NEW YORK—Ka Labohlano mesong June 6, 2014, kopano ya mathomo ya matšatši a mararo ya ditšhabatšhaba ya Dihlatse tša Jehofa ya “Tšwelang Pele le Tsoma Mmušo wa Modimo Pele!” e tla thoma Ford Field kua Detroit, Michigan, USA. Dikarolo tše dingwe tša lenaneo le di tla gašwa mafelong a mangwe kua Arizona, California, Florida, Illinois, Missouri, New Jersey le North Carolina gomme di tla fetolelwa ka Sealbania, Sekorea, Sepolishi le Sepotokisi.

J. R. Brown, mmoleledi wa Dihlatse tša Jehofa ntlongkgolo ya tšona ya lefase ka bophara, kua New York, o re: “Dibeke tše tharo tše di fetilego, Dihlatse kua Detroit le mafelong ao a tlago go kgokaganywa ka bidio di ile tša kgatha tema lesolong la go laletša baagišani ba tšona gore ba be gona tiragalong ye e bohlokwa kudu. Kua Detroit, re letetše mašabašaba a ka bago a 45 000, ao a akaretšago baeng ba fetago 2 000 ba tšwago Australia, Canada, Jeremane le Taiwan.”

Selemong ka moka, Dihlatse kua United States di tla ba le dikopano tša ditšhabatšhaba tše 16 mapatlelong a magolo ao a lego ditoropong tše 10. Mafelong a mangwe lenaneo ka moka goba dikarolo tše dingwe di tla ba ka Sealbania, Polelo ya Diatla ya Amerika, Arabia, Searmenia, se-Canton, se-Chuuke, Sefora, Segerika, se-Creole sa Haiti, Sehindi, Seiloko, Seindonesia, SetaIiana, Sejapane, Sekorea, Semandarin, Semarshall, Seperesia, Sepolishi, Seromania, Serussia, Sesamoa, Sepanishi, Setagalog, Setwi le Sevietnam. Go thoma ka June 2014 go ba go fihla ka 2015, Dihlatse di tla ba le dikopano tša ditšhabatšhaba kua Australia, Ecuador, Engelane, Jeremane, Gerika, Mexico, Korea Borwa le Zimbabwe.

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000