Puku ya Bobedi ya Dikgoši 9:1-37
9 Moporofeta Elisha a bitša yo mongwe wa barwa ba baporofeta a re go yena: “Tlema diaparo tša gago lethekeng, o tšee lepotlelo le la makhura kapelapela gomme o ye Ramothe-gileada.
2 Ge o fihla moo, o nyake Jehu morwa wa Jehoshafate morwa wa Nimishi gona moo gomme o mo kgopele gore a tloge go baetapele ba mašole ke moka o mmiletše ka phapošing ya ka garegare.
3 O tšee lepotlelo la makhura, o mo tšhele ka makhura ao hlogong, gomme o re: ‘Jehofa o re: “Ke go tlotša gore o be kgoši ya Isiraele.”’ Ke moka o bule lebati o tšhabe kapelapela.”
4 Ke moka morwa yoo wa moporofeta, a tloga a ya Ramothe-gileada.
5 Ge a fihla moo, a hwetša balaodi ba mašole ba dutše fase. A re: “Ke go swaretše molaetša wena molaodi.” Jehu a re: “O ra mang mo go rena ka moka?” Morwa yoo wa moporofeta a re: “Ke ra wena molaodi.”
6 Ka gona Jehu a emelela a tsena ka ntlong. Ke moka morwa wa moporofeta a mo tšhela ka makhura hlogong gomme a re: “Jehofa Modimo wa Isiraele o re: ‘Ke go tlotša gore o be kgoši ya setšhaba sa Jehofa, sona setšhaba sa Isiraele.
7 O swanetše go bolaya ba ntlo ya Ahaba mong wa gago gomme nna ke tla lefeletša madi a bahlanka ba ka e lego baporofeta le madi a bahlanka ka moka ba Jehofa bao ba bolailwego ke Isebele.
8 Batho ka moka ba ntlong ya Ahaba ba tlo hwa gomme nna ke tlo bolaya monna yo mongwe le yo mongwe wa ntlong ya Ahaba gotee le banna bao ba se nago mohola le ba maemo a tlase ba Isiraele.
9 Ke tla dira ba ntlo ya Ahaba tšeo ke di dirilego ba ntlo ya Jeroboama morwa wa Nebata le tšeo ke di dirilego ba ntlo ya Baasha morwa wa Ahija.
10 Isebele yena o tla jewa ke dimpša tšhemong yeo e lego Jeseriele e bile go ka se be le motho yo a tlago go mmoloka.’” Ge a fetša go realo a bula mojako a ja fase.
11 Jehu yena a boela go bahlanka ba mong wa gagwe, gomme bona ba re go yena: “Na dilo ka moka di sepela gabotse? Ke ka baka la eng segaswi se se be se tlile go wena?” Ke moka yena a re: “Le tseba monna yo gabotse le kamoo a bolelago ka gona.”
12 Eupša bona ba re: “O bolela maaka! Hle re botše gore o itšeng.” Ke moka Jehu a ba botša seo morwa wa moporofeta a mmoditšego sona a ba a ba botša le gore morwa wa moporofeta yoo o itše: “Jehofa o re: ‘Ke go tlotša gore o be kgoši ya Isiraele.’”
13 Ge a se na go realo, baetapele bao ba mašole ba tšea diaparo tša bona kapelapela ba di ala godimo ga ditepisi tšeo di bego di sa alwa selo moo a bego a tlo gata gona. Ke moka ba letša naka ba re: “Jehu ke kgoši!”
14 Ke moka Jehu morwa wa Jehoshafate morwa wa Nimishi a logela Jehorama maanomabe.
Jehorama le mašole ka moka a Isiraele, ba be ba le Ramothe-gileada ba šireleditše Baisiraele gore Hasaele kgoši ya Siria, a se ke a ba hlasela.
15 Ka morago Kgoši Jehorama a boela Jeseriele gore a ye a fole dintho tšeo Basiria ba bego ba mmaketše tšona ge a be a ile go lwa le Kgoši Hasaele wa Siria.
Jehu a re: “Ge e ba o nthekga, o se ke wa dumelela motho le ge e le ofe gore a tšhabe mo motseng a ye Jeseriele go yo bolela ka taba ye.”
16 Ke moka Jehu a namela kariki ya gagwe ya ntwa a ya Jeseriele ka gobane Jehorama o be a le moo a gobetše e bile Kgoši Ahasia wa Juda o be a ile go yo bona Jehorama.
17 Ge moleti wa motse a be a eme godimo ga tora ya Jeseriele, o ile a bona Jehu a etla a na le banna ba bantšhi, ke moka moleti yoo a re: “Ke bona banna ba bantšhi.” Jehorama a re: “Roma lešole la go namela pere gore le ye le mo gahlanetše ke moka le re: ‘Na o tlile ka khutšo?’”
18 Ka gona lešole la go namela pere la ya la mo gahlanetša gomme la re: “Kgoši e re: ‘Na o tlile ka khutšo?’” Eupša Jehu a re: “O tseba eng ka khutšo wena? Ntšhale morago!”
Ke moka moleti yoo a ya a begela kgoši a re: “Lešole leo re le romilego le fihlile go Jehu le mašole a gagwe eupša ga se la boa.”
