Puku ya Pele ya Dikoronika 26:1-32
26 Dihlopha tša bao ba bego ba leta dikeiti ke tše: Go Bakora, e be e le Meshelemia morwa wa Kore yo a tšwago go barwa ba Asafa.
2 Meshelemia o be a na le barwa. Morwa wa gagwe wa mathomo e be e le Sakaria, wa bobedi e le Jediale, wa boraro e le Sebadia, wa bone e le Jathiniele,
3 wa bohlano e le Elama, wa botshelela e le Jehohanani gomme wa bošupa e le Elieho-enai.
4 Obede-edomo o be a na le barwa. Morwa wa gagwe wa mathomo e be ele Shemaya, wa bobedi e le Jehosabadi, wa boraro e le Joa, wa bone e le Sakara, wa bohlano e le Nethanele,
5 wa botshelela e le Amiele, wa bošupa e le Isakara gomme wa boseswai e le Peulethai, ka gobane Modimo o be a mo šegofaditše.
6 Morwa wa gagwe e lego Shemaya o be a belegetšwe barwa bao e bego e le baetapele ba malapa a botatago bona, ka gobane ba be ba na le matla le bokgoni.
7 Barwa ba Shemaya, e lego Othini, Refaele, Obede le Elisabadi gotee le banababo e lego Elihu le Semakia, le bona ba be ba na le bokgoni.
8 Ba ka moka ga bona ba be ba etšwa go barwa ba Obede-edomo. Le gona, bona le barwa ba bona gotee le banababo bona, ba be ba na le bokgoni e bile ba swanelega go hlankela. E be e le ditho tše 62 tša lapa la Obede-edomo.
9 Meshelemia o be a na le barwa le banababo , e be e le banna ba 18 bao ba nago le bokgoni bja go dira dilo tše itšego.
10 Le gona, Hosa yo a bego a etšwa go barwa ba Merari o be a na le barwa. Moetapele wa bona e be e le Shimiri. Le ge e be e se ngwana wa mathomo, tatagwe o ile a mo kgetha gore e be moetapele.
11 Wa bobedi e be e le Hilikia, wa boraro e le Tebalia gomme wa bone e le Sakaria. Barwa ba Hosa ka moka le banababo e be e le ba 13.
12 Go dihlopha tša batho ba bao ba bego ba leta dikeiti, baetapele ba be ba na le boikarabelo bjo bo swanago le bja banababo bona, e lego go hlankela ntlong ya Jehofa.
13 Ka gona ba ile ba direla yo mogolo le yo monyenyane matengwa* ka tsela ya go swana go ya ka malapa a botatago bona, gore ba bone gore keiting e nngwe le e nngwe go be go tlo šoma bomang.
14 Ke moka ge ba be ba dira matengwa a ka keiting ya ka bohlabela, go ile gwa tšwa leina la Shelemia. Ge ba be ba dira matengwa a ka keiting ya ka leboa, go ile gwa tšwa leina la Sakaria morwa wa gagwe yoo e bego e le moeletši yo bohlale.
15 Ge ba be ba dira matengwa a ka keiting ya ka borwa, go ile gwa tšwa leina la Obede-edomo gomme barwa ba gagwe ba ile ba fiwa mošomo wa go hlokomela dintlo tšeo go bewago dilo go tšona.
16 Leina la Shupima le la Hosa a ile a tšwa ge ba be ba dira matengwa a ka bodikela kgauswi le Keiti ya Shalekete tseleng e kgolo yeo e rotogago, gomme sehlopha se sengwe sa go leta se be se lebane le sehlopha se sengwe sa go leta.
17 Letšatši le lengwe le le lengwe ka lehlakoreng la bohlabela go be go e ba le Balefi ba tshelelago, ka lehlakoreng la leboa e le ba bane, ka lehlakoreng la borwa e le ba bane gomme dintlong tšeo go bego go bewa dilo go tšona, go be go ema batho ba babedi ba go leta kgauswi le ba bangwe ba babedi ba go leta.
