1, 2. (a) Mo Jeso a soko bane a kgwa, king so a se butsiyeng bo ba mo latelelang? (Lebelela sethombhe sa ka ho kgakala.) (b) Ke ntaba re tshwanele re dule re tigopotsa gore re tšhomayelela ying? (c) Re nyoko tšhuta ying?

BOŠEGO bya mafelelo bya mo Jeso a soko kgwa, o fetsiye nako ya go tlala a botsa mapostola ka mokg’o a ma nyakang ka matla ka gona. O yye a boya a ba tshwanisela le ka modhriva, wola re bolabodiyeng ka wona ga hlogotaba ya go fela. Mo Jeso a berekisa mošupetso wone, o yye a tiyisa bo ba mo latelelang gore “ba ye mahlong ba yengwa”—ba tiyisele mo ba kene ba tšhomayela molayetsa wa Mmušo.—Joh. 15:8.

² Mara Jeso a sanka a fo botsetsela bo ba mo latelelang gore ba make ying, o ba butsiye le gore ke ntaba ba tshwanele ba make ka mokg’onone. O ba hlatollele gore ke ying sa go maka gore ba tšhomayele. Ke ntaba re tshwanele re tseyele taba yone hlogong? Mo re sa lebale gore re maka king mo re tšhomayela, re nyoko kwa di re tšhofa go tiyisela re kene re “maka gore batho ba ditšhaba ka mokana ga tsona ba tiponele.” (Mat. 24:13, 14) Byalo tla re tšhuteneng ka dilo ka dine tso di tšwang ka ho Mangwalong tsa go šupetsa gore ke ntaba re tšhomayela. Go tlatsisa gana hone, re nyoko bolabola ka dilo ka dine tso Jehova a re neyyeng tsona tso di re gelepang go tiyisela mo re kene re yengwa diyengwa.

3. (a) Johane 15:8 yi re ke ntaba re tšhomayela? (b) Didhriva di tshwanisiwa le ying mo ga mošupetso wa Jeso, fote ke ntaba taba yone yi fore kwatla?

³ Se segolo ka matla sa go maka gore re tšhomayele ke ka taba la gore re nyaka go thanaka Jehova le go gadimisa lebitso lage bathong. (Bala Johane 15:1, 8.) Jeso ga Papage Jehova, o mo tshwanisiye le motho wa go lema wa go ba le sebaya sa didhriva. yene mong Jeso o titshwanisiye le modhriva, kela lehlaka, ke mokane bo ba mo latelelang a re ke makala. (Joh. 15:5) Didhriva tsowa di napa di tshwana gabutši le diyengwa tsa Mmušo tso di yengwang ke bo ba latelelang Jeso. Jeso o butsiye mapostola yage gore: “Mo le ya mahlong le yengwa, . . . Papa wa thanakiwa ka tsotsone.” Motho ye a gašiyeng modhriva wa jabola mo a bona o yengwa, le rune re thanakisa lebitso la Jehova mo re karakara ka matla re tšhomayela ditaba tsa Mmušo.—Mat. 25:20-23.

4. (a) Re gadimisa lebitso la Modimo mo re maka ying? (b) O tikwa byang mara mo le wene o le gana ho ga bo ba gadimisang lebitso la Modimo?

⁴ Mmereko wa rune wa go tšhomayela o maka byang gore lebitso la Modimo le hlawolege? Re ka sa di kgone go maka lebitso la Modimo gore le gadime go feta ka mokg’o le gadimang ka gona. Le na le le ka mokg’ononeng fote a le na ga gore gwa kgwelakgwehla. Mara theetsela gore moporofeta Jesaya o re king: “Jehova wa masole—ke yene a tshwaneleng go tseyiwa go le wa go hlawolega.” (Jes. 8:13) Re maka gore lebitso la Modimo le thanakiwe, le gore le hlawoge ga mabitso ya mangwana ka mokana ga wona fote re maka gore le batho ba bangwana ba le gadimise. (Mat. 6:9) Mo re botsa batho dinnete tse dibutši tsa go šupa gore Jehova o byang le ka dilo tso a nyakang go di makela batho, ka mokg’onone re yemelela lebitso lage ga Sathane wa matsaka le wa go lebela Modimo. (Gen. 3:1-5) Se sengwana ke gore mo re leketsa ka matla go šupetsa batho ku tšhomong gore Jehova “o tshwanele ke go gadimisiwa, go hlompiwa le matšhika,” ka mokg’onone re maka gore lebitso la Modimo le hlawolege. (Kut. 4:11) Mogageru ye mongwana ye ba reng ke Rune wa gore o phayonne 16 ya mongwaga o re: “Di ya njabodisa gore le nna ke hlatse ya motho ye mogolo ye a makiyeng dilo ka mokana ga tsona. Di maka gore ke kwe ke fo nabela go ya mahlong ke tšhomayela.”

