-31.

7-8. Pawulo le ba bangwana ba yye ba maka ying mo go thulega lešuba? Hlatolla.

⁷ Makreste ya ku botala ne ma berekisa lešuba le lengwana le le lengwana gore ma thogo sabalatsa ditaba tsa go bafala. Tla re fo beyisa ka taba ye nngwana ke yowa, nakwela Pawulo a di bona gore go bulegiye sekwalo se segolo hala Efeso, o yye a berekisa lešuba lone gore a thogo tšhomayela le go maka batho malata ga toropo yone.—1 Makor. 16:8, 9.

⁸ Pawulo le Makreste ya mangwana ba yye ba thulegela ke lešuba le lengwana ka 49 C.E. nakwela go lukisiwa taba ya go bollwa. (Meber. 15:23-29) Mo ba fetsa go botsa diphutego gore ba segelele sepheto sefeng, ba yye ba karakara ka matla gore ba thogo tšhomayela “ditaba tsa go bafala ka lentsu la Jehova.” (Meber. 15:30-35) Go yye gwa makega ying? Baebele yi re “diphutego di yye dya napa di ba le tumelo ya go tiya fote ka moka matšatši ke mo di ya mahlong di kene di yeketsega.”—Meber. 16:4, 5.

9. Go makega ying ga dipoleke tsa go tlala lekgono fote re ka tiputsisa diputsiso difeng?

⁹ Ga dipoleke tsa go tlala lekgono, re tšhomayela re lukulugiye. Ayitsano mo wene o dulang gona wa kgona go berekela Modimo o sa hlupi ke selo? Mo nkare go sone, tiputsise gore, ‘Ke yi berekisa byang nako yaka?’ Ka dinako tsowa tsa mafelelo tsa go jabodisa, mokgahlo wa Jehova wo kene wo maka gore mmereko wo mogolo wa go tšhomayela le go tšhutisa wo taboge ka lebelo le legolo ka mokgwa wa gore a sanka wa makega. (Mar. 13:10) Batho ba Jehova ba na le tsa go tlala tso ba ka di makang.

10. Thimothi wa Bobedi 4:2 yi re hlohletsela gore re make ying?

¹⁰ O ka maka ying mo dilo di sa na di go sepelela gabutši? (Bala 2 Thimothi 4:2.) Ke ntaba o sa lebelele seyemo sago ke mokane o tiputsise gore ayitsano wene kela ye mongwana hone mutšing wago kela wa genu a ka sa kgone go yeketsa nako yage ya go tšhomayela, nakwenngwana a be lephayona? Gana byalo a yi nako ya go hlekeletsa dilo tsa majabajaba—tsa gore re ka sa phone natso ka nako ya motšhatšhamelo wo mogolo.—Diy. 11:4; Mat. 6:31-33; 1 Joh. 2:15-17.

11. Ba bangwana ba makiye ying gore ba thogo segelela batho ba go tlala ba ba botse ditaba tsa go bafala?

¹¹ Batšhomayedi ba go tlala ba tšhutiye mmolabolo wo mongwana gore ba thogo tšhomayela le go tšhutisa ba bangwana. Mokgahlo wa Modimo wo ba thegeletsa ka go maka dikgatiso tsa gore ba tšhutise Baebele ka tsona ka mebolabolo ya go tlala. Mo re beyisa, dikgatiso tsa rune ka 2010 ne di krayega ka mebolabolo ya go teya gana hala ga 500. Lekgono, nombhoro yone yi teya ka ku ga 1 000!

