Dihlatse tša Jehofa di dula di hwetša tlwaetšo bjalo ka Bakriste, yeo e akaretšago tirelo ya bona. Tirelo ye ke mošomo wo Jesu a laetšego barutiwa ba gagwe gore ba o dire elego go ruta le go bolela ditaba tše dibotse tša mmušo wa Modimo. (Mateo 24:14; 28:19, 20) Re hwetša tlwaetšo ye dibokeng tša rena tša beke le beke le dikopanong tša rena tša ngwaga le ngwaga tše dikgolo le tše dinyenyane. Dihlatse tša Jehofa tšeo di nago le maikarabelo ka phuthegong goba ka mokgatlong, ba hwetša tlwaetšo e oketšegilego dikolong tše kgethegilego tša Beibele.

Sehlogong se

•  Dihlatse tša Jehofa di hwetša tlwaetšo efe?

•  Dikolo tša Beibele tša Dihlatse tša Jehofa

•  Tlwaetšo yeo e newago Dihlatse e theilwe go eng?

•  Na Dihlatse tša Jehofa di a patela go hwetša tlwaetšo ye?

•  Dihlatse tša Jehofa di hotšwe bjang ke tlwaetšo yeo ba e hwetšago?

 Diboka tša phuthego. Beke e nngwe le e nngwe, re bokana gabedi mafelong a rena a borapedi ao a bitšwago Diholo tša Mmušo. Gantšhi seboka se sengwe se ba gona gare ga beke mola se sengwe se eba gona mafelo bekeng. Go ka tla mang le mang gomme ga go tšewe dikoleke.

•   Seboka sa gare ga beke. Re ithuta go kaonefatša tsela yeo re balago ka yona, go thoma dipoledišano, go ruta le go bolela phatlalatša. Re hwetša tlwaetšo ye ka dipolelo, dipoledišano, dipontšho le dibidio .Tlwaetšo ye e re thuša gore re kgone go bolela ka molaetša wa Beibele le go swara dithuto tša Beibele go bao ba bontšhago kgahlego. Bohle bao ba lego sebokeng se ba holwa kudu ke tlwaetšo ye. Godimo ga se, diboka di tiiša tumelo ya rena go Modimo le tsela yeo re mo ratago ka yona gotee le bana ba borena.

•   Seboka sa mafelo beke Seboka se se na le dikarolo tše pedi, karolo ya mathomo ke polelo yeo e theilwego Beibeleng yeo e reretšwego batho ka moka. Karolo ya bobedi ya seboka se ke thuto ya Morokami yeo e nago le dipotšišo le dikarabo. a Dihlogo tšeo di lego ka kgatišong yeo di bolela ka ditaba tšeo di lego ka gare ga Beibele le melao ya metheo yeo e ka re thušago bodireding bja rena le bophelong bja rena bja letšatši le letšatši.

 Dikopano tša tikologo le tša selete. Ngwaga o mongwe le o mongwe re ba le dikopano tše tharo tše dikgolo tšeo diphuthego tše dintšhi di yago go tšona. Dikopanong tše tšeo di thabišago go ahlaahlwa sehlogo seo se theilwego Beibeleng. Go na le dipolelo, diswantšho, dipoledišano le dibidio. Go swana le diboka tša rena tša phuthego dikopano tša rena tša tikologo le tša selete di re thuša go oketša tsebo yeo re nago le yona ya Beibele di re thuša le go kaonefatša tsela yeo re rutago ka yona ditaba tše dibotse. Kamoo go swanago bohle ba laletšwa go ba gona, gomme ga go tšewe dikoleke.

 Ba bangwe ba Dihlatse tša Jehofa ba laletšwa go ya dikolong tša Beibele tše di fapafapanego e le gore ba hwetše tlwaetšo yeo e oketšegilego. Dikolo tšeo ke dife? Morero wa tšona ke eng? Ebile di tšea nako e kaakang?

Sekolo sa tirelo sa bobulamadibogo

•   Morero: Go tlwaetša babulamadibogo ba ka mehla go bolela le go ruta. b Seboka se se akaretša dipoledišano tša ka klaseng, diswantšho, dipolelo le tše dingwe.

•   Nako: Matšatši a tshela.

•   Bao ba yago: Bao ba feditšego ngwaga e le babulamadibogo ba ka mehla, ba laletšwa go ba gona. Babulamadibogo bao ba bilego gona sebokeng se mengwaga e mehlano e fetilego le bona ba laletšwa go ba gona gape sekolong se.

Sekolo sa Baebangedi ba Mmušo

•   Morero: Go nea bao ba lego tirelong ya nako e tletšego tlwaetšo e kgethegilego. Barutwana ba kaonefatša tsela yeo ba bolelago le go ruta ka yona, ebile ba ithuta dikarolo tša Beibele ka mo go tseneletšego. Bao ba alogago sekolong se ba laletšwa go ya mo go nago le tlhokagalo ya baebangedi.