5. (a) Johane 15:9, 10 yi re ke ntaba re tshwanele re tšhomayele? (b) Jeso o itseri king mo a kikitela taba ya gore go tiyisela gwa nyakega?

⁵ Bala Johane 15:9, 10. Ka gore Jehova le Jeso re ba nyaka ka matla, tsotsone di napa di re tšhofa gore re tlogamele re ye botsa batho ditaba tso tsa Mmušo. (Mar. 12:30; Joh. 14:15) Jeso o butsiye bo ba mo latelelang gore ba sa fo mo rata tsa nje, ba ‘dule ba mo rata’ tsa mannete. Ke ntaba? Ka taba la gore go dula o latelela Kreste mongwaga wo mongwana le wo mongwana, di nyaka o ro tiyisela. Jeso o yi beyye gabutši taba ya gore di nyaka re tiyisela mo a berekisa mantsu ya gore “le dule” ga tleletlele ga taba yowa ya gore yi ga Johane 15:4-10.

6. Re šupetsa ka ying gore re ya di nyaka go napa re ro dula leratong la Kreste?

⁶ Re šupetsa ka ying gore re nyaka go dula re rata ke Kreste fote re kene re mo jabodisa? Re tshwanele re latelele melawo yage. Mo re fo yi beya gabutši nje, Jeso o re ga rune, ‘Ntheetseleneng.’ Tso Jeso a kgopeleng gore re di make ke tso le yene a di makiyeng, yene mong o hlayye gore: “Ke latelele melawo ya Papa, sosone se maka gore a dule a nrata.” Tla re tseyeleneng ga Jeso.—Joh. 13:15.

7. Go theetsela le go rata di yelana byang?

⁷ Mo Jeso a šupetsa gore go theetsela le lerato di ya yelana, o butsiye mapostola yage gore: “Ye mongwana le ye mongwana ye a ntheetselang fote a maka tso ke mmotsang tsona, yenene ke yene a nratang tsa mannete.” (Joh. 14:21) Mo le rune re theetsela Jeso mo a re re ye tšhomayeleng, re šupetsa gore ga Modimo re ya mo nyaka ka taba la gore tso Jeso ke mo a re botsa tsona di šupetsa gore ke tso Papage a nyakang re di maka. (Mat. 17:5; Joh. 8:28) Jehova le Jeso ba nyoko dula ba re rata mo le rune re garagarela go ba šupetsa gore re ya ba rata.

8, 9. (a) Ke ying se sengwana so se makang gore re fo ya mahlong re tšhomayela? (b) Ke ntaba mantsu ya Jehova ho ga Hezekiyele 3:18, 19 le Hezekiyele 18:23 ma re tšhofa gore re sa lesetse go tšhomayela?

⁸ Go na le se sengwana so se makang gore re ye mahlong re tšhomayela. Re tšhomayela ka taba la gore re nyaka go yeletsana. Ka ho Baebeleng, Nnowa o hlatodiwa yi le “motšhomayedi.” (Bala 2 Petro 2:5.) Di šupa nkare mo a kene a tšhomayela nakwela go soko segela Mogogola, ke mo a ba yeletsa gore ba nyoko tla ba kgwa mo ba sa theetsele. Ke ntaba re reyane? Kwane gore Jeso o itseri king: “Ka mokg’onola ne ba le ka gona mo go soko segela Mogogola, ba tijela fote ba tinwela, banna ba nyala le basadi ba nyadiwa, gwa šinya go segela nako ya gore Nnowa a kene ka teng ga areka; ke mo go se na so ba se tseyelang hlogong gwa šinya go segela Mogogola, wa ba suwela ka mokana ga bona, le go ba gona ga Morwayi wa motho go nyoko fo ba ka mokg’onone.” (Mat. 24:38, 39) Batho ke mo ba sa yi kene yone ya Nnowa, mara o yye a fo ya mahlong a ba botsa ditaba tso a di kweleleng.

