Modimo o re hlomphile ka go re nea tokologo ya go ikgethela, e lego bokgoni bja go itirela diphetho go e na le gore a re kgethele e sa le pele seo re swanetšego go se dira. Ela hloko seo Beibele e se rutago.

•   Modimo o bopile batho ka seswantšho sa gagwe. (Genesi 1:26) Ka go se swane le diphoofolo tšeo gantši di laolwago ke tlhago, rena re swana le Mmopi wa rena ka gore re kgona go bontšha dika tše bjalo ka lerato le toka. Le gona ka go swana le Mmopi wa rena, re na le tokologo ya go ikgethela.

•   Rena re ka kgona go ikgethela bokamoso bja rena go fihla bokgoleng bjo itšego. Beibele e re kgothaletša gore re ‘kgethe bophelo ka go theetša lentšu la Modimo,’ e lego go kgetha go kwa ditaelo tša gagwe. (Doiteronomio 30:19, 20) Se se be se ka se be le morero e bile e be e tla ba taba e sehlogo ge nkabe re be re se na tokologo ya go ikgethela. Go e na le gore Modimo a re gapeletše go dira seo a se bolelago, ka borutho o re kgothaletša gore: “Ge feela le be le ka ela hloko ditaelo tša ka, gona khutšo ya lena e be e tla etša noka.”—Jesaya 48:18.

•   Ga go fo itiragalela gore re atlege goba re palelwe bophelong. Ge e ba re nyaka go atlega selong se itšego, re swanetše go šoma ka thata. Beibele e re: “Tšohle tšeo seatla sa gago se kgonago go di dira, di dire ka matla a gago ka moka.” (Mmoledi 9:10) E bile e re: “Maano a motho yo mafolofolo a a mo hola.”—Diema 21:5.

 Tokologo ya go ikgethela ke mpho e bohlokwa yeo e tšwago go Modimo, ka gobane e dira gore re mo rate ka ‘dipelo tša rena ka moka’—re sa gapeletšwe ke motho.—Mateo 22:37.

 Ke therešo gore Beibele e re ruta gore Modimo ke Ramatlaohle, gore matla a gagwe ga a lekanywe le selo. (Jobo 37:23; Jesaya 40:26) Lega go le bjalo, ga a diriše matla a gagwe go laola dilo ka moka. Ka mohlala, Beibele e re Modimo o ile a “itshwara” gore a se otle Babilona ya bogologolo, yeo e bego e le lenaba la batho ba gagwe. (Jesaya 42:14) Ka mo go swanago, le gona bjale o kgetha go kgotlelela batho bao ba dirišago gampe tokologo ya bona ya go ikgethela e le gore ba kweše ba bangwe bohloko. Eupša Modimo a ka se kgotlelele ka mo go sa felego.—Psalme 37:10, 11.