Masogana a mararo e lego Hye-min Kim, Lak-hoon Cho le Hyeong-geun Kim, a ile a tšwa kgorong ya boipiletšo a thabile gore ga se a ahlolelwa go ya kgolegong. E be e le phetho e sa letelwago ka gobane molato wa ona o be o le mabapi le go gana go tsenela bošole ka baka la letswalo, e lego molato woo o dirago gore ngwaga o mongwe le o mongwe banna ba bantši ba golegwe kua Korea Borwa. Ka ge taba ye e lego kgale e sa rarollwe e ile ya dira gore botatago masogana ao le batho ba bangwe ba ka godimo ga ba 19 000 ba golegwe, masogana a a be a nagana gore le ona a tla golegwa. Phetho ye ya bohlokwa kudu ya go se bone masogana a molato yeo e dirilwego Kgorong ya Boipiletšo ya Gwangju e theile motheo o mobotse wa gore taba ye e lebelelwe ka tsela e botse.

Mo e ka bago mekero ya ditaba e 200 e ile ya bega taba ye, e sa bolele feela ka phetho ya kgoro ya boipiletšo ya go se bone masogana ao molato eupša e gatelela kamoo batho ba bantši ba nyakago go tseba ka taba ye. Kuranta e nngwe e ile ya re ye ke “phetho yeo e di phalago ka moka ngwageng” wa 2016 gomme e nngwe ya re e gare ga diphetho tše hlano tše dibotse tšeo di dirilwego ka 2016 nageng ya Korea Borwa.

Phetho yeo e dirilwego kgorong ye ya boipiletšo e bontšha gore go na le diphetogo tseleng yeo ditsebi tša molao le baahlodi ba lebelelago taba ye. Melatong e mmalwa yeo e sa tšwago go begwa, baahlodi ba bone gore banna ba ba tutuetšwa ke melao yeo ba tlogago ba e tšeela godimo moo e lego gore go ba gapeletša bošole goba go ba otla ka ge ba gana go ya bošoleng, e tla ba go se hlomphe tokelo ya bona ya tokologo ya go latela letswalo. Baahlodi ba ba phethile ka gore banna ba ba na le “mabaka a kwagalago” a go gana go tsenela bošole. Go e na le gore baahlodi ba nagane gore banna ba ba tšhaba go tsenela bošole, ba ile ba ntšha diphetho tše 16 tša go se bone banna ba molato dikgweding tše 20 tše di fetilego.

Ramolao yo a bitšwago Du-jin Oh, yoo a bego a emela banna ba bantši bao ba ganago go tsenela bošole ka baka la letswalo o re: “Ke rata kamoo taba ye e fetogilego ka gona. Ke kgahlwa ke go bona diphetho tša batho bao ba sa bonwego molato di oketšega, gomme morago bjale diphetho tšeo di dirwa kgorongkgolo ya tsheko. Molatong o mongwe le o mongwe, go letetšwe gore ramolao a dire boipiletšo, eupša tsela e fetogilego ya go nagana ditabeng tša molao Korea Borwa e dira gore batho ba bantši ba nyake go tseba gore go direga eng ka molato wa mabapi le gore batho ba gane go dira dilo ka baka la letswalo wo o sa letetšego phetho Kgorong ya Tsheko ya Molaotheo.”

Setšhaba se letetše gore Kgoro ya Tsheko ya Molaotheo ya Korea Borwa e dire phetho. Kgoro yeo e phagamego e sa bapetša molaotheo wo o neago batho tokologo ya go dira dilo go ya ka letswalo la bona le Molao wa Tirelo ya Bošole wa go otla bao ba dirišago tokologo ya bona ka ge ditumelo tša bona tša bodumedi goba tše dingwe di dira gore ba gane go tsenela bošole.

Dae-il Hong, e lego seboleledi sa Dihlatse tša Jehofa o itše: “Malapa a mantšintši a Korea Borwa a thabela tharollo yeo e hlomphago ditumelo tša bodumedi tša masogana ao a ka se gapeletšwego go dira seo matswalo a ona a sa a dumelelego go se dira. Re fela pelo ya go kwa phetho ya Kgoro ya Tsheko ya Molaotheo yeo e neago masogana a seriti.”