⁹ Le gana byalo re sa fo tšhomayela ditaba tso tsa Mmušo gore batho ba tšhute ka tso Modimo a nyoko ba makelang tsona. Le rune re tshwana le Jehova, re nabela gore batho bo re ba tšhomayelelang ba kwe ditaba tsowa gore ba thog’o ‘dula ba phela.’ (Hezek. 18:23) Se sengwana fote ke gore mo re tsama re tšhomayela ka mutši ka mutši le ga gore go feta-feta batho, re yeletsa batho ba go tlala ka mokg’o re ka kgonang gore Mmušo wa Modimo wo kene wa šutela fote o nyoko tla o tlosa batho bowa ba yisi felo ka Modimo.—Hezek. 3:18, 19; Dan. 2:44; Kut. 14:6, 7.

10. (a) Matewu 22:39 yi re ke ntaba re tshwanele re tšhomayele? (b) Šupetsa gore Pawulo le Silase ba yye ba gelepa matšinghelane wa ku Filipi byang.

¹⁰ Se sengwana se segolo so se makang gore re ye mahlong ka mmereko wa rune wa go tšhomayela ke sowa: Re tšhomayela ka taba la gore re rata bayagelani ba rune. (Mat. 22:39) Re tiyisela ga mmereko wowa ka taba la go tšhofa ke lerato, fote re ya di tšiba tsa gore batho ba bangwana ba ka sokologa mo ba bona gore tsa lephelo a di sa ba sepelela gabutši. Lebelela tso mopostola Pawulo le monghanage Silase ba yyeng ba gahlana natso. Ku Filipi ke mo go na le batho ba go ba phigisa, ba fetsa ba ba hlahlele jele. Ke mokane gare ga bošego, go yye gwa fo thomisa go tekateka mo fase ke mokane dikwalo tsa jele tsa yahlama. Matšinghelane wa jele o yye a tšhoga gore mabhantiti ma tšhabiye, ke mo go šele ka gonyana gore a tipolaye. Mara Pawulo o yye a mo yahlamela a re: “O sa tikwaletse!” Matšinghelane yewa o yye a butsisa a hlakahlakanne a re: “Barena ke make byang mara gore le nna ke tle ke phone?” Ba mmotsa gore: “Tshepela ga Morena Jeso, o nyoko phona.”—Meber. 16:25-34.

11, 12. (a) Taba yo yi makegeleng matšinghelane yela yi yelana byang le mmereko wa rune wa go tšhomayela? (b) Ke ntaba re nyaka go dula re krayega?

¹¹ Taba yo yi makegeleng matšinghelane yewa yi yelana byang le mmereko wa rune wa go tšhomayela? Lebelela taba ye nngwana ke yowa: Pelo ya matšinghelane yewa yi yye ya tšhentšha mo go šele go tekatekiye lefase. Go fo tshwana le ka batho ba lekgono ba gore tso tsa Baebele a ba di kene, mo go nyarela mathata ba ka kwa ba hlakahlakanne ba sa tšibi gore ba ka kena kakaye, ba ka feleletsa ba sokologa mo ba kwa ditaba tso. Mo re beyisa, ba bangwana mo tšhomong ya  rune o kraya ba felele ke mmereko ba sa di nagana, ba šala ba kgongwele ba sa tshepe. Ba bangwana go ka fo ba go se botala ba hlalanne, tsotsone di ka ba hlakahlakanya. Ba bangwana ba ka fo ba ba sa tšwa go di kwa gore ba kenne le bolwele byo bongwana bya go tshosa kela ba ka foba ba kwele go baba ka taba la gore ye mongwana gana hone mutšing o hlokofele. Mo go nyarela dilo tsa go tshwana le tsotsone, ba bangwana mo ba šele ba kwa go roba ba ka tiputsisa gore anthe lephelo lowa le bakiye kaye. Le bona o ka kraya ba tiputsisa gore, ‘Barena ke make byang mara gore le nna ke tle ke phone?’ Mo re hlakana le batho ba mošaga wonone, re ka makala go le la mathomothomo ba jabolela go theetsela ditaba tsowa tsa rune tsa go ba tshepisa tse dibutši.

