Beibele e re Modimo o nyaka gore batho ba “ile bootswa.” (1 Bathesalonika 4:3) Ka Beibeleng, lentšu “bootswa” le akaretša bohlotlolo e lego ge motho yo a nyetšego a robala le motho yo e sego molekane wa gagwe, thobalano magareng ga batho ba bong bjo bo swanago, le magareng ga monna le mosadi bao ba sego ba nyalana.

•  Ke ka baka la eng go le bohlokwa go Modimo gore batho ba nyalane?

•  Na pele batho ba ka nyalana ba ka dula mmogo go bona ge e ba ba tla thaba ge ba nyalane?

•  Banyalani ba ka dira’ng gore lenyalo la bona le tie?

•   Modimo ke yena a thomilego lenyalo. O le thomile nakong ya ge a be a kopanya batho ba mathomo e lego Adama le Efa . (Genesi 2:22-24) Morero wa gagwe e be e se gore monna le mosadi ba dule gotee ba sa nyalana.

•   Modimo o tseba seo se ka dirago gore batho ba thabe. O dirile gore ge monna le mosadi ba nyalane, ba dule gotee go ya go ile e le gore ba tle ba kgone go šireletša lapa la bona. Ka mohlala, go no swana le ge motho yo a direlego fenitšhara a go nea taelo ya kamoo o swanetšego go kopanya dikarolwana tša fenitšhara yeo o e rekilego, ditaelo tša Modimo le tšona di re ruta seo re ka se dirago gore re be le lapa leo le thabilego. Melao ya Modimo e hola batho bao ba dulago ba e latela.—Jesaya 48:17, 18.

•   Go tsenela thobalano pele ga lenyalo go ka ba le ditlamorago tšeo di kwešago bohloko. Ka mohlala, go ka dira gore o ime o sa letela, o fetelwe ke malwetši, le go gateletšega maikwelong. a

•   Modimo o dirile gore monna le mosadi ba be le bokgoni bja go ba le bana. Modimo o lebelela bophelo bo le bohlokwa. Le gona bokgoni bja go dira bana ke mpho e bohlokwa. Modimo o nyaka re hlompha mpho yeo ka gore re tšee lenyalo e le le bohlokwa kudu.—Baheberu 13:4.

 E le gore batho ba thabele lenyalo la bona, ga go hlokagale gore ba dule gotee ka nakwana pele ba nyalana. Go e na le moo, e le gore batho bao ba nyalanego ba dule ba thabile, ba swanetše go tšwela pele ba ratana le ge ba nyalane, gaešita le go boledišana ge ba na le mathata. b Ge batho ba nyalane, seo se ka ba thuša gore ba se ke ba tlogelana.—Mateo 19:6.

 Ga go na lenyalo leo le se nago mathata. Lega go le bjalo, banyalani ba ka thaba lenyalong la bona ge ba ka diriša dikeletšo tša ka Beibeleng. Mehlala e latelago e ka ba thuša:

•   Nagana ka molekane wa gago, go feta ka tsela yeo o naganago ka wena.—1 Bakorinthe 7:3-5; Bafilipi 2:3, 4.

•   Bontšhanang gore le a ratana gomme le hlomphane.—Baefeso 5:25, 33.

•   Kgetha mantšu ge o bolela le molekane wa gago.—Diema 12:18.

•   O se felele molekane wa gago pelo, gomme ge a go diretše phošo o mo lebalele ka pelapela.—Bakolose 3:13, 14.