Puku ya Bobedi ya Dikoronika 14:1-15
14 Abija o ile a hlokofala go no swana le borakgolokhukhu ba gagwe, ke moka a bolokelwa Motseng wa Dafida, gomme Asa morwa wa gagwe o ile a ba kgoši legatong la gagwe. Mehleng ya gagwe, nageng go ile gwa ba le khutšo ka mengwaga e lesome.
2 Asa o ile a dira dilo tše dibotse le tša go loka pele ga Jehofa Modimo wa gagwe.
3 Ka gona o ile a tloša dialetare tša medimo e mengwe le mafelo a phagamego ao go bego go rapelwa go ona, a pšhatlaganya diphilara tše kgethwa gomme a rema dikota tše kgethwa.
4 Le gona, o ile a botša Bajuda gore ba hlankele Jehofa Modimo wa borakgolokhukhu ba bona, gomme ba kwe Molao le ditaelo tša gagwe.
5 Ka gona metseng ka moka ya Juda o ile a tloša mafelo a phagamego ao go rapelwago go ona le dialetare tša diorelo. Ga se gwa ba le selo seo se šitišanago le mmušo wa gagwe ge a be a buša.
6 O ile a aga metse e šireleditšwego kua Juda ka ge nageng yeo go be go se na selo seo se ka mo šitišago ebile go be go se na motho yo a ka lwago le yena mengwageng yeo ka moka ka gobane Jehofa o ile a mo khutšiša.
7 A re go Bajuda: “A re ageng metse ye gomme re e ageletše ka maboto, ditora, dikeiti le ditšhipi. Ka ge re ile ra tsoma Jehofa Modimo wa rena, naga e sa le ya rena. Re ile ra mo tsoma gomme a re khutšiša go manaba a rena ka moka.” Ka gona ba ile ba fetša go aga.
8 Asa o be a na le mašole a 300 000 (dikete tše makgolo a mararo) ao a tšwago Juda. Mašole ao a be a na le dikotse tše dikgolo le marumo. Go tšwa go Babenjamini go be go na le mašole a 280 000 (dikete tše makgolopedi-masomeseswai) a matla, mašole ao a be a itlhamile ka dikotse tše dinyenyane le bora.
9 Ka morago Tsera wa Moethopia o ile a tla a lwa le bona a na le mašole a 1 000 000 (milione o tee) le dikariki tša ntwa tše 300 (makgolo a mararo). Eitše ge a fihla Mareasha,
10 Asa a tšwa gore a yo lwa le yena gomme ba itokišetša ntwa ba le Moeding wa Tsefata kua Mareasha.
11 Ke moka Asa a rapela Jehofa Modimo wa gagwe a re: “Wena Jehofa, ga o na taba gore batho ba o ba thušago ke ba bantšhi goba ga ba na matla. Wena Jehofa Modimo wa rena, re thuše ka gobane re tshepile wena le gona re tlo lwa le batho ba ba bantšhi ka leina la gago. Wena Jehofa, o Modimo wa rena. O se ke wa dumelela motho wa nama le madi a go fenya.”
12 Ka gona Jehofa a fenya Baethopia pele ga Asa le pele ga Bajuda, ke moka Baethopia ba tšhaba.
13 Asa le batho bao a bego a na le bona ba ba kitimiša go fihlela ba fihla Gerara ke moka Baethopia ba hwa go fihlela go se sa na le o tee yo a phelago ka gobane ba be ba hlasetšwe ke Jehofa le madira a gagwe. Ka morago ga moo ba thopa dilo tše dintšhi kudu.
14 Le gona ba ile ba hlasela metse ka moka yeo e bego e dikologile Gerara, ka gobane Jehofa o be a tšhošitše batho ba metse yeo, ka gona ba thopa metse ka moka ka gobane go be go na le dilo tše dintšhi tšeo ba ka di tšeago go yona.
15 Ba ile ba hlasela bao ba bego ba dula ditenteng bao ba nago le diphoofolo, ba ba ba thopa le dinku tše dintšhi kudu le dikamela, ke moka ka morago ba boela Jerusalema.
