Puku ya Pele ya Dikgoši 12:1-33
12 Rehoboama a ya Shikeme, ka gobane Isiraele ka moka e be e tlile Shikeme go tlo mo dira kgoši.
2 Ge Jeroboama morwa wa Nebata a se na go kwa ka seo (o be a sa dutše a le Egepeta ka gobane o be a tšhabile Kgoši Solomone, gomme a dula moo),
3 banna ba Isiraele ba romela molaetša wa gore Jeroboama a bitšwe. Ka morago ga moo, Jeroboama le setšhaba ka moka sa Isiraele ba tla go Rehoboama gomme ba re:
4 “Tatago o be a dira gore re šome ga boima eupša wena ge o ka re fokoletša mošomo o boima woo tatago a bego a re file wona gomme wa re nolofaletša wona, gona re tla go hlankela.”
5 Ge ba realo, o ile a re go bona: “Sepelang gomme le boeng ka letšatši la boraro.” Ka gona setšhaba sa tloga.
6 Ke moka Kgoši Rehoboama a ya go kgopela keletšo go banna ba bagolo bao ba bego ba eletša Solomone tatagwe ge a be a sa phela, a re: “Le ka nkeletša gore ke arabe setšhaba se ke re’ng?”
7 Ba re go yena: “Ge lehono o ka ba mohlanka wa setšhaba se gomme wa theetša seo se go kgopelago sona, wa ba wa se fa karabo e botse, gona se tla dula se go hlankela.”
8 Eupša ga se a ka a diriša keletšo yeo banna ba bagolo ba bego ba mo file yona. Go e na le moo, o ile a tloga a yo nyaka keletšo go masogana ao a gotšego le ona, ao ka nako yeo a bego a mo hlankela.
9 A a botšiša a re: “Le ka nkeletša bjang? Le nagana gore re ka araba bjang setšhaba se seo se nkgopetšego gore ke se fokoletše mošomo o boima woo tate a bego a se file wona?”
10 Ke moka masogana ao a gotšego le yena a mmotša a re: “Botša setšhaba seo se boletšego le wena sa re: ‘Tatago o be a dira gore re šome ga boima, ka gona re fokoletše mošomo o boima woo tatago a bego a re file wona,’ o re: ‘Ke tla dira gore le šome ga boima go feta le kamoo tate a bego a dira gore le šome ka gona.*
11 Tate yena o be a dira gore le šome ga boima, eupša nna ke tla dira gore le šome ga boima le go feta. Tate yena o be a le itia ka difepi, eupša nna ke tla le itia ka difepi tšeo di nago le dintlhana.’”
12 Jeroboama le setšhaba ka moka ba boela go Rehoboama ka letšatši la boraro, ka ge kgoši e be e ba laetše ya re: “Boang go nna ka letšatši la boraro.”
13 Ke moka kgoši ya araba setšhaba ka bogale ya se diriše keletšo yeo banna ba bagolo ba bego ba e file yona.
14 Ya bolela le bona go ya ka keletšo ya masogana ale, ya re: “Tate o be a dira gore le šome ga boima eupša nna ke tla dira gore le šome ga boima le go feta. Tate o be a le itia ka difepi, eupša nna ke tla le itia ka difepi tše di nago le dintlhana.”
15 Eupša kgoši ya se ke ya theetša setšhaba ka gobane Jehofa o be a dirile gore dilo di direge ka tsela yeo e le gore go phethagale lentšu leo Jehofa a le boletšego a diriša Ahija wa Moshilo a le botša Jeroboama morwa wa Nebata.
16 Ge setšhaba sa Isiraele ka moka se bona gore kgoši e ganne go se theetša, se ile sa re go kgoši: “Ga re na taba le Dafida e bile ga re na taba le bohwa bja morwa wa Jese. Lena Baisiraele,* yo mongwe le yo mongwe a a ye go medimo ya gagwe. Lena ditlogolo tša Dafida, ipušeng!” Ka go realo ba boela magaeng* a bona.
17 Eupša Rehoboama a tšwela pele a buša Baisiraele bao bego ba dula metseng ya Juda.
18 Ka gona Kgoši Rehoboama a roma Adorama yoo a bego a laola bao ba bego ba ngwadišeditšwe go šoma mošomo wa kgapeletšo, eupša Baisiraele ka moka ba mo kgatla ka maswika go fihlela a ehwa. Kgoši Rehoboama a kgona go namela kariki ya gagwe ya ntwa gomme a tšhabela Jerusalema.
