Lentšu “soul” ka Beibeleng ke phetolelo ya lentšu la Seheberu neʹphesh le lentšu la Segerika psy·kheʹ. Lentšu leo la Seheberu ge e le gabotse le šupa go “sephedi se sengwe le se sengwe seo se bušago moya,” la Segerika le šupa go “sephedi.” a Ka gona moya soul, ke diphedi ka moka, e sego selo seo se lego ka go rena seo se phologago lehu. Ela hloko kamoo Beibele e bontšhago gore motho ke moya soul:

•   Ge Jehofa Modimo a be a bopa motho wa pele Adama, Beibele e re “motho ya ba moya o phelago.” (Genesi 2:7) Adama ga se a newa moya—eupša o ile a ba moya o phelago goba motho.

•   Beibele e re moya soul o ka kgona go šoma, wa kganyoga dijo, wa ja, wa kwa melao le go kgwatha mmele o hwilego. (Lefitiko 5:2; 7:20; 23:30; Doiteronomio 12:20; Baroma 13:1) Mediro yeo ka moka e ka dirwa ke motho.

Na moya soul ga o hwe?

 Aowa, moya soul o a hwa. Ditemana tše dintši tša Beibele di bolela gore moya soul o a hwa. Mehlala e mengwe še:

•   “Moya [soul] o dirago sebe, o tla hwa.”—Hesekiele 18:4, 20, King James Version.

•   Isiraeleng ya bogologolo, kotlo yeo e bego e newa motho yoo a dirilego sebe se segolo e be e le gore “moya [soul] woo o bolawe.” (Ekisodo 12:15, 19; Lefitiko 7:20, 21, 27; 19:8, King James Version.) Motho yoo o be a tla “bolawa.”—Ekisodo 31:14

•   Ka morago ga gore motho a hwe, lentšu “moya [soul] o hwilego” le dirišwa ge go bolelwa ka setopo ditemaneng tše dingwe tša Beibele. (Lefitiko 21:11, mongwalo wa tlase wa Reference Bible; Numeri 6:6, mongwalo wa tlase wa Reference Bible) Le ge diphetolelo tše dintši tša Beibele di diriša mantšu “setopo” goba “motho yo a hwilego” ditemaneng tšeo, Seheberu sa mathomo se diriša lentšu neʹphesh, goba “moya soul.”

Moya “Soul” o ka šupa “bophelo”

 Beibele gape e diriša moya “soul” e le lehlalosetša gotee la “bophelo.” Ka mohlala, Jobo 33:22 e diriša lentšu la Seheberu bakeng sa moya “soul” (neʹphesh) e le lehlalosetša gotee la “bophelo.” Ka mo go swanago, Beibele e bontšha gore moya soul, goba bophelo bja motho, o ka ba kotsing goba wa lobja.—Ekisodo 4:19; Baahlodi 9:17; Bafilipi 2:30.

 Go dirišwa mo go bjalo ga lentšu “soul” go re thuša go kwešiša gabotse ditemana tšeo di bolelago gore moya soul o a “tšwa” goba “o a tloga.” (Genesi 35:18; King James Version) Seka polelo se se bontšha gore motho o a hwa. Diphetolelo tše dingwe di bea polelwana e lego go Genesi 35:18 ka gore “o hema la mafelelo.”—Good News Translation; New Jerusalem Bible.

Tumelo ya go se hwe ga moya soul e tšwa kae?

 Dikereke tša Bokriste tšeo di dumelago gore moya soul ga o hwe ga se tša hwetša thuto ye ka Beibeleng eupša difilosofing tša bogologolo tša Segerika. Encyclopædia Britannica e re: “Ge Beibele e bolela ka soul e tswalanya seo le go hema gomme e bontšha gore ga go phapano magareng ga mmele le moya soul. Tumelo ya Bakriste ya gore go na le phapano magareng ga mmele le moya soul e thomile Gerikeng ya bogologolo.”

 Modimo ga a rate ge re tswalanya dithuto tša gagwe le difilosofi tša batho, go swana le tumelo ya gore moya soul ga o hwe. Go ena le moo, Beibele e re lemoša gore: “Kgonthišetšang gore go se be le yo a le thopago ka filosofi le bofora bja lefeela go ya ka tlwaelo ya batho.”—Bakolose 2:8.