Ka December 11, 2014, Kgoro ya Tsheko ya Selete ya Rostov e tla theetša boipiletšo bja molato wa bosenyi kgahlanong le Dihlatse tša Jehofa tše 16 kua Taganrog, Russia. Di ile tša sekišetšwa go rulaganya le go swara dipokano tša khutšo tša bodumedi.

Go tlaišwa ga Dihlatse go thomile ka 2011, ge bahlankedi ba mmušo ba tikologong ye ba be ba phuruphutša ka kgapeletšo magae a tšona le go gatiša ka sephiring dipokano tša tšona tša bodumedi. Se se ile sa dira gore di pharwe ka molato wa bosenyi. Ka morago ga tsheko ya dikgwedi tše 15 tše ditelele, Kgoro ya Tsheko ya Taganrog City e ile ya bona Dihlatse tše šupa molato ka July 30, 2014. Moahlodi o ile a nea Dihlatse tše tše šupa kotlo e boima le go ahlolela tše nne tša tšona lebaka le letelele kgolegong, eupša gateetee o ile a phumola dikotlo tšeo le go fega kahlolo ya tšona ya go išwa kgolegong. Moahlodi o ile a lokolla Dihlatse tše dingwe tše senyane ka ge tshepedišo ya molao kgorong ya tsheko e se ya latelwa, eupša o ile a bolela gore di ile tša dira mediro ya go bontšha go fišegela bodumedi ka mo go fošagetšego. Dihlatse ka moka tše 16 di dirile boipiletšo di kgopela gore melato ya tšona ya bosenyi e phumolwe ka mo go feletšego.

Motšhotšhisi le yena o ile a dira boipiletšo. O nyaka gore Kgoro ya Tsheko ya Selete ya Rostov e golege Dihlatse tše nne, tšeo e lego badiredi ba bodumedi, gomme ba di tswalelele ka morago ga go theetša boipiletšo. Motšhotšhisi o dirile gape boipiletšo bja gore kgoro ya tsheko e phumole go lokollwa ga Dihlatse tše dingwe tše senyane gomme Kgoro ya Tsheko e di bone molato wa go dira mediro ya go fišegela bodumedi ka mo go fošagetšego.

Vasiliy Kalin e lego moemedi wa Dihlatse tša Jehofa kua Russia, o boletše gore: “Ke holofela gore Kgoro ya Tsheko ya Selete ya Rostov e tla bona go kgopamišwa ga toka go Dihlatse tše tše 16 tšeo di ilego tša kgotlelela go lebeletšana le kgatelelo ya bodumedi gomme di lokollwe melatong yeo ba di pharilego ka yona.”