Puku ya Bobedi ya Dikoronika 21:1-20
21 Mafelelong Jehoshafate o ile a hlokofala go no swana le borakgolokhukhu ba gagwe gomme a bolokwa le borakgolokhukhu ba gagwe Motseng wa Dafida ke moka morwa wa gagwe Jehorama a ba kgoši legatong la gagwe.
2 Bana babo e lego barwa ba Jehoshafate, e be e le Asaria, Jehiele, Sakaria, Asaria, Mikaele le Shefatia. Ka moka ga bona e be e le barwa ba Kgoši Jehoshafate wa Isiraele.
3 Tatago bona o ile a ba fa dimpho tše dintšhi tša silifera le tša gauta le dilo tše bohlokwa gotee le metse yeo e šireleditšwego ya Juda, eupša mmušo a o fa Jehorama ka gobane e be e le yena ngwana wa mathomo.
4 Ge Jehorama a thomile go buša legatong la tatagwe, mmušo wa gagwe o ile wa ba matla kudu moo a ilego a bolaya bana babo ka moka ka sabola, a ba a bolaya le baetapele ba bangwe ba Isiraele.
5 Jehorama o bile kgoši a na le mengwaga e 32 gomme o bušitše Jerusalema ka mengwaga e seswai.
6 O ile a dira dilo tše mpe tšeo dikgoši tša Isiraele di di dirilego go no swana le ge ba ntlo ya Ahaba le bona ba ile ba dira bjalo, ka gobane o be a nyetše morwedi wa Ahaba gomme a dulela go dira dilo tše mpe pele ga Jehofa.
7 Eupša Jehofa o be a sa nyake go fediša ba ntlo ya Dafida ka baka la kgwerano yeo a bego a e dirile le Dafida, ka ge a be a mo tshepišitše gore o tla fa yena le ditlogolo tša gagwe lebone leo le tlago go dula le ba bonegetše.
8 Mehleng ya Jehorama, Baedomo ba ile ba hlanogela Bajuda gomme ba ipeela kgoši gore e ba buše.
9 Ka gona Jehorama le baetapele ba gagwe bao a ba kgethilego, ba ile ba tshelela Edomo le dikariki tša gagwe tša ntwa ka moka. A tsoga bošego a lwa le Baedomo bao ba bego ba mo dikologile gotee le balaodi ba dikariki tša ntwa gomme a ba fenya.
10 Eupša Baedomo ba ile ba dula ba elwa le Bajuda go fihla lehono le. Libina le yona e ile ya lwa le yena ka nako yeo ka gobane o be a tlogetše Jehofa Modimo wa borakgolokhukhu ba gagwe.
11 Le gona o be a dirile mafelo a phagamego ao go rapelwago go ona dithabeng tša Juda, e le gore a dire gore badudi ba Jerusalema ba otswe le medingwana* e mengwe, gomme a aroša Juda.
12 Mafelelong o ile a hwetša lengwalo leo le tšwago go moporofeta Eliya, le re: “Jehofa Modimo wa rakgolokhukhu wa gago Dafida o re: ‘Ga se wa dira dilo go swana le tatago Jehoshafate goba Kgoši Asa wa Juda.
13 Eupša o ile wa dira dilo go swana le dikgoši tša Isiraele gomme wa dira gore Juda le badudi ba Jerusalema ba otswe le medingwana e mengwe go swana le kamoo ba ntlo ya Ahaba ba ilego ba dira ka gona, ebile o bolaile le bana beno, bona barwa ba tatago, bao ba bego ba le kaone go go phala.
14 Ka gona Jehofa o tla otla setšhaba sa gago, barwa ba gago le basadi ba gago kudu, ebile o tla senya dithoto tša gago ka moka.
15 Le gona o tla swarwa ke malwetši a mantšhi, go akaretša le bolwetši bja mala. Letšatši le lengwe le le lengwe o tla tlaišega ka baka la bolwetši bjoo, moo mafelelong mala a gago a tlago go tšwela ka ntle.’”
16 Ke moka Jehofa a dira gore Bafilisita le Baarabia bao ba bego ba dula kgauswi le Baethopia ba lwe le Jehorama.
17 Ka gona ba ile ba gapeletša go tsena Juda ke moka ba e hlasela, gomme ba tšea dithoto ka moka tšeo di bego di le ka ntlong ya kgoši, ba tšea le barwa ba yona le basadi ba yona, ba tlogela feela Jehoahase yoo e bego e le morwa wa gagwe yo monyenyane.
18 Ka morago ga dilo tše ka moka, Jehofa a mo otla ka bolwetši bja mala bjoo bo sa alafegego.
19 Ge nako e dutše e eya, ge mengwaga e mebedi e fedile, mala a gagwe a ile a tšwela ka ntle ka baka la bolwetši bjo bo bego bo mo swere gomme a hlokofala a dutše a babja kudu. Ebile setšhaba sa gagwe ga se sa mo goletša mollo go bontšha gore se a mo hlompha go swana le ge se ile sa goletša borakgolokhukhu ba gagwe.
20 O bile kgoši a na le mengwaga e 32, gomme a buša Jerusalema ka mengwaga e seswai. Ga go na motho yo a ilego a kwa bohloko ge a be a hlokofala. Ka gona ba ile ba mmolokela Motseng wa Dafida, eupša ba se mmolokele mabitleng a dikgoši.
Mengwalo ya tlase
^ Ke gore, go hlankela medingwana.
