Monna yo mongwe yo a bego etšwa nageng ya Eritrea, o ile a hudugela nageng ya Norway go thoma ka 2011. Ge Dihlatse tša Jehofa tše dingwe di be di boledišana le yena, o ile a di botša gore o be a fela a bona Dihlatse kua nageng ya gabo. O ile a di botša gape gore ge a be a tsenetše bošole gona kua ga gabo, o ile a bona Dihlatse tša Jehofa tše dingwe tšeo di bego di golegilwe ka baka la tumelo ya tšona. Dihlatse tšeo di ile tša gana go tsenela bošole le ge di be di gapeletšwa go dira seo gomme batho ba bangwe ba be ba di tlaiša le go di swara gampe.

 Go na le selo seo se ilego sa direga kapejana seo se ilego sa dira gore monna yoo le yena a golegwe. Ge a fihla kgolegong, o hweditše Dihlatse tša Jehofa tše dingwe tše tharo tšeo di bego di swaretšwe ditumelo tša tšona go tloga ka 1994. Dihlatse tšeo ke Paulos Eyasu, Negede Teklemariam le Isaac Mogos.

 Ge monna yo a be a le kgolegong kua Eritrea, o ile a iponela ka mahlo gore Dihlatse tša Jehofa di diriša seo di se rutago. O ile a bona gore Dihlatse tša Jehofa di be di botega le gore di be di abelana le bagolegwa ba bangwe dijo tša tšona. O ile a bona le kamoo banna ba ba Dihlatse tša Jehofa ba bego ba ithuta Beibele ba le mmogo letšatši le lengwe le le lengwe e bile ba mema ba bangwe gore ba tlo ithuta le bona. Ba be ba ka lokollwa kgolegong ge feela ba ka saena dipampiri tša go bontšha gore ga e sa le Dihlatse tša Jehofa. Eupša ba ile ba gana go saena dipampiri tšeo.

 Ruri monna yo o ile a kgahlwa ke bana babo rena bao ba bararo! Ka morago ga gore a hudugele nageng ya Norway o be a nyaka go tseba gore ke ka baka la eng Dihlatse tša Jehofa di na le tumelo e tiilego ka tsela ye. Ka baka leo o ile a se senye nako ge a kopana le Dihlatse tša Jehofa gomme a thoma go swarelwa thuto ya Beibele le go ya dibokeng.

 Ka September 2018, o ile a kolobetšwa gore e be yo mongwe wa Dihlatse tša Jehofa. Ga bjale o diriša sebaka se sengwe le se sengwe go boledišana le batho ba nageng ya Eritrea le Sudan, a ba kgothaletša gore ba ithute Beibele le Dihlatse tša Jehofa e le gore ba kgone go ba le tumelo.