Puku ya Bobedi ya Dikgoši 1:1-18
-
Eliya o bolela e sa le pele ka lehu la Ahasia (1-18)
1 Ka morago ga lehu la Ahaba, Bamoaba ba ile ba thoma go lwa le Baisiraele.
2 Ka letšatši le lengwe Ahasia o ile a wela fase ka lefasetere* leo le bego le le tlhakeng ya phapoši ya gagwe ya ka godimo ya kua Samaria gomme a gobala. Ka gona a roma baromiwa a re go bona: “Eyang go Baali-tsebubu modimo wa Ekirone le mmotšiše gore ke tla fola naa?”
3 Eupša morongwa wa Jehofa a re go Eliya wa Mothishibe: “Eya go yo gahlanetša baromiwa ba kgoši ya Samaria gomme o re go bona: ‘Na ke ka gobane mo Isiraele ga go na Modimo ge le eya go botšiša Baali-tsebubu modimo wa Ekirone?
4 Ka gona Jehofa o re: “O ka se fologe mpeteng wo o robetšego go wona ka gobane o tlo hwa.”’” Eliya a re go bolela bjalo a sepela.
5 Ge baromiwa ba boa go Ahasia, a napa a re go bona: “Ke ka baka la eng le boile?”
6 Ba re go yena: “Go na le monna yo a ilego a tla go re gahlanetša gomme a re go rena: ‘Boelang go kgoši yeo e le romilego le e botše le re: “Jehofa o re: ‘Na ke ka gobane mo Isiraele ga go na Modimo ge le eya go botšiša Baali-tsebubu modimo wa Ekirone? Ka gona o ka se fologe mpeteng wo o robetšego go wona ka gobane o tlo hwa.’”’”
7 Ge ba realo a re: “Monna yo a tlilego go le gahlanetša a ba a le botša mantšu a o bjang?”
8 Ba re go yena: “Monna yo o be a apere seaparo sa boya a itlemile matheka ka lepanta la letlalo.” Ahasia a napa a re: “E be e le Eliya wa Mothishibe.”
9 Kgoši Ahasia a roma molaodi wa mašole a 50 go Eliya a na le mašole a gagwe a 50. Ge molaodi yoo a eya go Eliya, o mo hweditše a dutše godimo ga thaba. A re go yena: “Wena mohlanka wa Modimo wa nnete, kgoši e re: ‘Theoga moo thabeng.’”
10 Eupša Eliya a re go molaodi yoo wa mašole a 50: “Ge e ba ke le mohlanka wa Modimo, gona anke mollo o theoge o etšwa magodimong gomme o fiše wena le mašole a gago a 50.” Ke moka mollo wa theoga magodimong gomme wa fiša molaodi yoo le mašole a gagwe a 50.
11 Ka gona Kgoši Ahasia a romela molaodi yo mongwe wa mašole a 50 go Eliya, molaodi yoo o be a na le mašole a gagwe a 50. Ge a fihla go Eliya a re: “Wena mohlanka wa Modimo wa nnete, kgoši e re: ‘Theoga moo thabeng kapelapela.’”
12 Eupša Eliya a re go bona: “Ge e ba ke le mohlanka wa Modimo wa nnete, gona anke mollo o theoge o etšwa magodimong gomme o fiše wena le mašole a gago a 50.” Ke moka mollo wa Modimo wa theoga o etšwa magodimong gomme wa fiša molaodi yoo le mašole a gagwe a 50.
13 Ke moka Kgoši Ahasia a romela molaodi wa boraro wa mašole a 50 a na le mašole a gagwe a 50. Eupša ge molaodi yoo wa boraro a fihla go Eliya o ile a khunama ke moka a mo kgopela a re: “Wena mohlanka wa Modimo wa nnete, hle kwela nna le mašole a ka a 50 bohloko.
14 Mollo o šetše o theogile magodimong gomme wa tšhuma molaodi yo mongwe le yo mongwe gotee le sehlopha sa gagwe sa mašole a 50. Eupša ke kgopela o nkwele bohloko gomme o se ke wa mpolaya.”
15 Ge a realo morongwa wa Jehofa a bolela le Eliya a re: “Sepela le yena. O se ke wa mo tšhaba.” Ka gona Eliya a emelela a ya le molaodi yoo go kgoši.
16 Ke moka Eliya a re go kgoši: “Jehofa o re: ‘O romile baromiwa gore ba ye ba botšiše Baali-tsebubu modimo wa Ekirone, na ke ka gobane mo Isiraele ga go na Modimo? Ke ka baka la eng o se wa mmotšiša? Ka lebaka leo, o ka se fologe mpeteng woo o robetšego go wona ka gobane o tlo hwa.’”
17 Ka gona o ile a hlokofala go etša ge Jehofa a boletše bjalo a diriša Eliya. Le gona ka ge a be a se na morwa, moratho wa gagwe Jehorama o ile a ba kgoši legatong la gagwe ngwageng wa bobedi wa ge go buša Jehorama morwa wa Jehoshafate kgoši ya Juda.
18 Ditaba ka moka tša Ahasia le dilo tšeo a di dirilego, di ngwadilwe ka pukung ya histori ya mehleng ya dikgoši tša Isiraele.
Mengwalo ya tlase
^ Mohlomongwe lefasetere leo le be le diretšwe go tsentšha seetša gomme le thibilwe ka dikota.