18 Ntlong yeo e dirilwego ka diphilara, ka thoko ya bodikela go be go ema batho ba bane ba go leta tseleng e kgolo gomme ba babedi ba ema ntlong yeo e dirilwego ka diphilara.
19 Tše e be e le dihlopha tša batho ba go leta dikeiti go tšwa ditlogolong tša Kora le tša Merari.
20 Go Balefi, Ahija o be a hlokometše diphapoši tšeo di bego di na le matlotlo a ntlo ya Modimo wa nnete le diphapoši tšeo di bego di na le matlotlo a dilo tšeo di kgethagaditšwego.
21 Gare ga barwa ba Ladana, ke gore, gare ga barwa ba ditlogolo tša Ladana, go be go na le Jehieli, e lego yo mongwe wa baetapele ba malapa a botatago Ladana wa Mogerishone.
22 E bile go na le barwa ba Jehieli e lego Sethama le ngwanabo e lego Joele. Ba be ba hlokometše matlotlo a ntlong ya Jehofa.
23 Go Baamorama, Baitsehara, Baheburone le Bausiele,
24 moetapele yo a bego a hlokometše dintlo tšeo go bewago dilo go tšona, e be e le Shebuele morwa wa Gerishome morwa wa Moshe.
25 Banababo bao e bego e le ditlogolo tša Eliesere e be e le Rehabia, Jeshaya, Jorame, Sikiri le Shelomotha.
26 Shelomotha yo le banababo ba be ba hlokometše matlotlo ka moka a dilo tšeo di kgethagaditšwego, tšeo Kgoši Dafida, baetapele ba malapa a botatago bona le baetapele ba batho ba sekete le ba lekgolo le baetapele ba mašole ba bego ba di kgethagaditše.
27 Ba tšere tše dingwe tša dilo tšeo ba di hweditšego dintweng, ba di kgethagatša e le gore ba hlokomele ntlo ya Jehofa.
28 Ba tšea le dilo ka moka tšeo Samuele yo a bego a bona dipono, Saulo morwa wa Kishe, Abenere morwa wa Nere le Joaba morwa wa Tseruya ba bego ba di kgethagaditše. Dilo ka moka tšeo di bego di kgethagaditšwe di ile tša hlokomelwa ke Shelomithe le banababo .
29 Go Baitsehara, Kenania le barwa ba gagwe ba be ba abetšwe go dira mešomo ya ka ntle ga ntlo ya Modimo, e bjalo ka go ba baetapele le go ba baahlodi ba Baisiraele.
30 Go Baheburone, Hashabia le banababo , e lego banna ba 1 700 (sekete le makgolo a šupa) bao ba nago le bokgoni, ba be ba abetšwe gore ba hlokomele Baisiraele bao ba bego ba dira mošomo wa Jehofa le wa kgoši tikologong ya Jorodane ka thoko ya bodikela.
31 Ka ngwaga wa bo-40 wa ge Dafida e le kgoši, go Baheburone, Jerija e be e le yena moetapele wa malapa a botatago bona le malapa a Baheburone. Go ile gwa nyakiwa banna ba matla e bile ba na le bokgoni gomme ba hwetšwa kua Jatsera yeo e lego Gileada.
32 Banababo bao ba bego ba na le bokgoni bja go dira mešomo e itšego e bile e le baetapele ba malapa a botatago bona, e be e le banna ba 2 700 (dikete tše pedi le makgolo a šupa). Ka gona Kgoši Dafida o ile a ba abela gore ba hlokomele Barubeni, Bagada le seripa sa moloko wa Manase bakeng sa taba e nngwe le e nngwe yeo e sepedišanago le Modimo wa nnete le mabapi le kgoši.
Mengwalo ya tlase
^ Bona Tlhaloso ya Mantšu.
