Kholofetšo ya go se dire thobalano pele ga lenyalo ke go holofetša ka go ngwala goba go bolela gore o ka se dire thobalano go fihlela o tsena lenyalong.

 Dikholofetšo tša go se dire thobalano pele ga lenyalo di thomile go tuma mengwageng ya bo​-1990 ge bodumedi bja Southern Baptist Convention bja kua United States bo be bo dirile lesolo la sehlogo se se rego: “Leratorato le a Leta,” e lego lenaneo leo le kopantšhitšego melao ya Beibele le tutuetšo e botse ya dithaka go kgothaletša bafsa gore ba gane go dira thobalano pele ga lenyalo.

 Lenaneo la go swana le leo, le ile la thoma kapejana ka morago ga leo, moo bao ba tlilego ba bego ba dira kholofetšo gomme ba newa palamonwana ya silifera go swantšhetša (le go ba gopotša) kholofetšo ya bona ya go gana go dira thobalano pele ga lenyalo.

 Karabo e ithekgile ka gore o botšiša mang.

•   Banyakišiši Christine C. Kim le Robert Rector ba bolela gore “dinyakišišo tše mmalwa di hweditše gore dikholofetšo tša bafsa tša go se dire thobalano pele ga lenyalo di be di dirwa ke bafsa bao ba tšerego nako go ba le dikganyogo tša go dira thobalano.”

•   Go ya ka nyakišišo yeo e gatišitšwego ke Mokgatlo wa Guttmacher, e bontšha gore “bafsa bao ba dirago ‘dikholofetšo tša go se dire thobalano pele ga lenyalo’ le bona ba ka no dira thobalano go swana le bao ba sego ba dira dikholofetšo.”

 Ke ka baka la’ng dinyakišišo tše di thulana?

•   Dinyakišišo tše dingwe di bapiša bafsa bao ba dirago dikholofetšo tše le bafsa bao ba sa di dirego bao ba sa lebelelego thobalano ka go swana.

•   Dinyakišišo tše dingwe di bapiša bafsa bao ba dirago dikholofetšo tše le bao ba sa di dirego bao ba lebelelago thobalano ka go swana.

 Nyakišišo ya mafelelo e utolla’ng? Dr. Janet Rosenbaum, e lego setsebi sa mathata a tša maphelo a bafsa ba mengwaga ya magareng ga e 13 le e 19, o re ka morago ga mengwaga e mehlano, “bafsa bao ba dirago dikholofetšo le bao ba sa di dirego ga ba fapane ka selo tabeng ya go dira thobalano.”

 Mananeo a go se dire thobalano pele ga lenyalo a na le maikemišetšo a mabotse. Bothata ke gore ga se gore a ruta melao yeo e ka thušago bafsa ba go kgomarela dikholofetšo tšeo ba di dirilego. Dr. Rosenbaum o re batho ba bantši bao ba holofetšago go dula ba sa dire thobalano pele ga lenyalo “ga ba dire kholofetšo yeo ka pelo ka moka. Go se dire thobalano pele ga lenyalo go swanetše go tšwa mothong e sego go tšeeng karolo mananeong a.”

 Beibele ga e kgothaletše motho go itlama go se dire thobalano pele ga lenyalo ka go dira kholofetšo ka go ngwala goba go e bolela, eupša e thuša motho go ‘tlwaetša matla a gagwe a go hlatha, e le gore a kgethologanye se se nepagetšego le se se fošagetšego.’ (Baheberu 5:14) Go feta tšohle, go se dire thobalano pele ga lenyalo ga se taba feela ya go tšhaba go tsenwa ke malwetši goba go ima, eupša ke tsela ya go bontšha tlhompho go Mothomi wa lenyalo.—Mateo 5:19; 19:4-6.

 Melao yeo e lego ka Beibeleng e diretšwe go re hola. (Jesaya 48:17) Ge e le gabotse, batho ka moka go sa šetšwe gore ke ba bagolo goba ke ba banyenyane, ba swanetše go ikemišetša go latela molao wa Modimo wa gore ba ‘tšhabe bootswa.’ (1 Bakorinthe 6:18) Ge ba tsena lenyalong, ba tla thabela thobalano ntle le go ikwa ba le molato le go itshola ka morago, moo gantši go tlišwago ke go dira thobalano pele ga lenyalo.