12. Batho ba tikwa byang mo ba kwa ditaba tsa Mmušo wa Modimo ka mmolabolo wa bona? Beyisa.

¹² Batho ba tikwa byang mo ba kwa nnete ya Lentsu la Modimo ka mmolabolo wa bona? Tla re boneneng tso di hlayyeng ke mogageru wa mosadi wa gore o yye a ya ga mogahlano wo mogolo wa gore ne ba wo tshwarele ku Memphis, Tennessee, U.S.A. Mogahlano wowa ne ba wo tshwere ka Sekinyarwanda, mmolabolo wowa wo bolabodiwa ka matla Rwanda, Congo (Kinshasa) le Uganda. Ka nthago ga mogahlano, mogageru yewa wa mosadi wa go bolabola Sekinyarwanda o yitseri: “Ke na le 17 ya mengwaga ke rurele ho United States, mara ke ro thoma go kwisisa letheto la mogahlano ka mokana ga lona.” Di fo ba lekgwaying gore letheto la mogahlano wowa le tikisiye  mogageru yewa wa mosadi ka taba la gore ke mo le le ka segagabo. Mo nkare seyemo se ya dumela, ayitsano o ka di kgona go tšhuta mmolabolo wo mongwana gore o thogo gelepa ba bangwana tšhomong ya lune? Ayitsano ga tšhomo ya lune go na le batho ba gore ba tšebisa ke mmolabolo wa bona ke mokane ba thomisa go bolabola mebolabolo ye mengwana? Mo o ka karakara gore o ba bolabodise ka mmolabolo wa bona, o nyoko jabola stereka.

13. Magageru ya ku Russia ma makiye ying nakwela go sa bebiye?

¹³ A yi magageru ka mokana ga wona ya ma kgonang go tšhomayela ma sa šitisi ke selo. Ga dinaga tse dingwana, magageru a ma sa kgona go tšhomayela gabutši ka taba la gore memmušo yi rakela mmereko wa rune. Mo re beyisa, nagana ka magageru ya ku Russia. Ma yye ma hlorisiwa ka mengwaga ya go tlala mara ka March 1991, mmušo wo yye wa ma bulela. Ka nako yonone, ke mo go na le gana hala ga 16 000 ya batšhomayedi ku Russia. Ka nthago ga 20 ya mengwaga, nombhoro yela yi yye ya taka ya teya ka ku ga 160 000 ya batšhomayedi! Di fo ba lekgwaying gore magageru ma yye ma hlalefa nakwela go sa le mothebenene. Mara dilo a dya kgiba go segela kgole. Le mo seyemo sa bona se tšhentšhiye, a sanka ba šepisa go berekela Jehova. Ba ya mahlong ba maka so ba ka se kgonang go berekela Jehova.

14-15. Jehova o berekisiye matšhika yage ka mokgo mang gore a gelepe Asa?

¹⁴ Ka dinako tsa Asa, nako ya go beba yi yye ya fela. Go yye gwa tla masole ya go tlala ka matla—ya go teya ga miliyoni—ya gore ne ma tšwa Ithopiya. Zera wa gore ne a ba yetiye mahlong ne a fetsiye le pelo gore yene le masole yage ba nyoko suwelanya Juda. Mara Kgoši Asa ne a sa hlagasedisi ke nombhoro ya masole, ne a tshepele ga Modimo wage, Jehova. Asa o yye a rapela, a re: “Jehova Modimo wa rune, re gelepe barena, ka taba la gore re tshepele gago fote re nyoko lwa  le mogoba wowa re berekisa lebitso lago.”—2 Dikor. 14:11.

¹⁵ Masole ya Asa ne ma teya ka tlase ga hafo ya masole ya Maithopiya, mara Asa o yye a tshepa gore Jehova o na le matšhika fote o nyoko phonisa batho Bage. Jehova a sanka a mo tšebisa; ba yye ba hlula masole ya Maithopiya ma šala ma pawogiye.—2 Dikor. 14:8-13.

16. Re di tšibela kaye tsa gore go ka sa fo dula go bebiye?

¹⁶ A re nape re tšiba gore ye mongwana le ye mongwana wa rune o nyoko tlela king ku mahlong, mara so re se tšibang ke gore batho ba Modimo ba ka sa fo dula ba le ga seyemo sa go beba. Gabutšibutši, Jeso o hlayye gore ka dinako tsa mafelelo, malata yage ma nyoko “hloya ke ditšhaba ka mokana ga tsona.” (Mat. 24:9) Pawulo wa lepostola le yene o hlayye gore “ka mokana ga bona bo ba nyakang go dula ba tineyele ga Modimo ka go šala Kreste Jeso nthago, le bona ba nyoko hlorisiwa.” (2 Thim. 3:12) Sathane o “kwatiye ka matla” fote re ko ba re titshokanya mo re ka tipotsa gore rune a ka sa re kraye.—Kut. 12:12.