¹² Byalo mo re ya mahlong ka mmereko wa rune wa go tšhomayela, re maka gore mo batho ba šele ba nyaka re ba kgomoletsa, ba re kraye ka bothina ka gore ba nyaka go re theetsela ka nako yonone. (Jes. 61:1) Sesi ye mongwana ye ba reng ke Charlotte wa gore o na le 38 ya mongwaga a le ga mmereko wowa wa nako ka moka, o itseri: “Batho lekgono ba letshwifing. Le bona baa di nyaka go kwa ditaba tsowa tsa go bafala.” Sesi ye mongwana le yene ba re ke Ejvor wa gore o fetsiye 34 ya mongwaga go le mošupatsela o re: “Tso di makegang lekgono di lelemetsa batho ba go tlala ka matla. Ke nyaka go ba thuša wa tšiba. Ke kwa di fo ntšhofa gore ke tšhomayele. Go rata bayagelani—yone ke taba ya go kwala yo yi makang gore ke sa lesetse go tšhomayela!

13, 14. (a) Ke ying so re neyiwweng sona so go bolabodiwweng ka sona mo ga Johane 15:11? (b) Le rune re ka jabola go tshwana le Jeso mo re maka ying? (c) Go jabola go kena kaye ga taba ya go tšhomayela?

¹³ Bošego bya mafelelo mo Jeso a soko kgwa, o yye a hlatollela mapostola yage gore ke dilo difeng tsa mohlobohlobo tso di ka ba gelepang gore ba tiyisele mo ba kene ba yengwa diyengwa. Dilo tsone ke difeng, fote di re gelepa ka ying?

¹⁴ Re neyiwwe mojabolo. Ayitsano di napa di ro roba go maka tso Jeso a itsering re di make tsa go tšhomayela? Le ka go nyana. Mo Jeso a fetsa go tshwanisa ka modhriva, o itseri rune bo re tšhomayelang ditaba tso tsa Mmušo re nyoko jabola. (Bala Johane 15:11.) Gabutšibutši o ro boya a re tshepisa le gore ka mokg’o a jabodiyeng ka gona, le rune re nyoko ba sone. Anthe o ra byang tsetseni? Re šele re hlayye gore Jeso yene o titshwanisiye le modhriva ke mokane bo ba mo latelelang a ba tshwanisa le makala ya gona. Modhriva wo thegana le makala. Mo makala ma sa mamarelanne le modhriva wone, ma kraya meetši ya go lekanela le tse dingwana gana hone modhriveng. Le rune mo re ka fo dula re mamarelanne le Kreste, ra latelela mo a gatiyeng, re nyoko jabola go tshwana naye ka mokg’o a jabolelang go maka so Papage a se nyakang. (Joh. 4:34; 17:13; 1 Pet. 2:21) Mosadi ye mongwana ye ba reng ke Hanne wa gore o phayonne 40 ya mongwaga, o re, “Ka mokg’o ke jabolang mo ke tšwa tšhomong, sosone se nama se maka gore ke nabele go ya mahlong ke berekela Jehova.” Mo re jabodiye tsa mannete, re ba le matšhika ya go ya mahlong re tšhomayela le ga tšhomo ya go thatafa kela ya go tshwatisa.—Mat. 5:10-12.

15. (a) King so re neyiwweng sona so go bolabodiwweng ka sona mo ga Johane 14:27? (b) Ke ntaba go beba go re gelepa gore re ye mahlong re yengwa diyengwa?

¹⁵ Re neyiwwe sa go re khutsisa. (Bala Johane 14:27.) Mo go sa le ka malobana ga gore Jeso ke mo a nyoko kgwa ka motshwana wa gona, o botsa bo ba mo latelelang a re: “Ke le neya go khutsa gaka.” Sona selo sone—go khutsa gage—se re gelepa byang gore re yengwe diyengwa? Mo re kene re tiyisela, re kwa dipelo tsa rune di bebiye go ya go yye ka taba la gore re ya di tšiba gore re jabodisa Jehova le Jeso. (Pis. 149:4; Maroma 5:3, 4; Makol. 3:15) Mogageru ye ba reng ke Ulf wa go fetsa 45 ya mongwaga a le mmerekong wowa wa nako ka moka o re, “Mo ke ya tšhomong ke boya ke tennwe, mara mo ke tšwa gona ke fo kwa pelo yo yaka yi itseri tswee fote ke ya di tšiba gore ke phelela ying.” Re leboga ka  matla gore re neyiwwe selo so se makang gore re bebe go ya go yye!

