Puku ya Pele ya Dikoronika 19:1-19
19 Ka morago ga moo Nahashi kgoši ya Baamoni a hlokofala gomme morwa wa gagwe a ba kgoši legatong la gagwe.
2 Ke moka Dafida a re: “Ke tla bontšha Hanuni morwa wa Nahashi botho* ka baka la gore tatagwe o mpontšhitše botho.” Ka gona Dafida a romela bahlanka ba gagwe gore ba ye go mo kgothatša ka ge a hlokofaletšwe ke tatagwe, eupša ge bahlanka ba Dafida ba fihla nageng ya Baamoni gore ba yo homotša Hanuni,
3 baetapele ba Baamoni ba botša Hanuni ba re: “Na o nagana gore Dafida o hlompha tatago ge a romela batho gore ba tle ba go homotše? Na ga se a ba roma gore ba tle ba nyakišiše ka motse wo le go o hlola gore ba tle ba kgone go go fenya?”
4 Ka gona Hanuni a tšea bahlanka ba Dafida a ba kota ditedu gomme a ripa diaparo tša bona mo maragong ke moka a re ba sepele.
5 Ge Dafida a botšwa ka seo se diragaletšego banna bao, gateetee o ile a romela banna gore ba ba gahlanetše, ka gobane banna bao ba be ba tlontlolotšwe kudu. Ke moka kgoši ya re go bona: “Dulang Jeriko go fihlela ditedu tša lena di gola, ke moka le tla kgona le boa.”
6 Ka morago Baamoni ba lemoga gore Dafida o ba hloile kudu, ke moka Hanuni le Baamoni ba romela silifera yeo e imelago dikhilokgerama tše 34 000 (dikete tše masometharo-nne)* Mesopotamia, Arama-maaka le Tsoba, gore ba hire dikariki tša ntwa le banamedi ba dipere.
7 Ka baka leo ba ile ba hira dikariki tša ntwa tše 32 000 (dikete tše masometharo-pedi) ba ba ba hira le kgoši ya Maaka le batho ba yona ke moka ba tla ba kampa Medeba. Baamoni ba tšwa metseng ya bona, ba kgobokana gomme ba ya ntweng.
8 Ge Dafida a ekwa ka seo, a romela Joaba le mašole ka moka go akaretša le mašole a gagwe a matla.
9 Baamoni ba tšwa ba itokišetša ntwa keiting ya motse mola dikgoši tšeo di bego di tlile ntweng di eme di nnoši molaleng.
10 Ge Joaba a bona gore o be a hlaselwa ke manaba ka pele le ka morago, o ile a kgetha a mangwe a mašole a gagwe a matla Isiraeleng a a lokišeletša ntwa gore a yo lwa le Basiria.
11 A bea ngwanabo e lego Abishai gore e be molaodi wa mašole a mangwe ka moka e le gore ba itokišeletše go yo lwa le Baamoni.
12 Ke moka a re: “Ge Basiria ba le kgauswi le go mphenya wena o tle o nthuše, eupša ge e ba Baamoni ba le kgauswi le go go fenya, gona le nna ke tla tla ke go thuša.
13 Re swanetše go ba matla gomme re lwele batho ba gabo rena le metse ya Modimo wa rena ka sebete, gomme Jehofa yena o tla dira seo a bonago se lokile.”
14 Ke moka Joaba le mašole ao a bego a na le yena, ba tšwa ba yo lwa le Basiria gomme Basiria ba tšhaba pele ga gagwe.
15 Ge Baamoni ba bona gore Basiria ba tšhabile le bona ba ile ba tšhaba ngwanabo e lego Abishai gomme ba boela motseng. Ka morago Joaba a tla Jerusalema.
16 Ge Basiria ba bona gore Baisiraele ba ba fentše, ba romela molaetša go Basiria bao ba bego ba dula kgauswi le Noka* gore ba tle ba ba thuše, ba etilwe pele ke Shofake yo e lego molaodi wa mašole a Hadadesere.
17 Ge Dafida a ekwa seo, gateetee a kgobokanya mašole ka moka a Baisiraele gomme a tshela Noka ya Jorodane ke moka a ya go Basiria gomme a itokišeletša go lwa le bona. Dafida o ile a itokišeletša go yo lwa le Basiria gomme bona ba ile ba lwa le yena.
18 Eupša Basiria ba ile ba tšhaba Baisiraele gomme Dafida a bolaya mašole a 7 000 (dikete tše šupa) ao a bego a nametše dikariki tša ntwa ke moka a bolaya le mašole a 40 000 (dikete tše masomenne) a Basiria ao a bego a sepela ka maoto, a ba a bolaya le Shofake moetapele wa mašole.
19 Ge bahlanka ba Hadadesere ba bona gore Baisiraele ba ba fentše, ba napa ba dira khutšo le Dafida gomme ba ba bahlanka ba gagwe. Ke moka Basiria ba se sa hlwa ba nyaka go thuša Baamoni.
Mengwalo ya tlase
^ Goba, “lerato le le botegago.”
^ Phetolelo ya lentšu ka lentšu e re, “ditalente tše 1 000 tša silifera.” Talente e tee e lekana le dikhilokgerama tše 34,2. Bona Dit. B14.
^ Ke gore, ya Eforate.
