Puku ya Pele ya Dikgoši 15:1-34
15 Abijama o bile kgoši ya Juda ngwageng wa bo-18 wa ge Kgoši Jeroboama morwa wa Nebata a buša.
2 O bušitše Jerusalema ka mengwaga e meraro. Leina la mmagwe e be e le Maaka setlogolo sa Abishalomo.
3 O ile a dira dibe ka moka tšeo tatagwe a ilego a di dira, e bile o be a sa rate* Jehofa Modimo wa gagwe ka pelo ka moka go swana le ge rakgolokhukhu wa gagwe Dafida a be a mo rata.
4 Eupša ka ge Jehofa Modimo wa gagwe a be a gopola Dafida, o ile a dumelela yo mongwe wa leloko la gagwe a buša Jerusalema ka go kgetha morwa wa Abijama gore e be kgoši legatong la gagwe le go dira gore Jerusalema e dule e le gona.
5 Ka gobane Dafida o dirile dilo tše dibotse pele ga Jehofa bophelo bja gagwe ka moka. Le gona ga se a ka a tlogela go dira selo le ge e le sefe seo Modimo a bego a mo laetše gore a se dire, go sa balwe dilo ka moka tšeo a di dirilego Uria wa Mohethe.
6 Rehoboama o lwele le Jeroboama bophelo bja gagwe ka moka.
7 Ditaba ka moka tša Abijama le dilo ka moka tšeo a di dirilego, di ngwadilwe ka pukung ya histori ya mehleng ya dikgoši tša Juda. Abijama le Jeroboama le bona ba be ba dula ba elwa.
8 Ke moka Abijama a hlokofala gomme ba mmoloka Motseng wa Dafida moo borakgolokhukhu ba gagwe ba boloketšwego gona, gomme morwa wa gagwe Asa a ba kgoši legatong la gagwe.
9 Asa o thomile go buša e le kgoši ya Juda ngwageng wa bo-20 wa ge Kgoši Jeroboama wa Isiraele a buša.
10 O bušitše Jerusalema ka mengwaga e 41. Leina la makgolo wa gagwe e be e le Maaka setlogolo sa Abishalomo.
11 Asa o ile a dira dilo tše dibotse pele ga Jehofa go swana le Dafida rakgolokhukhu wa gagwe.
12 O ile a fediša banna bao ba bego ba rekiša mmele tempeleng nageng yeo, gomme a tloša le medingwana ka moka yeo e šišimišago* yeo e bego e dirilwe ke borakgolokhukhu ba gagwe.
13 O ile a tloša le makgolo wa gagwe e lego Maaka maemong a gagwe e le gore a se sa ba mohumagadi yo a hlomphegago, ka gobane o be a dirile modingwana wo o šišimišago wo o dirišwago borapeding bja kota e kgethwa.* Asa o ile a rema modingwana woo gomme a o fiša Moeding wa Kidirone.
14 Eupša mafelo a phagamego ao go bego go rapelwa go ona ga se a ka a fedišwa. Lega go le bjalo, Asa o be a rata Jehofa ka pelo ya gagwe ka moka matšatšing ka moka a ge a be a sa phela.
15 O ile a tšea dilo tšeo yena le tatagwe ba bego ba di kgethagaditše a di iša ka ntlong ya Jehofa. Dilo tšeo e be e le silifera, gauta le dibjana tša go fapafapana.
16 Asa le Baasha kgoši ya Isiraele ba be ba dulela go lwa.
17 Ka gona Baasha kgoši ya Isiraele o ile a hlasela Juda gomme a thoma go tsošološa Rama, e le gore go se ke gwa ba le motho yo a tsenago goba yoo a tšwago nageng ya Asa kgoši ya Juda.
18 Ka baka leo, Asa o ile a tšea silifera le gauta ka moka tšeo di bego di šetše mahumong ao a bego a le ntlong ya Jehofa le ao a bego a le ntlong ya kgoši gomme a di fa bahlanka ba gagwe, ke moka Kgoši Asa a di romela go Bene-hadada morwa wa Tabarimoni morwa wa Hesioni kgoši ya Siria, yoo a bego a dula Damaseko, a re:
19 “Nna le wena re dirile kgwerano go swana le ge tate a be a dirile kgwerano le tatago. Ke go romela mpho ya silifera le ya gauta, bjale senya kgwerano yeo o e dirilego le Kgoši Baasha wa Isiraele, e le gore a kgaogane le nna.”
