Go Phologa ke Eng?
Karabo ya Beibele
Bangwadi ba Beibele ka dinako tše dingwe ba ile ba diriša mantšu “phološo” le ‘phologa’ go šupa go motho yo a hlakodišwago kotsi goba tshenyego. (Ekisodo 14:13, 14; Ditiro 27:20) Lega go le bjalo, gantši mantšu ao a bolela ka go phološwa sebeng. (Mateo 1:21) Ka ge lehu le tlile ka sebe, gona bao ba phološwago sebeng ba ba le kholofelo ya go phela ka mo go sa felego.—Johane 3:16,17. a
O ka phologa bjang?
E le gore o phologe, o swanetše go ba le tumelo go Jesu le go e bontšha ka go kwa ditaelo tša gagwe.—Ditiro 4:10, 12; Baroma 10:9, 10; Baheberu 5:9.
Beibele e re o swanetše go bontšha ka mediro gore o a kwa, go hlatsela gore tumelo ya gago e a phela. (Jakobo 2:24, 26) Eupša seo ga se bolele gore o tla phologa. Phologo ke “mpho ya Modimo” ka baka la “botho bjo bogolo” goba ‘kgaugelo’ ya gagwe.—Baefeso 2:8, 9; Beibele ya Sepedi.
Na go ka kgonega gore o se phologe?
Ee. Go swana le ge motho yo a phologilego go kgangwa ke meetse a ka kgetha go wela goba go itahlela gape ka meetseng, go ka kgonega gore le motho yo a phologilego sebe eupša a se sa bago le tumelo a fedišwe. Ka lona lebaka le, Beibele e kgothaletša Bakriste bao ba amogetšego phologo “go lwela ka matla tumelo” ya bona. (Juda 3) Le gona e lemoša bao ba phološitšwego gore: “Dulang le šomela phološo ya lena ka go boifa le go thothomela.”—Bafilipi 2:12.
Na Mophološi ke Modimo goba ke Jesu?
Beibele e re Modimo ke mothopo o mogolo wa phologo, gantši e mmitša “Mophološi.” (1 Samuele 10:19; Jesaya 43:11; Tito 2:10; Juda 25) Go oketša moo, Modimo o ile a diriša batho ba fapafapanego go phološa setšhaba sa Isiraele ya bogologolo, le bona Beibele a ba bitša “baphološi.” (Nehemia 9:27; Baahlodi 3:9, 15; 2 Dikgoši 13:5) b Go bjalo le ka Jesu, Beibele e re ke “Mophološi” ka ge Modimo a re phološa sebeng ka sehlabelo sa gagwe sa topollo.—Ditiro 5:31; Tito 1:4. c
Na batho ka moka ba tla phologa?
Aowa, ba bangwe ba ka se phologe. (2 Bathesalonika 1:9) Ge Jesu a be a botšišwa gore, “Na bao ba phološwago ke ba sego kae?” o arabile ka gore: “Katanang ka matla gore le tsene ka mojako o pitlaganego, gobane ke a le botša, ba bantši ba tla nyaka go tsena eupša ba ka se kgone.”—Luka 13:23, 24.
Dinonwane mabapi le go phologa ga batho ka moka
Nonwane: Bakorinthe ba Pele 15:22 e ruta ka go phologa ga batho ka moka ge e re “ka Kriste bohle ba tla phedišwa.”
Therešo: Temana yeo ge e le gabotse e bolela ka tsogo. (1 Bakorinthe 15:12, 13, 20, 21, 35) Ka gona polelwana e rego “ka Kriste bohle ba tla phedišwa” e no ra gore bohle bao ba tlago go tsošwa ba tla hwetša tšhegofatšo yeo ka Jesu Kriste.—Johane 11:25.
Nonwane: Tito 2:11 e ruta ka go phologa ga batho ka moka ge e re Modimo o “phološa batho bohle.”—Beibele ya Sepedi.
Therešo: Lentšu la Segerika leo le fetoletšwego e le “bohle” temaneng ye gape le ka bolela “mohuta o mongwe le o mongwe goba mehuta e fapafapanego.” d Se se ra gore kwešišo e nepagetšego ya Tito 2:11 ke ya gore Modimo o dira gore phologo e hwetšwe ke mehuta yohle ya batho, go akaretša le bao ba tšwago “ditšhabeng tšohle, melokong yohle, merafong yohle le malemeng ohle.”—Kutollo 7:9, 10.
Nonwane: Petro wa Bobedi 3:9 e ruta ka go phologa ga batho ka moka ge e re Modimo “ga a rate gore go fedišwe le ge e le mang.”
Therešo: Modimo o nyaka gore batho ba phološwe, eupša ga a ba gapeletše go amogela tokišetšo ya gagwe ya go ba phološa. “Letšatši [la gagwe] la kahlolo” le tla akaretša “tshenyego ya batho ba sa boifego Modimo.”—2 Petro 3:7.
a Beibele e ka bolela ka motho yo a ‘phološitšwego’ le ge a se a tšwa a phološwa sebeng le lehung.—Baefeso 2:5; Baroma 13:11.
b Ditemaneng tše di bontšhitšwego, diphetolelo tše dingwe di diriša mantšu “thwadi,” “mohlakodiši,” “mogale,” “moetapele,” goba gaešita le “motho” go e na le go diriša “mophološi.” Lega go le bjalo, Seheberung sa mathomo sa Beibele, go dirišitšwe lentšu le le swanago go baphološi ba batho bjalo ka ge le ile la dirišwa maemong a mangwe ka Beibeleng ge go bolelwa ka Jehofa Modimo gore ke Mophološi.—Psalme 7:10.
c Leina la Jesu le tšwa leineng la Seheberu Yehoh·shuʹaʽ, leo le bolelago gore “Jehofa ke Phološo.”
d Bona Vine’s Complete Expository Dictionary of Old and New Testament Words. Lentšu la go swana le lona la Segerika le tšwelela go Mateo 5:11, yeo e nago le mantšu a Jesu a gore batho ba be ba tla bolela “mohuta o mongwe le o mongwe” wa dilo tše mpe ka balatedi ba gagwe.
You May Also Like
DIPOTŠIŠO TŠA BEIBELE DI A ARABJA
Sehlabelo sa Jesu ke “Topollo Bakeng sa ba Bantši” Bjang?
Topollo e re phološa bjang sebeng?
DIPOTŠIŠO TŠA BEIBELE DI A ARABJA
Na Beibele e Ruta Gore Motho a ka Phološwa Gatee ya ba Moka?
Jesu o neile papišo ya go araba potšišo ye.
DIPOTŠIŠO TŠA BEIBELE DI A ARABJA
Na go no Dumela go Jesu Feela go ka go Dira Gore o Phološwe?
Beibele e re botša gore ke batho ba mohuta mang bao ba dumelago go Jesu, eupša ba ka se phološwe. Seo se kgonega bjang?
ESSENTIAL BIBLE TEACHINGS
Ke ka Baka la Eng Jesu a Ile a hwa?
Beibele e gatelela bohlokwa bja lehu la Jesu. Na lehu la gagwe le na le morero?
DITEMANA TŠA BEIBELE DI A HLALOSWA
Tlhaloso ya Baroma 10:13—“Ba ba Bitšago Leina la Morena”
Modimo o file batho sebaka sa gore ba tle ba phološwe ke moka ba phele go ya go ile go sa šetšwe gore ba tšwa nageng efe goba ke ba morafo ofe.
DITHUTO TŠA BEIBELE
Leka Thuto ya Rena ya Beibele
Ithute Beibele mahala o thušwa ke motho yo mongwe.