• Bana ba motho ba phedišana bjang?

• Mabaka a mabedi a gore o phedišana gabotse le bana beno

• Seo dithaka tša gago di se bolelago

 Bana ba motho ba a ratana le ge ka dinako tše dingwe ba elwa. Helena yo a nago le mengwaga e 18 o re: “Moratho wa ka wa mošemane o a ntena, e bile o a tseba gore ge a nyaka go nkwatiša o dira eng.”

 Dintwa tša bana ba motho di ka rarollwa ka go no boledišana le go bontšhana mabaka. Ka mohlala:

•   Bašemane ba babedi bao ba robalago kamoreng e tee ba ka ngangišana ka taba ya gore yo mongwe le yo mongwe o nyaka nako ya go dira dilo ka kamoreng yo mongwe a se gona. Tharollo e ka ba efe bothateng bjo? Tharollo ke gore ba swanetše go ithuta go fana nako ge yo mongwe a nyaka go šomiša kamora a le tee ka nako yeo. Diriša keletšo ya Beibele yeo e lego go Luka 6:​31.

•   Basetsana ba babedi ba ka no apara diaparo tša yo mongwe ntle le go mo kgopela. Tharollo e ka ba efe bothateng bjo? Tharollo ke gore ba boledišane ba botšane gore ke dife tšeo yo mongwe a ka di tšeago ntle le tumelelo, ke dife tšeo a sa swanelago go di tšea ntle le tumelelo. Diriša keletšo ya Beibele yeo e lego go 2 Timotheo 2:​24.

 Ka dinako tše dingwe, mathata magareng ga bana ba motho e ka ba a magolo moo e lego gore a ka feleletša gampe. Ekwa ka mehlala ye e mebedi ya ka Beibeleng:

•   Miriamo le Arone ba be ba jela ngwanabo bona Moshe mona. Seo ga se sa ka sa feleletša gabotse. Bala taba yeo ka Beibeleng go Numeri 12:​1-​15. Ke moka o ipotšiše gore: ‘Nka dira bjang gore ke se ke ka jela ngwanešo mona?’

•   Kaine o ile a jela ngwanabo e lego Abele mona a ba a feleletša a mmolaile. Bala taba yeo go Genesi 4:​1-​12. Ke moka o ipotšiše gore: ‘Nka laola kgalefo ya ka bjang ge ke dirišana le ngwanešo goba kgaetšedi ya ka?’

 Le ge go ka ba go le thata bjang gore o kwane le bana beno, go na le mabaka a mabedi ao a ka go thušago gore o se kgaotše.

1.   Go kwana le bana beno go bontšha gore o gotše. Lesogana leo le bitšwago Alex, le re: “Baratho ba ka ba banenyana ba be ba dula ba nkwatiša. Ga bjale ga ke sa ba felela pelo e bile ke kgona go phedišana le bona gabotse. O ka bolela gore ke gotše.”

    Beibele e re: “Yo a diegago go galefa o na le temogo e kgolo, eupša yo a felago pelo o godiša bošilo.”​—Diema 14:⁠29.

2.   Go kwana le bana beno go go tlwaeletša dilo tša nakong e tlago. Ge e ba o sa kgone go kgotlelela ge bana ba geno ba go kwatiša, gona o tlo kgona bjang go kgotlelela molekane wa gago, motho yo o šomago le yena, motho yo a go hirilego goba motho le ge e le ofe yo bolelago le yena?

    Nnete ya bophelo še: gore o tle o atlege mo bophelong, o swanetše go kgona go boledišana le go phedišana le batho ba bangwe. Le gona, ga gona moo o ka itlwaetšago go dira bjalo ka ntle le go itlwaetša ga geno.

    Beibele e re: “Ge e ba go kgonega, go fihla moo go ithekgilego ka lena, ebang le khutšo.”—Baroma 12:⁠18.

 Na o ka nyaka go hwetša thušo ge o fapane le ngwaneno? Bala sehlogwana se se rego “Seo dithaka tša gago di se bolelago,” ka morago o arabe mošongwana wo o tsamaišanago le sehlogo seo. Sehlogo sa wona se re “Go Dirišana le Bana Bešo.”