16. (a) Ke ying so re neyiwweng sona so go bolabodiwweng ka sona ho ga Johane 15:15? (b) Mapostola ya Jeso ke mo ma nyoko dula ma na le senghana naye ka mokg’o mang?

¹⁶ Re neyiwwe sa gore re thog’o ba le banghana. Mo Jeso a šele a fetsiye go kgopelela mapostola yage gore nkare mojabolo wa bona wo ka “tlala tswi,” o ba hlatollele gore ba tseyele hlogong taba ya go ratanana tsa gore ba ka kgwelana. (Joh. 15:11-13) Mo a fetsa go reyane a re: “Ke itseri ke lune banghana baka.” Taba yone ke ye kgolo ka matla—go ba monghana wa Jeso! Mapostola ke mo ma tshwanele ma make ying gore ma dule ma le banghana ba Jeso? Ke mo di fo nyaka gore ‘ba ye fote ba sa lesetse go yengwa.’ (Bala Johane 15:14-16.) Mo go sa šele mongwaga ka mmedi, Jeso o yye a layeletsa bo ba mo latelelang a re: “Mo le kene le ya, le tšhomayeleneng, le re: ‘Mmušo wa magedimo wo šele wo le thina.’” (Mat. 10:7) Ka malobana yanane ya mafelelo, o ba butsiye gatleletlele gore ba tiyisele ga mmereko wowa ba wo thomisiyeng. (Mat. 24:13; Mar. 3:14) Ke mo di se lola tsa gore ba make tso Jeso a ba butsiyeng tsona, mara ke mo ba nyoko phomelela ho ba ka di maka—ke mokane senghana sage nabo sa sa šehle. Ka mokg’o mang? Ke mo ba nyoko gelepa ke se sengwana fote sa gore o ba neyye sona.

17, 18. (a) King so re neyiwweng sona so go bolabodiwweng ka sona ho ga Johane 15:16? (b) Selo sone ke mo se nyoko ma gelepa ka ying ga malata ya Jeso? (c) Ke difeng dilo tso re neyiwweng tsona tsa go maka gore re be le matšhika lekgono?

¹⁷ Go fetodiwa mo re rapela ke selo so re neyiwweng sona. Jeso o itseri: “Papa o nyoko le neya se sengwana le se sengwana so le se kgopelang, solanka le se kgopela ka lebitso laka.” (Joh. 15:16) Taba yowa ga malata ya Jeso a ya ma tiyisa lona! * Bona ke mo ba sa nape ba yi tshwara gabutši taba yone ya gore ye a ba yetang mahlong o thina le go kgwa, mara ke mo ba ka sa šale ba ntoši. Jehova ke mo a nyoko ba fetola mo ba mo rapela ba kgopela gore a ba gelepe mo ba kene ba tšhomayela ka tsa Mmušo. Go f’lo ba ka mokg’onone, ba yye ba di bona gore Jehova o ba fetodiye mo ba kgopela thušo gage.—Meber. 4:29, 31.

¹⁸ Go sa fo tshwana le lekgono. Mo re yengwa, re tikwisa ka go ba banghana ba Jeso. Se sengwana ke gore a re kanakane gore Jehova o nyoko re fetola mo re rapela, mo re kene re bolabola ka ditaba tsa go bafala tsa Mmušo ku tšhomong le mo go na le tsa go re phiriketsa. (Mafil. 4:13) Di natefa ka matla mo merapelo ya rune yi fetodiwa ka thoko re kene re le banghana ba Jeso! Dilo tsowa tsa gore re di neya ke Jehova di maka gore re be le matšhika fote re ye mahlong re yengwa.—Jak. 1:17.

19. (a) Ke ntaba re sa lesetse go tšhomayela? (b) Re gelepa king gore re thog’o fetsisela mmereko wa Modimo?

¹⁹ Mo ga hlogotaba yowa, re bolabodiye gore a re lesetse go tšhomayela gore re thog’o thanakisa Jehova le go gadimisa lebitso lage, re šupetse gore ga Jehova le Jeso re ba nyaka ka matla, re yeletsa batho le go šupetsa gore re rata bayagelani. Go tokegela gana hone, re kwa re na le matšhika ya go tlogamela gore re ye fetsisela mmereko wa Modimo ka taba la gore o re neyye mojabolo, go beba, senghana le Jeso fote o fetola merapelo ya rune. Nnete Jehova o nyoko jabola ho a re lebelele mo re kene re karakara di re baba gore ‘re ye mahlong re yengwa ka matla’!