19 Ka gona moleti wa motse a romela lešole la bobedi la go namela pere leo le ilego la fihla go Jehu le mašole a gagwe la re: “Kgoši e re: ‘Na o tlile ka khutšo?’” Eupša Jehu a re: “O tseba eng ka khutšo wena? Ntšhale morago!”
20 Ke moka moleti yoo a bega a re: “Lešole le fihlile go bona, eupša ga se la boa e bile tsela yeo kariki ya ntwa e otlelwago ka yona okare e otlelwa ke Jehu setlogolo* sa Nimishi, ka gobane o otlela go swana le segaswi.”
21 Jehorama a re: “Lokišang kariki ya ntwa!” Ka gona ba lokiša kariki ya gagwe ya ntwa gomme Kgoši Jehorama wa Isiraele le Kgoši Ahasia wa Juda ba tšwa ba yo gahlanetša Jehu, yo mongwe le yo mongwe a nametše kariki ya gagwe ya ntwa ba kopana le yena tšhemong ya Nabothe wa Mojeseriele.
22 Ge Jehorama a se na go bona Jehu, a re: “Jehu, na o tlile ka khutšo?” Eupša Jehu a re: “Nka tla ka khutšo bjang mola mmago Isebele a sa gweba ka mmele e bile a dira dilo tša boloi?”
23 Ke moka Jehorama a retologa ka kariki ya gagwe ya ntwa gore a tšhabe, gomme a re go Ahasia: “Ahasia, ba re tlaeditše!”
24 Ke moka Jehu a tšea bora le mosebe wa gagwe gomme a thuntšha Jehorama gare ga magetla, mosebe woo wa phuleletša pelong ke moka wa tšwa gomme Jehorama a wela kamoo kariking ya gagwe ya ntwa.
25 Ka gona Jehu a re go Bidikara mothuši wa molaodi wa mašole a gagwe: “Mo kuke o mo lahlele tšhemong ya Nabothe wa Mojeseriele. Gopola gore nna le wena re be re rakediša tatagwe e lego Ahaba ka dikariki tša ntwa ge Jehofa a be a mo ahlola a re:
26 ‘“Ka ge ke bone madi a Nabothe le madi a barwa ba gagwe maabane,” o realo Jehofa, “ruri ke tla lefeletša madi a bona mo tšhemong ye,” o realo Jehofa.’ Bjale mo kukeng le mo lahlele tšhemong yeo go ya ka seo Jehofa a se boletšego.”
27 Ge Kgoši Ahasia wa Juda a bona seo se diregago o ile a tšhaba ka tsela yeo e yago ka tšhemong yeo e nago le ntlo. (Ka morago Jehu a mo kitimiša gomme a re: “Le yena mmolayeng!” Ke moka ba mo hlasela a le ka kariking ya ntwa a le tseleng ya go ya Guri, yeo e bego e feta Ibileama. Eupša a tšhaba go fihlela Megido gomme a hwela moo.
28 Ke moka bahlanka ba gagwe ba mo rwala ka kariki ya ntwa ba mo iša Jerusalema gomme ba mmoloka le borakgolokhukhu ba gagwe lebitleng la gagwe Motseng wa Dafida.
29 Ahasia o bile kgoši ya Juda ka ngwaga wa bo-11 wa ge go buša Jehorama morwa wa Ahaba.)
30 Ge Jehu a fihla Jeseriele, Isebele o ile a kwa ka seo. Ka gona o ile a tlotša mahlo a gagwe ka pente e ntsho gomme a lokiša moriri wa gagwe ke moka a lebelela fase a le lefasetereng.
31 Ge Jehu a tsena ka keiti, Isebele o ile a re: “Go diragetše eng ka Simiri yo a bolailego mong wa gagwe?”
32 Jehu a lebelela godimo lefasetereng ke moka a re: “Ke mang yo a emago le nna? Ke mang?” Ke moka bahlankedi ba babedi goba ba bararo ba kgoro bao ba bego ba le lefasetereng ba mo lebelela a le moo fase.
33 Jehu a re: “Mo lahleleng fase!” Ka gona ba mo lahlela fase gomme a mangwe a madi a gagwe a tšhela leboto le dipere ke moka Jehu a mo gatakela ka dipere.
34 Ka morago ga moo a tsena ka gare a ja a ba a nwa, ke moka a re: “Hle tšeang mosadi yo yoo a rogakilwego le yo mmoloka ka gobane ke morwedi wa kgoši.”
35 Eupša ge ba be ba eya go mmoloka, ba ile ba hwetša go šetše feela lerapo la gagwe la hlogo, maoto le diatla.
36 Ge ba boela morago go Jehu gomme ba mmotša seo se diragetšego, o ile a re: “Go phethagetše seo Jehofa a se boletšego a diriša mohlanka wa gagwe Eliya wa Mothishibe, ge a be a re: ‘Dimpša di tla ja nama ya Isebele tšhemong yeo e lego Jeseriele.
37 Le gona setopo sa Isebele e tla ba manyora tšhemong yeo e lego Jeseriele, e le gore go se ke gwa ba le yo a rego: “Isebele šo.”’”
Mengwalo ya tlase
^ Phetolelo ya lentšu ka lentšu e re, “morwa.”
