Puku ya Bobedi ya Dikoronika 18:1-34
18 Jehoshafate o be a humile kudu ebile a tumile kudu, eupša o ile a nyalelana le Ahaba.
2 Ka morago ga mengwaga e itšego, o ile a a ya go Ahaba kua Samaria gomme Ahaba a direla yena le batho bao a bego a na le bona dihlabelo ka dinku le dikgomo tše dintšhi gomme o ile a mo kgothaletša gore a ye le yena go yo lwa le motse wa Ramothe-gileada.
3 Ke moka Kgoši Ahaba wa Isiraele a re go Kgoši Jehoshafate wa Juda: “Na o tla ya le nna Ramothe-gileada?” Ke moka Kgoši Jehoshafate a re go Kgoši Ahaba: “Nna le wena re selo se setee, setšhaba sa ka le sa gago ke selo setee ebile re tla ya le wena ntweng.”
4 Eupša Jehoshafate a re go Ahaba kgoši ya Isiraele: “Ke kgopela o thome pele ka go kwa gore Jehofa o reng ka taba ye.”
5 Ka gona kgoši ya Isiraele ya kgoboketša baporofeta ba banna ba 400 (makgolo a mane), ya re go bona: “Na re ye go lwa le motse wa Ramothe-gileada goba ke se ke ka yo lwa le wona?” Baporofeta bao ba re: “Sepela, gomme Modimo wa nnete o tla go thuša gore o fenye wena kgoši.”
6 Ke moka Jehoshafate a re: “Na ga go na moporofeta wa Jehofa mo? Gona a re yeng go yena a re botše gore Modimo o reng.”
7 Ge a realo Ahaba kgoši ya Isiraele a re go Jehoshafate: “Go sa na le monna o tee yo a ka re thušago go tseba gore Jehofa o reng, eupša ke mo hloile ka gobane ga a ke a porofeta dilo tše dibotse ka nna, eupša o dula a porofeta dilo tše mpe. Leina la gagwe ke Mikaya morwa wa Imila.” Ke moka Jehoshafate a re: “Kgoši ga se ya swanela go bolela dilo tše bjalo.”
8 Ka gona Ahaba kgoši ya Isiraele a bitša mohlankedi wa kgoro a re: “Bitša Mikaya morwa wa Imila gore a tle mo kapelapela.”
9 Ahaba kgoši ya Isiraele o be a dutše setulong sa gagwe sa bogoši, mola Jehoshafate kgoši ya Juda le yena a be a dutše setulong sa gagwe sa bogoši. Ba be ba apere diaparo tša ka bogošing gomme ba dutše seboeng* kgauswi le keiti ya Samaria. Le gona baporofeta ka moka ba be ba porofeta moo pele ga bona.
10 Ke moka Tsedekia morwa wa Kenana a itirela manaka a tšhipi a re: “Jehofa o re: ‘O tla kgorometša Basiria ka manaka a go fihlela o ba fediša.’”
11 Baporofeta ba bangwe ka moka ba be ba porofeta ka tsela e swanago, ba re: “Eya Ramothe-gileada gomme o tla fenya. Jehofa o tla go thuša gore o fenye motse woo wena kgoši.”
12 Ka gona motho yo a bego a ile go bitša Mikaya a re go yena: “Baporofeta ka moka ba botša kgoši dilo tše dibotse. Hle! Anke seo o tlago go se bolela se dumelelane le mantšu a bona, o be o bolele mantšu a mabotse.”
13 Eupša Mikaya a re: “Ke ikana ka Jehofa Modimo yo a phelago gore selo le ge e le sefe seo Modimo wa ka a mpotšago sona, ke tlo se bolela.”
14 Ke moka a ya go Kgoši Ahaba. Ahaba a mmotšiša a re: “Mikaya, na re ka ya ra yo lwa le Ramothe-gileada goba na ke se ke ka ya?” Ke moka Mikaya a re: “Sepela o ye go lwa le yona gomme o tla fenya. Modimo o tla go thuša gore o e fenye.”
15 Ge a realo kgoši ya re go yena: “Ke swanetše go go eniša gakae gore o se ke wa mpotša maaka eupša o mpotše nnete ebile o bolele go ya le kamoo Jehofa a go boditšego ka gona?”
16 Ka gona Mikaya a re: “Ke bona Baisiraele ka moka ba gašane dithabeng tše e kego ke dinku tšeo di se nago modiši. Jehofa o re: ‘Ba ga ba na motho yo a ba eteletšego pele. Ba tlogele gore yo mongwe le yo mongwe wa bona a boele legaeng la gagwe ka khutšo.’”
