Sehlabelo sa Jesu ke tsela ya Modimo ya go hlakodiša, goba go phološa batho sebeng le lehung. Beibele e bolela ka madi a tšholotšwego a Jesu e le tefo ya topollo. (Baefeso 1:7; 1 Petro 1:​18, 19) Ka gona, Jesu o itše o be a tletše “go nea moya wa gagwe gore e be topollo bakeng sa ba bantši.”—Mateo 20:28.

Ke ka baka la’ng go be go nyakega “topollo bakeng sa ba bantši”?

 Motho wa pele Adama, o bopilwe a phethagetše, goba a se na sebe. O be a na le tebelelo ya go phela ka mo go sa felego, eupša ya lahlega ka ge a kgethile go se kwe Modimo. (Genesi 3:​17-​19) Ge a be a na le bana, o ile a ba fetišetša sebe seo. (Baroma 5:12) Ke ka lebaka leo Beibele e bolelago gore Adama o ‘rekišeditše’ yena le bana ba gagwe bokgobeng bja sebe le lehu. (Baroma 7:14) Ga go le o tee wa bona yo a bego a ka reka seo Adama a se lahlilego, ka ge ba be ba se ba phethagala.—Psalme 49:​7, 8.

 Modimo o ile a kwela ditlogolo tša Adama bohloko ka boemo bja tšona bja go hloka kholofelo. (Johane 3:16) Lega go le bjalo, toka ya Modimo e be e ka se mo dumelele go hlokomologa goba go phaela ka thoko dibe tša bona ntle le lebaka le le kwagalago. (Psalme 89:14; Baroma 3:​23-​26) Ka ge Modimo a rata batho, o dirišitše mokgwa wa semolao wa gore dibe tša bona di lebalelwe le go phumolwa. (Baroma 5:​6-8) Mokgwa woo wa semolao ke topollo.

Topollo e šoma bjang?

 Ka Beibeleng, lentšu “topollo” le akaretša dilo tše di latelago tše tharo:

1.   Ke tefo.—Numeri 3:​46, 47.

2.   E re thuša gore re lokollwe.​—Ekisodo 21:30.

3.   E lekana le mohola wa seo se lefilwego. a

 Ela hloko kamoo ditsela tšeo di šomago ka gona sehlabelong sa topollo sa Jesu Kriste.

1.   Tefo. Beibele e re Bakriste ba “rekilwe ka theko e kgolo.” (1 Bakorinthe 6:​20; 7:​23) Theko yeo ke madi a Jesu, ao ka ona a ‘reketšego Modimo batho go tšwa molokong o mongwe le o mongwe, lelemeng le lengwe le le lengwe, morafong o mongwe le o mongwe le setšhabeng se sengwe le se sengwe.’​—Kutollo 5:​8, 9.

2.   Go lokollwa. Sehlabelo sa Jesu se dira gore re ‘lokollwe ka topollo’ sebeng.—1 Bakorinthe 1:30; Bakolose 1:14; Baheberu 9:15.

3.   Tekanyo ya seo se lefilwego. Sehlabelo sa Jesu se lekana tlwaa le seo Adama a se lahlilego—bophelo bjo bo phethagetšego bja motho. (1 Bakorinthe 15:21, 22, 45, 46) Beibele e re: “Go etša ge ka go se kwe ga motho o tee [Adama] ba bantši ba ile ba dirwa badiradibe, ka mo go swanago ka go kwa ga motho o tee [Jesu Kriste] ba bantši ba tla dirwa ba lokilego.” (Baroma 5:19) Se se bontšha kamoo lehu la motho o tee le ka lefago topollo bakeng sa badiradibe ba bantši. Ge e le gabotse, sehlabelo sa Jesu ke “topollo e lekanago bakeng sa bohle” bao ba gatago megato e swanetšego gore e ba hole.—1 Timotheo 2:​5, 6.