Batho ba matšatši a ba nagana gore go tshepagala ga go bohlokwa. Go ba gona, ba bangwe ba ka bolela gore:

•   ‘Ge e ba ke sa botše batswadi ba ka maaka, ba ka tla ba nkgana ka dilo tšeo ke di ratago.’

•   ‘Ge e ba ke sa kopiše moleko wo, nka tla ka palelwa.’

•   ‘Ge e ba ke sa utswe selo se, ke tla swanelwa ke go bea tšhelete ya go se reka.’

 Ba bangwe ba ka bolela gore: ‘Go dira bjalo ga se bothata bjo bogolo.’ ‘Batho ka moka ga ba tshepagale.’

 Seo ga se therešo. Batho ba bantši go akaretša le bafsa ba nagana gore go tshepagala go na le mohola gomme seo se a kwagala. Beibele e re: “Gobane se sengwe le se sengwe seo motho a se bjalago, ke sona seo a tlago go se buna.” (Bagalatia 6:7) Ka mantšu a mangwe, ka mehla ditiro tša rena di ba le mafelelo a mabe goba a mabotse.

 Ka mohlala, ela hloko kamoo batho bao ba ilego ba bolela maaka ba ilego ba feleletša ka gona.

  “Ke boditše mma maaka ka mošemane tsoko yoo ke bego ke boledišana le yena. O mpone di tloga fase gore ke bolela maaka. Ka morago ga lekga la boraro ke mmoditše maaka, mma o ile a galefa. Ke ile ka thibelwa go diriša founo ya ka dibeke tše pedi le go se bogele thelebišene kgwedi ka moka. Ke ile ka lahla go botša batswadi ba ka maaka gape!”—Anita.

 Seo o ka naganago ka sona: Ke ka baka la’ng go tla tšea mmago Anita nako e telele gore a boele a tshepe morwedi wa gagwe?

 Beibele e re: “Ka gona ka ge bjale le lahlile maaka, yo mongwe le yo mongwe wa lena a bolele therešo le moagišani wa gagwe.”—Baefeso 4:25.

  “Ke ile ka botša batswadi ba ka maaka e bile ke nagana gore ba kgolwa seo go fihlela ge ka morago ba mpotša gore ke boeletše seo ke se boletšego. Ke ile ka bolela se se fapanego kudu e bile ke se sa kgona go gopola seo ke se boletšego mathomong. O ka se be le bothata bjo ge o ka bolela therešo di sa tloga!”—Anthony.

 Seo o ka naganago ka sona: Anthony nkabe a ile a phema bjang boemo bjoo bjo bo lešago dihlong?

 Beibele e re: “Molomo wo o bolelago maaka o šišimiša Jehofa, eupša bao ba botegago ba a mo kgahla.”—Diema 12:22.

  “Ke na le mogwera yo a ratago go feteletša ditaba le go di kgopamiša. Ke a mo rata e bile ke leka gore ke se mo tšeele hlogong kudu. Eupša go thata kudu go kgolwa seo a se bolelago.”—Yvonne.

 Seo o ka naganago ka sona: O nagana gore go feteletša ditaba le go di kgopamiša go ka kgoma bjang botumo bja mogwera wa Yvonne?

 Beibele e re: “Re rata go itshwara ka go botega dilong tšohle.”—Baheberu 13:18.

 Ga bjale ela hloko mafelelo a mabotse ao a bago gona ge motho a tshepagala.

  “Mosadi yo a bego a sepela pele ga ka o ile a wiša tšhelete. Ke ile ka mo emiša gomme ka mo nea tšhelete ya gagwe. O ile a leboga kudu. O itše: ‘Seo o se dirilego se a kgahliša. Ga se batho ka moka bao ba dirago selo sa mohuta wo.’ Ke ile ka ikwa ke thabile ka ge motho yo mongwe a lemogile selo se sebotse seo ke se dirilego!”—Vivian.

 Seo o ka naganago ka sona: Ke ka baka la’ng mosadi yo a ka ba a ile a makatšwa ke tiro e bjalo ya go tshepega? Go tshepagala go ile gwa hola Vivian bjang?

 Beibele e re: “Go thaba bao ba ... dirago toko ka dinako tšohle.”—Psalme 106:3.

  “Re šoma re le lapa kgwebong ya go hlokomela meago, gomme ka dinako tše dingwe ge re hlwekiša diofisi re hwetša tšhelete mo fase. Ge re e bona, re a e topa gomme ra e bea tafoleng ya kgauswi. Mošomi yo mongwe o be a selekwa ke gore re a tshepagala, o be a fela a re: ‘E fo ba disente!’ Lega go le bjalo, ka mehla o be a re tshepa.”—Julia.

 Seo o ka naganago ka sona: O nagana gore botumo bja Julia bja go tshepega bo ka mo hola nakong e tlago ge a nyaka lengwalo la go mmolela gore a hwetše mošomo o mongwe?

 Beibele e re: “Dira sohle se o ka se kgonago gore o itšweletše o amogelega go Modimo, o le yo a šomago go se seo se go hlabišago dihlong.”—2 Timotheo 2:15.

  “Ke ile ka hwetša mogolo wa diiri tše 80 go e na le tše 64 tša mošomo wo ke o dirilego. Gaešita le ge ke be ke lekega, ke paletšwe ke go homola. Ke ile ka lemoša mookamedi wa tša ditšhelete, gomme o ile a leboga kudu. Le ge khampani ye e na le tšhelete, ke be ke sa ikemišetša go amogela tšhelete ya bohodu.”—Bethany.

 Seo o ka naganago ka sona: Na go lokile gore o utswetše khampani go e na le go utswetša motho?

 Beibele e re: “Motho wa moradia o šišimiša Jehofa, eupša Modimo o gwerana kgauswi le baloki.”—Diema 3:32.