Dihlatse tša Jehofa * di ile tša ingwadiša gore e be bodumedi bjo bo tsebjago ka molao la mathomo toropong ya Baku ka 1999 gomme tša ingwadiša gape ka 2002. Mengwageng e latetšego, Dihlatse di ile tša ba le tokologo ya bodumedi eupša mmušo o dula o di lebetše, gomme ka dinako tše dingwe maphodisa a be a šwahlela diboka tša tšona e bile mmušo o lekodišiša dipuku tša tšona. Ka morago ga go dira diphetogo melaong ya bodumedi, mmušo * o ile wa gana kgopelo ya Dihlatse ya go ingwadiša gape ka 2010 ka mabaka a go se kwagale, ka gona se se ile sa dira gore Dihlatse tša Jehofa toropong ya Baku di se ngwadišwe semmušo.

Dihlatse tša Jehofa di tšwela pele go tlaišwa le go thibelwa ga mediro ya tšona ka ge mmušo o laola mediro ya bodumedi. Maphodisa a ile a phuruphutša magae a mangwe a Dihlatse le go tšea dithoto tše dingwe tša tšona go akaretša le Dibeibele. Maphodisa a tšwela pele go golega le go bona Dihlatse tše dingwe molato ka baka la go boledišana le batho ba bangwe ka ditumelo tša tšona gomme se mafelelong se dira gore di lefišwe difaene tše boima le go išwa kgolegong. Ditoropong tšeo Dihlatse di sego tša ingwadiša, balaodi ba mmušo ba tšea go dira mediro ya tšona ya bodumedi go se molaong. Ba šitiša mediro ya tšona, ba golega ka nakwana bao ba tlilego dibokeng tša bodumedi tša Dihlatse le go ba lefiša difaene tše boima.

Ka ge go se na tokišetšo ya go dira mediro e mengwe yeo e sego ya bošole, masogana a Dihlatse a tlaišwa le go bewa molato ka ge a gana go tsenela bošole ka baka la letswalo. Go tšwela pele ga naga ye ka go gatakela tokologo ya bodumedi le go bolela gore dipuku tša Dihlatse ga se tša maleba, ga go sepedišane le boitlamo bjo bo dirilwego ke naga ya Azerbaijan Lekgotleng la Yuropa. Ka baka la go gatakelwa ga tokologo ya bodumedi, Dihlatse tša Jehofa nageng ya Azerbaijan di dirile dikgopelo tše 19 Kgorong ya Yuropa ya Ditshwanelo tša Batho go tloga ka 2007 go fihla ka 2014.