20 Ka gona Bene-hadada a theetša Kgoši Asa gomme a romela baetapele ba mašole a gagwe gore ba yo lwa le metse ya Isiraele. Ba hlasela Ijoni, Dani, Abele-bethe-maaka le Khinerethe ka moka le naga ka moka ya Nafutali.
21 Ge Baasha a ekwa ka seo, o ile a tlogela go tsošološa Rama kapelapela gomme a tšwela pele a dula Thiritsa.
22 Ke moka Kgoši Asa a bitša Bajuda ka moka, go be go se na yo a šetšego gomme ba rwala maswika le dikota tša Rama tšeo Baasha a bego a tsošološa motse wa Rama ka tšona. Ke moka Kgoši Asa a tsošološa Geba yeo e lego Benjamini le Mitsipa ka maswika le dikota tšeo.
23 Ditaba ka moka tša Asa, dilo tšohle tšeo a di dirilego ka matla a gagwe, dilo ka moka tšeo a di dirilego, gotee le metse ka moka yeo a e tsošološitšego, di ngwadilwe ka pukung ya histori ya mehleng ya dikgoši tša Juda. Eupša ge Kgoši Asa a tšofetše o ile a swarwa ke bolwetši bja maoto.
24 Ke moka a hlokofala go no swana le borakgolokhukhu ba gagwe gomme a bolokwa le bona Motseng wa Dafida rakgolokhukhu wa gagwe. Ka gona, morwa wa gagwe Jehoshafate a ba kgoši legatong la gagwe.
25 Nadaba morwa wa Jeroboama e bile kgoši ya Isiraele ngwageng wa bobedi wa ge Kgoši Asa wa Juda a buša, gomme o bušitše Isiraele ka mengwaga e mebedi.
26 O ile a tšwela pele a dira dilo tše mpe pele ga Jehofa gomme a ekiša dilo tšeo tatagwe a di dirilego, a dira sebe seo tatagwe a ilego a dira gore Baisiraele ba se dire.
27 Ka gona Baasha morwa wa Ahija wa moloko wa Isakara a mo logela maanomabe, gomme a mmolaela Gibethone ya Bafilisita nakong ya ge Nadaba le Baisiraele ka moka ba be ba thibile Gibethone.
28 Ka gona Baasha o ile a mmolaya ka ngwaga wa boraro wa ge Kgoši Asa wa Juda a buša. Ke moka Baasha a ba kgoši legatong la Nadaba.
29 Ge Baasha a se na go ba kgoši o ile a bolaya ba lapa la Jeroboama ka moka, a bolaya le batho ka moka bao ba bego ba tswalana le Jeroboama. O ile a ba fediša go dumelelana le seo Jehofa a se boletšego a diriša mohlanka wa gagwe Ahija wa Moshilo.
30 Se se diregile ka baka la dibe tšeo Jeroboama a di dirilego le tšeo a dirilego gore Isiraele e di dire le ka gobane o be a kgopišitše Jehofa Modimo wa Isiraele kudu.
31 Ditaba ka moka tša Nadaba le dilo ka moka tšeo a di dirilego di ngwadilwe ka pukung ya histori ya mehleng ya dikgoši tša Isiraele.
32 Asa le Kgoši Baasha wa Isiraele ba be ba dula ba elwa.
33 Ka ngwaga wa boraro wa ge Asa kgoši ya Juda a buša, Baasha morwa wa Ahija o ile a ba kgoši ya Isiraele ka moka ka mengwaga e 24. O be a buša a le Thiritsa.
34 Eupša o ile a tšwela pele a dira dilo tše mpe pele ga Jehofa gomme a dira dibe tšeo Jeroboama a di dirilego le tšeo a dirilego gore Isiraele e di dire.
Mengwalo ya tlase
^ Goba, “o be a se a ineela go Jehofa Modimo wa gagwe ka pelo ka moka.”
^ Lentšu la Seheberu leo le sepedišanago le “šišimišago” le ka bolela boloko goba selo seo motho a ka se nyakego go se lebelela.
^ Bona Tlhaloso ya Mantšu.
