Seo re tlago go ithuta sona sehlogong se

•  Go ratana ke eng?

•  Na o loketše go ratana?

 Batho ba bangwe ba bona go ratana e le go no ipapalela feela. Le ge go le bjalo, sehlogong se, “go ratana” go bolela ka nako yeo batho ba babedi ba e fetšago ba le mmogo go bona ge e ba ba ka swanelana go nyalana. Ka gona, go ratana go na le morero. Ga e no ba tsela ya go nyaka gore motho wa bong bjo bo sa swanego le bja gago a dule a boledišana le wena.

 Ge nako e dutše e eya, go ratana go swanetše go go thuša gore mafelelong o dire phetho ya gore o tla nyalana le motho yo o ratanago le yena goba gore le ka se sa ratana. Ge o thoma go ratana o swanetše go letela gore o tlo swanelwa ke go tšea e nngwe ya diphetho tše.

 Tabataba: Ge eba o re o loketše go thoma go ratana o swanetše go ba o loketše le gore o ka tsena lenyalong.

 Go ratana go ka feleletša ka lenyalo, ka baka leo o swanetše go nagana gore ke dika dife tšeo o nago le tšona tšeo di ka agago goba tša senya segwera seo le nago le sona. Ka mohlala, nagana ka dilo tše di latelago:

•   Go phedišana le ba lapa. Tsela yeo o swarago bana ba geno le batswadi ba gago, kudukudu ge o gateletšegile, e bontšha gabotse gore o tlo swara bjang molekane wa gago lenyalong la lena.

   Molao wa motheo wa Beibele: “Tlošang go lena mohuta o mongwe le o mongwe wa go boloka sekgopi, bogale, pefelo, mašata le polelo e gobošago gotee le selo se sengwe le se sengwe se se gobatšago.”—Baefeso 4:31.

   Ipotšiše: ‘Na batswadi ba ka le bana bešo ba ka re ke ba swara ka tlhompho? Ge e ba ke sa dumelelane le yo mongwe wa bona, na ke kgona go boledišana le bona ke išitše maswafo fase goba ke a befelwa gomme ka thoma go ba omanya?’

•   Go ikgafa. Ge o nyetše goba o nyetšwe, o tlo swanelwa ke go naganela molekane wa gago e bile o nagane ka dilo tšeo molekane wa gago a di nyakago ke moka le dumelelane.

   Molao wa motheo wa Beibele: “Anke yo mongwe le yo mongwe a tšwele pele a tsoma seo se holago motho yo mongwe, e sego seo se holago yena a nnoši.”—1 Bakorinthe 10:24.

   Ipotšiše: ‘Na ke dula ke nyaka gore dilo di dirwe ka tsela yeo nna ke e nyakago? Na ke tsebja ke le motho yo a naganelago? Nkile ka bontšha ka ditsela dife gore ke etiša dikgahlego tša ba bangwe pele ga tša ka?’

•   Boikokobetšo. Molekane yo botse wa lenyalo o dumela diphošo tša gagwe gomme a kgopela tshwarelo go tšwa pelong.

   Molao wa motheo wa Beibele: “Ka moka ga rena re dira diphošo gantši.”—Jakobo 3:2, mongwalo wa tlase.

   Ipotšiše: ‘Na ke amogela diphošo tša ka le semeetseng goba ke a ikemelela? Na ke kgopišega ka pela ge batho ba mpotša gore nka lokiša kae?’

•   Tša ditšhelete. Motho yo a kgonago go šomiša tšhelete gabotse o tlo kgona go phema ye nngwe ya dilo tšeo gantši di bakago diphapano lenyalong.

   Molao wa motheo wa Beibele: “Ke mang wa lena yo a nyakago go aga tora a sa thomego ka go dula fase gomme a bala ditshenyegelo go bona ge e ba a na le mo go lekanego go ka e fetša?”—Luka 14:28.

   Ipotšiše: ‘Na ke kgona go šomiša tšhelete gabotse, goba na ke dula ke le dikolotong? Ke bontšhitše bjang gore ke kgona go šomiša tšhelete gabotse?’

•   Bophelo bja gago bja Bokriste. Ge e ba o le yo mongwe wa Dihlatse tša Jehofa, o swanetše go ba o na le lenaneo la go ithuta Beibele e bile o eya dibokeng ka mehla.

   Molao wa motheo wa Beibele: “Go thaba bao ba lemogago gore ba nyaka dilo tša moya.”—Mateo 5:3.

   Ipotšiše: ‘Na ke lwela gore tumelo ya ka e dule e tiile? Na bophelo bja ka bja Bokriste bo tla pele, goba ke dumelela dilo tše dingwe di ntšhitiša?’

 Tabataba: Motho yo o tlo nyalanago le yena o swanelwa ke molekane yo botse. Ka gona ge o lwela go ba motho yo mokaone, go tlo ba bonolo kudu gore o kgahle motho yoo le yena a lwelago goba o kaone.