17 Ke moka Ahaba kgoši ya Isiraele a re go Jehoshafate: “Ke go boditše ka re: ‘A ka se porofete dilo tše dibotse ka nna, o tlo porofeta tše mpe feela’?”
18 Ke moka Mikaya a re: “Ka gona ekwa lentšu la Jehofa. Ke bone Jehofa a dutše setulong sa gagwe sa bogoši gomme madira ka moka a legodimong a eme ka letsogong la gagwe le letona mola a mangwe a eme ka go le letshadi.
19 Ke moka Jehofa a re: ‘Ke mang mo gare ga lena yo a ka yago a dira Ahaba kgoši ya Isiraele setlaela, e le gore a ye ntweng Ramothe-gileada gomme a hwele moo?’ Ka gona morongwa yo mongwe le yo mongwe o be a bolela seo yena a se naganago.
20 Ke moka morongwa* yo mongwe a tla a ema pele ga Jehofa a re: ‘Nna nka mo dira setlaela.’ Jehofa a mmotšiša a re: ‘O tlo mo dira setlaela bjang?’
21 Ke moka morongwa a re: ‘Ke tla ya go baporofeta ba gagwe ka moka gomme ka ba dira gore ba mmotše maaka.’ Ka gona Modimo a re: ‘Ka nnete o tla mo dira setlaela, ebile o tlo atlega. Eya o dire sona seo.’
22 Ke ka baka leo Jehofa a ilego a dumelela morongwa gore a dire gore baporofeta ba gago ka moka ba go botše maaka, eupša Jehofa o boletše gore wena o tlo welwa ke masetlapelo.”
23 Tsedekia morwa wa Kenana a batamela Mikaya gomme a mmetha ka mpama ke moka a re: “Go tlile bjang gore moya wa Jehofa o tloge mo go nna gore o bolele le wena?”
24 Ke moka Mikaya a re: “Mohlang o tlago go tsena ka phapošing ya ka garegare gore o ikute o tla tseba gore go tlile bjang.”
25 Ke moka Ahaba kgoši ya Isiraele a re: “Tšea Mikaya o mmušetše go Amone kgošana ya motse le go Joashe morwa wa kgoši.
26 O ba botše o re: ‘Kgoši e re: “Tsenyang monna yo teronkong gomme le mo neeng dijo tše dinyenyane le meetse a manyenyane go fihlela ke boa ka khutšo.”’”
27 Eupša Mikaya a re: “Ge o ka boa ka khutšo, gona Jehofa o tla be a se a bolela le nna.” Ke moka a re: “Lena batho ka moka, elang hloko seo ke se boletšego.”
28 Ka gona kgoši ya Isiraele le Jehoshafate kgoši ya Juda ba ya Ramothe-gileada.
29 Bjale kgoši ya Isiraele ya re go Jehoshafate: “Ke tla itira okare ke nna motho yo mongwe gomme ka tsena ntweng eupša wena o apare diaparo tša gago tša bogoši.” Ka gona kgoši ya Isiraele ya itira eka ke yona motho yo mongwe gomme ba tsena ntweng.
30 Kgoši ya Siria e be e laetše balaodi ba dikariki tša yona tša ntwa e itše: “Le se ke la lwa le motho, go sa šetšwe gore ke yo monyenyane goba ke yo mogolo, go e na le moo le lweng le kgoši ya Isiraele.”
31 Ge balaodi ba dikariki tša ntwa ba se no bona Jehoshafate, ba ipotša gore: “Ye ke yona kgoši ya Isiraele.” Ka gona ba ya gore ba yo lwa le yena, gomme Jehoshafate a thoma go goeletša gore a kgopele thušo. Jehofa a mo thuša. Gateetee Modimo a ba tloša kgauswi le yena.
32 Ge balaodi ba dikariki tša ntwa ba be ba bona gore Jehoshafate e be e se kgoši ya Isiraele ba gomela morago kapelapela ba se sa mo kitimiša.
33 Eupša lešole le lengwe le ile la thuntšha mosebe wa lona le sa lemoge gomme mosebe woo wa hlaba kgoši ya Isiraele karolong yeo diaparo tša yona tša ntwa di bego di kopana gona. Ka gona kgoši ya re go mootledi wa kariki ya yona ya ntwa: “Retologa o boele morago gomme o nntšhe mo ntweng, ka gobane ke gobetše kudu.”
34 Letšatšing leo, ntwa e ile ya kgatlampana, kgoši e be e le ka kariking ya yona ya ntwa. Ba be ba e thekgile gore e kgone go bona Basiria go fihlela thapama. Ke moka ya hlokofala ge letšatši le sobela.