•   Nako: Dikgwedi tše pedi.

•   Bao ba yago: Babulamadibogo ba ka ngwadiša go ya sekolong se ge eba ba swanelega ebile maemo a bona a ba dumelela go hlankela mo go nago le tlhokagalo.

Sekolo sa Bagolo ba Phuthego

•   Morero: Go thuša bagolo gore ba phethe maikarabelo a bona ka phuthegong elego go ruta le go diša gotee le go tiiša tsela yeo ba ratago Modimo le badumedigotee le bona.—1 Petro 5:2, 3.

•   Nako: Matšatši a mahlano.

•   Bao ba yago: Bagolo bao ba sa tšwago go kgethwa le bagolo bao ba ilego sekolong seo mengwaga e mehlano e fetilego, le bona ba laletšwa go ya.

Sekolo sa Balebeledi ba Tikologo le Basadi ba Bona

•   Morero: Go tlwaetša bahlanka ba basepedi bao ba bitšwago balebeledi ba tikologo, c go phetha maikarabelo a bona ka mo go feletšego. (1 Timotheo 5:17) Tlwaetšo yeo ba e hwetšago e thuša banna ba ba Bakriste le basadi ba bona go hwetša kwešišo e oketšegilego ya Mangwalo.

•   Nako: Kgwedi.

•   Bao ba yago: Balebeledi ba tikologo bao ba sa tšwago go kgethwa le basadi ba bona ba laletšwa go ya sekolong se ka morago ga go fetša ngwaga ba le kabelong ya bona. Ka morago ga moo ba laletšwa gore ba ye gape ka morago ga mengwaga e mehlano.

Sekolo sa Bodiredi sa Mmušo

•   Morero: Go thuša bagolo le bahlanka ba bodiredi d go phetha maikarabelo a bona ka phuthegong ba lebeletše dilo tšeo di diregago gona bjale le dinyakwa tša phuthego.. (2 Timotheo 3:1) Sekolo se se swarwa ga mmalwa mo megwageng.

•   Nako: Se a fapafapana, gantšhi se swarwa letšatši le tee.

•   Bao ba yago Balebeledi ba tikologo, bagolo le bahlanka ba bodiredi.

Sekolo sa Tirelo sa Bethele

•   Morero: Go thuša ditho tša Bethele e go phetha mošomo wa bona gabotse le go tiiša tsela yeo ba ratago Modimo ka yona le bana ba bobona.

•   Nako: Matšatši a mahlano le seripa.

•   Bao ba yago: Ditho tše diswa tša Bethele di swanetše go ya sekolong se. Bao elego kgale ba hlankela Bethele ebile ba na le mengwaga e mehlano ba ile sekolong se, ba ka laletšwa gape.

Sekolo sa Beibele sa Watchtower sa Gilead

•   Morero: Go thuša barutwana go hlagolela lerato leo le tseneletšego la Beibele le go diriša seo ba ithutago sona. (1 Bathesalonika 2:13) Banna ba Bakriste le basadi bao ba gotšego moyeng bao ba lego sekolong se ba kgona go thuša ka mokgatlong wa Jehofa le mošomong wa go ruta Beibele lefaseng ka moka. Bao ba alogago sekolong se ba ka abelwa go ya tšhemong goba ofising ya lekala nageng ya gabo bona goba e nngwe.

•   Nako: Dikgwedi tše hlano.

•   Bao ba yago: Diofisi tša makala di laletša bao ba lego tirelong ya nako e tletšego gore ba ngwadiše go ya sekolong se. Sekolo se se swarelwa United States kua Watchtower Educational Center ya Patterson, New York.

Sekolo sa Ditho tša Komiti ya Lekala le Basadi ba Bona

•   Morero: Go tlwaetša ditho tša Komiti ya Lekala f go hlokomela mošomo wo o dirwago ofising ya lekala le mešomo yeo e dirwago ke Dihlatse tša Jehofa dinageng tšeo di hlokomelwago ke lekala.

•   Nako: Dikgwedi tše pedi.

•   Bao ba yago: Ntlokgolo ya Dihlatse tša Jehofa e laletša ditho tša Komiti ya Lekala le basadi ba bona sekolong se, seo se swarelwago Watchtower Educational Center ya Patterson, New York.

 Dihlatse tša Jehofa di diriša Beibele bakeng sa tlwaetšo yeo ba e hwetšago. Re dumela gore Beibele e buduletšwe ke Modimo ebile e hlahla Bakriste gore ba phele bjang.2 Timotheo 3:16, 17.

 Aowa. Ba hwetša tlhahlo ye mahala. Mešomo yeo e dirwago ke Dihlatse tša Jehofa e thekgwa ka meneelo ya boithatelo.—2 Bakorinthe 9:7.