19 Ka gona Baisiraele ba hlanogela ba ntlo ya Dafida go ba go fihla le lehono.
20 Ge Baisiraele ka moka ba se na go kwa gore Jeroboama o boile, ba ile ba kgobokana gomme ba romela molaetša wa gore a bitšwe ke moka ba mo dira kgoši ya Isiraele ka moka. Ke moloko wa Juda feela woo o ilego wa dula o thekga bogoši bja ntlo ya Dafida.
21 Ge Rehoboama a se na go fihla Jerusalema, o ile a kgoboketša banna ka moka ba ntlo ya Juda le ba moloko wa Benjamini, e lego mašole a 180 000 (dikete tše lekgolo-masomeseswai) ao a tlwaeditšwego* gabotse gore a lwe le ba ntlo ya Isiraele e le gore ba bušetše bogoši go Rehoboama morwa wa Solomone.
22 Ke moka moporofeta* Shemaya a kwa lentšu la Modimo wa nnete le re go yena:
23 “Botša Rehoboama morwa wa Solomone kgoši ya Juda, le ba ntlo ya Juda ka moka le ya Benjamini gotee le batho ka moka, o re:
24 ‘Jehofa o re: “Le se ke la yo lwa le bana babo lena ba Baisiraele. Yo mongwe le yo mongwe wa lena a a boele ntlong ya gagwe ka gobane ke nna ke dirilego se.”’” Ka gona ba kwa lentšu la Jehofa gomme ba boela magaeng a bona ka ge Jehofa a be a ba laetše bjalo.
25 Ke moka Jeroboama a tsošološa Shikeme yeo e lego dithabeng tša Efuraime gomme a dula gona moo. Ka morago ga moo a ya a tsošološa Penuele.
26 Jeroboama a ipotša ka pelong ya gagwe a re: “Bjale mmušo o tlo boela go ba ntlo ya Dafida.
27 Ge e ba setšhaba se se tšwela pele se eya go dira dihlabelo ntlong ya Jehofa kua Jerusalema, gona se tla boela sa yo hlankela mong wa sona e lego Kgoši Rehoboama wa Juda. Ruri se tlo mpolaya gomme sa boela go Kgoši Rehoboama wa Juda.”
28 Ka morago ga gore kgoši e nyake keletšo go baeletši ba yona e ile ya dira dinamane tše pedi tša gauta gomme ya re go setšhaba: “Ga go hlokagale gore le ye Jerusalema. Lena Baisiraele, bonang Modimo wa lena šo, yena yoo a le ntšhitšego nageng ya Egepeta.”
29 Ke moka ya bea namane e nngwe Bethele ye nngwe ya e bea Dani.
30 Seo se ile sa dira gore setšhaba se dire sebe. Ka gona setšhaba se be se eya Dani yeo e bego e le kgole go yo rapela namane yeo e bego e le moo.
31 Ke moka kgoši ya dira dintlo tša go rapela medingwana mafelong a phagamego ya ba ya kgetha baperisita gare ga batho bao ba bego ba le moo bao e bego e se Balefi.
32 Le gona Jeroboama a dira monyanya ka letšatši la bo-15 la kgwedi ya seswai go swana le monyanya woo o bego o le Juda. Aletareng yeo a bego a e dirile Bethele, o ile a dira dihlabelo a di direla diswantšho tša dinamane tšeo a bego a di dirile gomme gona moo Bethele a bea baperisita mafelong a phagamego ao a bego a a dirile.
33 Ka lona letšatši leo la bo-15 la kgwedi ya seswai o ile a thoma go dira dibego aletareng yeo a bego a e dirile Bethele, e lego kgwedi yeo yena a ikgethetšego yona. Le gona, a direla Baisiraele monyanya gomme a ya aletareng go neela dibego le go dira dihlabelo tšeo di thuntšhago muši.
Mengwalo ya tlase
^ Phetolelo ya lentšu ka lentšu e re, “Monwana wa ka o monyenyane o tlo feta matheka a tate ka bokoto.”
^ Go molaleng gore mo go bolelwa ka Baisiraele ba meloko e lesome bao ba lego ka leboa.
^ Phetolelo ya lentšu ka lentšu e re, “ditenteng tša bona.”
^ Goba, “ao a kgethilwego.”
^ Phetolelo ya lentšu ka lentšu e re, “monna wa Modimo wa nnete.”