17. Tumelo ya rune yi ka leketsiwa byang?

¹⁷ Go se botala, ka mokana ga rune tumelo ya rune yi nyoko leketsiwa. Lefase le thina le go bona “motšhatšhamelo wo mogolo wa gore a sanka wa ba gona go tlugisela lefase le thoma go segela gana byalo.” (Mat. 24:21) Ka nako yone, bo re dulang nabo ka ho mutšing kela mašaga ya rune ba ka re jikela fote le mmereko wa rune ba ka wo rakela. (Mat. 10:35, 36) Ayitsano le wene o nyoko tshwana le Asa, ayitsano o ko di tshepeng tsa gore Jehova o nyoko go gelepa a boya a go pasopa?

18. Maheberu 10:38, 39 yi re re nyoko gelepa king mo nako ya go beba yi segela mafelelong?

¹⁸ Ke botala Jehova a kene a re lukiselela gore re be le tumelo ya go tiya gore re thogo teya re feta ga tso di nyoko re tlelang ku mahlong. Ke yene a yetetsang “lelata la go tshepega le la gore fote le hlalefiye” gore le re neye “tsa go ja ka nako ya gona” gore re thogo ya mahlong re kene re na le tumelo ya go tiya. (Mat. 24:45) Mara di nyaka le rune re karakare phela, di nyaka re make gore tumelo ya rune ga Jehova yi sa tekateki.—Bala Maheberu 10:38, 39.

19-20. Mo re bala 1 Dikoronika 28:9, di nyaka re tiputsise diputsiso difeng fote ke ntaba re tiputsisa tsona?

¹⁹ Tla re tseyeleneng ga Kgoši Asa, re “nyakane le Jehova.” (2 Dikor. 14:4; 15:1, 2) Mo re  tšhuta ka Jehova re boya re kolobetsiwa, ke setšha re thomisa go nyakana naye. Re berekisa lešuba le lengwana le le lengwana gore re thogo mamarela Jehova ka matla. Mo re nyaka go bona gore ayitsano re maka gabutši, di nyaka re tiputsise gore: ‘Ayitsano ke dula ke ya megahlanong ya phutego?’ Mo re ya ga megahlano yo mokgahlo wa Jehova wo re makeleng yona, magageru ma segela ma re tiyisa ke mokane ra tikwa re mamarele ka matla ga tso tsa Modimo. (Mat. 11:28) Fote re ka tiputsisa gore: ‘Ayitsano ke nalo letheto la gabutši la go tipalela Baebele?’ Mo nkare go na le bo o dulang nabo ka mutšing, ayitsano le tshwara morapelo wa mutši beke ye nngwana le ye nngwana? Le mo o dula o le ntoši, ayitsano o titshwarela morapelo wa mutši go tshwana le nkare o na le bo o dulang nabo? Ayitsano o maka so o ka se kgonang ga mmereko wa go tšhomayela le wa go maka batho malata?’

²⁰ Ke ntaba re tshwanele go tiputsisa diputsiso tsone? Baebele yi re botsa gore Jehova wa di kgona go nyakolla so se leng ka dipelong le ka menaganong ya rune, byalo le rune di nyaka re tinyakolle. (Bala 1 Dikoronika 28:9.) Mo re di bona gore nkare di nyaka re tšhentšhe ga dilo tsa go tshwana le tso re nyakang go di segelela, ka mokgo re titshwereng ka gona le ka mokgo re naganang ka gona, di nyaka re kgopele Jehova gore a re gelepe re tšhentšhe. Yowa ke nako ya go tilukiselela ga tsa go sasamela tso di nyoko re tlelang go se botala. O sa lesetse selo le ka ssoši se go phika mo o nyaka go šupetsa gore o hlalefiye mo go sa le mothebenene!