Ka April 16, 2012, toropong ya Perm’ bogareng bja Russia, Aleksandr Solovyov, yoo e lego yo mongwe wa Dihlatse tša Jehofa, o ile a newa kotlo ya mo e ka bago diranta tše 260 ka go rulaganya gore go be le ‘tirelo e sego molaong ya bodumedi’ ka holong e hirilwego.

Ka morago ga gore moahlodi wa kgoro ya seleteng seo a kwe seo go thwego ke bohlatse ka moka kgahlanong le Solovyov, o ile a fetoša kahlolo ya kgoro ya tlasana gomme a phumola tšhelete e bego e swanetše go lefša.

Moahlodi o ile a bala kahlolo ya gagwe ke moka a retologela go Hlatse yeo e bego e fentše molato gomme a re: “Go sa šetšwe melao ya go se kwagale le kgethollo yeo ba bangwe ba bego ba na le yona, ga se 1937 ye, moo re ka fo go hlokomologa ditaba tše bohlokwa. Lehono setšhaba sa rena se itshwara gabotse ka baka la modiro wa gago wa go ruta gomme re a go leboga.”

Ka July 1937, molaodi wa Soviet, e lego Stalin, o ile a nea Taelo ya 00447, ya go thoma ga go swara batho ga sehlogo. Molao woo o be o bolela gore bao ba dirago dilo tšeo di thulanago le mmušo ba be ba tla swarwa le go tlišwa kgorong ya tsheko le ge go ka ba go se na bohlatse. Balaodi ba bega gore batho ba dikete tše masome ba ile ba romelwa dikampeng tša mešomo gomme ba fetago ba 300 000 ba ile ba ahlolelwa lehu.