Marta yo e lego yo mongwe wa Dihlatse tša Jehofa yoo a dulago Guatemala, o ithuta leleme la Sekekchi gore a kgone go botša batho bao ba bolelago leleme leo ditaba tše dibotse. Ka letšatši le lengwe o ile a bona monna yoo a bego a etšwa ka sepetlele. Ke moka o ile a bona eka monna yoo o tšwa motseng wa batho bao ba bolelago Sekekchi woo o lego tikologong ya dithabeng moo Dihlatse tša Jehofa di sa kgonego go fihla gabonolo. O ile a ya go yena gomme a bolela le yena ka Sekekchi seo a bego a sa se tsebe gabotse.

 Marta o ile a kgopela monna yoo gore a tle a thome go ithuta Beibele le yena. Monna yoo ga se a ka a ba le bothata, eupša o ile a botša Marta gore ga a na tšhelete ya go mo patela. Ke moka Marta a mmotša gore Dihlatse tša Jehofa di ruta batho Beibele mahala. O ile a mmotša le gore o tla ithuta Beibele le yena a diriša founo le gore a ka mema le lapa la gagwe gore le lona le tle le ithute le bona. Monna yoo o ile a dumela. Ka ge a be a kgona go bolela Sepaniši le go se bala, Marta o ile a mo fa Beibele ya Phetolelo ya Lefase le Lefsa ya Mangwalo ya Makgethwa ya leleme leo. O ile a mo fa le puku ya Sekekchi ya Ke Eng Seo ge e le Gabotse Beibele e se Rutago? gore ba tle ba kgone go diriša yona ge ba ithuta Beibele. Bekeng e latelago, monna yoo le mosadi wa gagwe go akaretša le bana ba bona ba babedi ba ile ba thoma go ithuta Beibele le Marta ka founo. Le gona ba be ba ithuta gabedi ka beke. Marta o re: “Ka ge ke be ke sa tsebe Sekekchi gabotse, ke be ke ithuta le bona ka Sepaniši gomme monna yo a tolokela mosadi wa gagwe. Bana ba bona ba be ba kwešiša Sepaniši.”

 Monna yoo e be e le moruti kerekeng ya gagwe. O ile a thoma go ruta batho bao ba bego ba tsena kereke ya gagwe seo a bego a ithuta sona ka Beibeleng. Ba ile ba kgahlwa ke seo a bego a ba ruta gomme ba mmotšiša gore o ithutile kae dithuto tšeo. O ile a ba botša gore go na le motho yo a ithutago le yena Beibele, gomme ba thoma go ba gona ge a ithuta Beibele. E se kgale, batho ba e ka bago ba 15 ba be ba e ba gona beke e nngwe le e nngwe go ithuta Beibele ka founo. Ge nako e dutše e eya, ba ile ba bea maekrofouno kgauswi le founo e le gore batho ka moka ba kgone go kwa.

 Ka morago ga gore Marta a botše bagolo ba phuthego ka thuto yeo ya gagwe ya Beibele, yo mongwe wa bona o ile a etela motseng woo barutwana ba bego ba dula go ona. Mogolo yoo o ile a ba mema gore ba tle ba theetše polelo ya Beibele ge molebeledi wa tikologo a a tlile. Ba be ba tlo swanelwa ke go sepela ka koloi iri, ke moka ka morago ga moo ba sepele ka maoto diiri tše pedi gore ba kgone go fihla moo. Barutwana bao ba ile ba dumela gomme ba 17 ba bona ba ba gona.

 Ka morago ga dibekenyana, molebeledi wa tikologo le Dihlatse tša Jehofa tše dingwe ba ile ba fetša matšatši a mane ba etetše barutwana bao ba Beibele. Mesong ba be ba bogela dibidio tše di theilwego Beibeleng tšeo di lego go jw.org tša Sekekchi ke moka ba ithuta poroutšha ya, Ke Bomang Bao ba Dirago Thato ya Jehofa Lehono? Ke moka thapama ba be ba bogela dikarolo tše dingwe tša Kgašo ya JW. Molebeledi wa tikologo o ile a rulaganya gore yo mongwe le yo mongwe wa barutwana ba, a be le motho yo a ithutago le yena Beibele.

 Matšatšing ao a mane, Dihlatse tša Jehofa tše dingwe di ile tša ya metseng yeo e lego kgauswi le moo di bego di ile gona gore di yo botša batho ba moo ditaba tše dibotse gomme di ile tša ba mema le gore ba tle sebokeng seo se kgethegilego. Dihlatse tšeo tša Jehofa di ile tša kgopela batho ba 47 bao ba bego ba tlile sebokeng seo gore ba ithute Beibele. Malapa a 11 a ile a dumela.

 Ka morago ga dikgwedinyana, bagolo ba ile ba rulaganya gore go be le diboka mafelobeke a mangwe le a mangwe motseng woo. Lehono batho ba e ka bago ba 40 ba tla dibokeng ka mehla. Le gona ge Dihlatse tša Jehofa di be di rulaganya gore go swarwe Segopotšo sa lehu la Jesu moo, go ile gwa tla batho ba 91.

 Ge Marta a gopola kamoo taba ye re boletšego ka yona mo e thomilego ka gona le go tšwela pele, o re: “Ke leboga Jehofa kudu. Ka dinako tše dingwe ke ikwa eka ga ke kgone go hlankela Jehofa kamoo ke nyakago, eupša Modimo a ka re diriša go thuša ba bangwe. O be a tseba seo se lego ka dipelong tša batho ba metseng yeo gomme o ile a ba gogela go yena. Jehofa o a ba rata.”