Tikologong e kgolo ya Finland, Norway le Sweden, go dula Masaami. Masaami a na le setšo sa ona, meetlo ya ona le maleme ao a fapafapanego. Dihlatse tša Jehofa di ile tša dira dilo tše pedi gore di kgone go botša Masaami molaetša wa Beibele.

Sa pele, ka lehlabula la 2015, Dihlatse tša Jehofa di ile tša thoma go gatiša dikgatišo tša Beibele le dibidio ka Sesaami. a Sa bobedi, nakong ya masolo a mabedi ao a kgethegilego ka 2016 le 2017, Dihlatse tša Jehofa di ile tša ya Lapland gore di yo ruta Masaami molaetša wa Beibele woo o fetoletšwego ka Sesaami. Lefelo leo le kgojana e bile le tletše mehlape ya dikgama.

Ka lesolo leo le kgethegilego la May 2017, Dihlatse tša Jehofa tšeo di fetago 200 tšeo di tšwago Finland, Norway le Sweden di ile tša ithaopela go ya metsaneng yeo e lego kgole le kgole kua Lapland. Dihlatse tše dingwe tša Jehofa di ile tša itokišeletša lesolo leo ka go ithuta mantšu a Sesaami. Seo se ile sa thabiša Masaami. Denis, yoo a ilego a ithaopela go yo bolela ditaba tše dibotse motsaneng wa Karigasniemi, o re: “Batho ba moo ba ile ba thabela maiteko a rena a go bolela ka leleme la bona ba ba ba lemoga gore re tshwenyegile ka bona.”

Ka ge Masaami a rata tlhago le diphoofolo, a ile a kgahlwa kudu ke go kwa gore Beibele e re tshepiša gore lefase e tlo ba paradeise. (Psalme 37:11) Ka mohlala, ge mosadi yo mongwe wa Mosaami a be a thoma go ithuta Beibele le Dihlatse tša Jehofa ba diriša poroutšha ya Ditaba tše Dibotse tše di Tšwago go Modimo! gomme a ithuta seo Modimo a tlago go se direla batho, o ile a kgotsa gore ke ka baka la’ng moruti wa bona a sa ka a ba ruta gore lefase e tlo ba paradeise.

Ba bantši ba bona ba ile ba leboga gore Dihlatse tša Jehofa di ba etetše. Mong wa lebenkele yo mongwe o ile a reta Dihlatse tša Jehofa tše pedi tšeo a di bonego. O ile a ba botša gore ba dira “mošomo o mobotse le o bohlokwa setšhabeng,” ke moka a re ba tsene ka lebenkeleng la gagwe ba itšeele dijo tšeo ba di nyakago yena o tla di patela.

Lesolong leo, Dihlatse tša Jehofa di ile tša bontšha Masaami dibidio tše e ka bago tše 180 le go ba fa dikgatišo tša ka godimo ga tše 500. Gantši Masaami a be a kgopela kgatišo e nngwe le e nngwe yeo e bego e le gona ka leleme la bona. Go oketša moo, Masaami a 14 a ile a thoma go ithuta Beibele le Dihlatse tša Jehofa.

Masaami a mmalwa ao a ilego a bala dikgatišo tša Dihlatse tša Jehofa a ile a reta tsela yeo dikgatišo tšeo di fetoletšwego ka bokgwari ka yona. Ge Nilla Tapiola, yoo e lego morutiši e bile e le moemedi wa sehlopha sa Masaami a bolela ka dikgatišo tšeo, o itše: “Dikgatišo tša lena di fetoletšwe gabotse kudu, di balega ga bonolo e bile di a kwešišega.” Monna yo mongwe wa Mosaami yoo a dulago karolong ya leboa ya Finland o ile a phetha ka gore: “Dikgatišo tše di fetoletšwe ka bokgwari kudu.”

Kua Karigasniemi, mollwaneng wa Finland le Norway, Dihlatse tša Jehofa di ile tša boledišana le morutiši yo mongwe wa Mosaami ka Beibele gomme tša bala le yena thuto ya pele ya poroutšha ya Ditaba tše Dibotse tše di Tšwago go Modimo! Morutiši yoo o ile a kgahlwa ke tsela yeo poroutšha yeo e fetoletšwego ka yona gomme a kgopela tumelelo go Dihlatse tša Jehofa gore a diriše poroutšha yeo sekolong go ruta barutwana polelo ya Sesaami.

Dihlatse tša Jehofa di ile tša fetolela dibidio le dipampišana tše mmalwa le poroutšha e tee ka Sesaami. Wepesaete ya jw.org e ile ya thoma go ba gona ka Sesaami go tloga ka di-29 tša February 2016. Kgwedi e nngwe le e nngwe, batho bao ba bolelago Sesaami ba tsena wepesaeteng yeo ka makga a ka godimo ga a 400 gomme ba taonelouta dikgatišo tša elektroniki tše e ka bago tše 350 go akaretša le tša go theetšwa le dibidio.

Lesolo leo le ile la hola Masaami gotee le Dihlatse tša Jehofa tšeo di ilego tša ithaopela go etela Masaami ao. Henrick le Hilja-Maria bao ba bego ba ile lesolong leo motsaneng wa Utsjoki, ba ile ba lemoga gore batho ba moo ba be ba bona gore Beibele e ba thuša ka ditsela tše dintši. Lauri le Inga bao le bona ba ilego ba ya motsaneng wa Utsjoki, ba ile ba tlaleletša ka gore: “Lesolo leo le ile la re gopotša gore Modimo ga a na kgethollo. Re thabela go bontšha batho bao ba lego dinageng tša kgole gore Modimo o a ba rata.”