Puku ya Pele ya Samuele 13:1-23
13 Saulo o be a na le mengwaga e …* ge a be a thoma go buša gomme o bušitše Isiraele ka mengwaga e mebedi.
2 Saulo o ile a kgetha banna ba 3 000 (dikete tše tharo) go Baisiraele, ba 2 000 (dikete tše pedi) ba ile ba ba le Saulo kua Mikimashe le tikologong ya dithaba tša Bethele, gomme ba 1 000 (sekete) ba ba le Jonathane kua Gibea ya Benjamini. O ile a laela batho bao ba šetšego gore ba boele ditenteng tša bona.
3 Ke moka Jonathane a bolaya mašole a Bafilisita ao a bego a le Geba, gomme Bafilisita ba kwa ka seo. Saulo a laela gore go letšwe naka nageng ka moka, go thwe: “Anke Baheberu ba theetše!”
4 Baisiraele ka moka ba be ba boditšwe gore: “Saulo o bolaile mašole a Bafilisita gomme Baisiraele ba hloilwe ke Bafilisita.” Batho ba kgoboketšwa gore ba latele Saulo go ya Giligala.
5 Bafilisita le bona ba kgobokana gore ba yo lwa le Baisiraele, ba na le dikoloi tša ntwa tše 30 000 (dikete tše masome a mararo) le banamedi ba dipere ba 6 000 (dikete tše tshelelago) gotee le batho ba bantši bao ba swanago le santa ya lewatle. Ba rotoga ba yo hloma ditente Mikimashe ka bohlabela bja Bethe-abene.
6 Banna ba Isiraele ba bona gore ba mathateng, ka gobane ba be ba gateletšwe kudu. Ke moka batho ba ikuta ka maweng, meleteng, magageng, mafelong a ka tlase gotee le ka didibeng.
7 Baheberu ba bangwe ba ile ba ba ba tshela Noka ya Jorodane ba ya nageng ya Gada le ya Gileada. Eupša Saulo yena o be a sa le Giligala gomme batho ka moka bao ba bego ba mo šetše morago ba be ba tšhogile.
8 O ile a dula a letile ka matšatši a šupago go fihla ka nako yeo Samuele a bego a re o tla fihla ka yona. Eupša Samuele ga se a ka a tla Giligala gomme batho ba thoma go phatlalala ba tlogela Saulo.
9 Mafelelong Saulo a re: “Ntlišetšeng sehlabelo sa go fišwa le sehlabelo sa go dira khutšo le Modimo.” Ke moka a dira sehlabelo sa go fišwa.
10 Gateetee ge a fetša go dira sehlabelo sa go fišwa, Samuele a fihla. Saulo a yo mo gahlanetša gomme a mo dumediša.
11 Samuele a re: “O dirile’ng?” Saulo a re: “Ke bone o sa fihle ka nako yeo o itšego o tlo fihla ka yona gomme batho ba ntlogela, le gona Bafilisita ba be ba kgobokana kua Mikimashe.
12 Ka gona ka re: ‘Bjale gona Bafilisita ba tla tla ba elwa le nna mo Giligala mola ke se ka tšwa ke kgopela Jehofa gore a ntšhegofatše.’ Ka gona ka ikwa ke gapeletšega go dira sehlabelo sa go fišwa.”
13 Samuele a re go Saulo: “O dirile tša bošilo. Ga se wa latela taelo yeo Jehofa Modimo wa gago a go neilego yona. Ge nkabe o ile wa e latela, Jehofa o be a tla tiiša mmušo wa gago Isiraeleng go ya go ile.
14 Bjale mmušo wa gago o ka se ke wa ba gona go ya go ile. Jehofa o tla ikhweletša motho yo a mo kgahlago, gomme Jehofa o tla mo kgetha go ba moetapele wa setšhaba sa gagwe, ka gobane wena ga se wa latela seo Jehofa a go boditšego sona.”
15 Ke moka Samuele a tloga Giligala a ya Gibea ya Benjamini. Saulo yena a bala batho bao ba bego ba na le yena, a hwetša e le banna bao e ka bago ba 600 (makgolo a tshelelago).
16 Saulo le morwa wa gagwe Jonathane gotee le batho bao ba bego ba na le bona ba be ba dula Geba ya Benjamini. Bafilisita bona ba be ba dula ditenteng kua Mikimashe.
17 Mašole a tšwa kampeng ya Bafilisita ka dihlopha tše tharo. Sehlopha se sengwe sa leba tseleng e yago Ofura nageng ya Shuali.
18 Sehlopha se sengwe sa leba tseleng e yago Bethe-horoni gomme sehlopha sa boraro sa leba tseleng e yago mollwaneng wo o lebanego le moedi wa Tseboima, go ya lešokeng.
19 Ka gona, Bafilisita ba ile ba kgonthišetša gore ga go na motho yo a šalago yo a šomago ka tšhipi kua Isiraele, ka gobane ba be ba sa nyake gore Baheberu ba kgone go dira disabola goba marumo a go itwela.
20 Baisiraele ka moka ba ile ba swanelwa ke go ya go Bafilisita gore ba ye ba loutše megoma, dipeke, dilepe le disekela.
21 Go loutša megoma, dipeke, diforoko tša meno a mararo, dilepe le lepara la ntlhana la go gapa dikgomo go be go lefelelwa ka silifera ya go imela digrama tše e ka bago tše seswai.*
22 Ga go motho le ge e le ofe go bao ba bego ba na le Saulo le Jonathane, yo a bego a na le sabola le lerumo letšatšing la ntwa, e be e le Saulo le morwa wa gagwe Jonathane feela bao ba bego ba itlhamile.
23 Mašole a Bafilisita a tšwa a ya tseleng e fetago moeding wa Mikimashe.
Mengwalo ya tlase
^ Palo ye ga e gona mongwalong wa Seheberu.
^ Phetolelo ya lentšu ka lentšu e re, “Pimi.” Pimi ke sekala seo se bego se dirišwa mehleng ya kgale. Bona Dit. B14.
