Puku ya Bobedi ya Dikoronika 29:1-36
29 Hesekia o be a na le mengwaga e 25 ge a eba kgoši gomme o bušitše Jerusalema ka mengwaga e 29. Leina la mmagwe e be e le Abija morwedi wa Sakaria.
2 O ile a dula a dira dilo tše di lokilego pele ga Jehofa go swana le kamoo rakgolokhukhu wa gagwe Dafida a bego a di dira.
3 Kgweding ya pele ya ngwaga wa pele wa ge a buša, o ile a bula mabati a ntlo ya Jehofa gomme a a lokiša.
4 Ke moka o ile a tliša baperisita le Balefi a ba kgoboketša lebaleng la ka thoko ya bohlabela.
5 A re go bona: “Lena Balefi, ntheetšeng! Bjale ikgethagatšeng le be le kgethagatše le ntlo ya Jehofa Modimo wa borakgolokhukhu ba lena gomme le tloše selo seo se sa hlwekago lefelong le lekgethwa.
6 Ka gobane botatago rena ga se ba botegela Jehofa Modimo wa rena ebile ba dirile tše mpe pele ga gagwe. Ba ile ba tlogela Jehofa, ba mo furalela ba ba ba furalela le taberenakele ya gagwe.
7 Le gona ba ile ba tswalela mabati a moo go tsenwago gona ka tempeleng, ba tima le mabone. Ba ile ba tlogela go fišetša Modimo wa Isiraele diorelo le go mo neelela dihlabelo tša go fišwa lefelong le lekgethwa.
8 Ka gona, Jehofa a galefela batho ba Juda le ba Jerusalema, moo a ilego a ba tlišetša masetlapelo e le gore batho bao ba a bonago le bao ba kwago ka ona ba tšhoge, ba makale ba be ba ba leletše molodi,* bjalo ka ge le bona ka mahlo a lena.
9 Gona bjale borakgolokhukhu ba rena ba bolailwe ka sabola, gomme barwa le barwedi ba rena le basadi ba rena ba išitšwe bothopša ka baka la se.
10 Bjale ke nyaka* go dira kgwerano le Jehofa Modimo wa Isiraele ka pelo ya ka ka moka gore a se sa re galefela.
11 Ka gona lena setšhaba sa ka, ye ga se nako ya gore le nyefiše mošomong wa lena, ka gobane Jehofa o kgethile lena gore le eme pele ga gagwe le mo hlankele,* le be le mo direle dihlabelo tšeo di thuntšhago muši.”
12 Ge a realo, Balefi ba emelela. Go tšwa go Bakohathe gwa emelela Mahathe morwa wa Amasai le Joele morwa wa Asaria, go tšwa go Bamerari gwa emelela Kishe morwa wa Abadi le Asaria morwa wa Jahalelele, go tšwa go Bagerishone gwa emelela Joa morwa wa Sima le Edene morwa wa Joa,
13 go tšwa go barwa ba Elisafane gwa emelela Shimiri le Jeuele, go tšwa go barwa ba Asafa gwa emelela Sakaria le Matania,
14 go tšwa go barwa ba Hemane gwa emelela Jehiele le Shimei, go tšwa go barwa ba Jeduthune gwa emelela Shemaya le Usiele.
15 Ke moka ba kgoboketša bana babobona, ba ikgethagatša gomme ba ya ba hlwekiša ntlo ya Jehofa go ya le ka seo Jehofa a se laetšego kgoši.
16 Ke moka baperisita ba tsena ka ntlong ya Jehofa gore ba e hlwekiše, gomme ba tšea dilo ka moka tšeo di sa hlwekago tšeo ba di hweditšego ka tempeleng ya Jehofa ba di iša lapeng la ntlo ya Jehofa. Ka morago Balefi ba di tšea ba di ntšhetša ka ntle gomme ba di iša Moeding wa Kidirone.
17 Ka gona ba thoma go e kgethagatša ka letšatši la pele la kgwedi ya pele gomme ka letšatši la boseswai la kgwedi ba ile ba fihla moo go tsenwago gona ge go tsenwa ka ntlong ya Jehofa. Ba ile ba fetša matšatši a seswai ba kgethagatša ntlo ya Jehofa gomme ba fetša ka letšatši la bo-16 la kgwedi ya pele.
18 Ka morago ga moo ba ile ba ya go Kgoši Hesekia ba re: “Re hlwekišitše ntlo ya Jehofa ka moka, aletare ya go neela dibego tša go fišwa le dibjana tša yona ka moka gotee le tafola yeo go bewago senkgwa seo se hlatlagantšwego* le dibjana tša yona ka moka.
19 Le gona dibjana ka moka tšeo Kgoši Ahasi yo a sa botegego a bego a di tlošitše gore di se sa dirišwa nakong ya ge a be a buša re di lokišitše ebile re di kgethagaditše, gomme di pele ga aletare ya Jehofa.”
20 Kgoši Hesekia o ile a tsoga e sa le mesong gomme a kgoboketša baetapele ba motse, ke moka ba ya ntlong ya Jehofa.
21 Ba ile ba tliša dipoo tše šupago, dinku tše tona tše šupago, dikwana tše tona tše šupago le diphooko tše šupago tše tona e le sebego sa sebe bakeng sa mmušo, sekgethwa le Juda. Ka gona a botša baperisita e lego ditlogolo tša Arone gore ba di neele aletareng ya Jehofa.
22 Ke moka ba hlaba dikgomo gomme baperisita ba foketša madi a tšona aletareng. Ka morago ba hlaba dinku tše tona gomme ba foketša madi a tšona aletareng, ke moka ba hlaba dikwana tše tona gomme ba foketša madi a tšona aletareng.
23 Ka morago ga moo, ba tliša diphooko tša sebego sa sebe pele ga kgoši le phuthego gomme ba bea diatla tša bona godimo ga tšona.
24 Bjale baperisita ba di hlaba, ba dira sebego sa sebe ka madi a tšona godimo ga aletare e le gore Modimo a lebalele Baisiraele ka moka dibe tša bona, ka gobane kgoši e itše sebego sa go fišwa le sebego sa sebe di swanetše go dirwa bakeng sa Baisiraele ka moka.
25 Go sa le bjalo, a emiša Balefi ntlong ya Jehofa ba swere disimbala, diletšo tša metato le diharepa, ba latela mokgwa wa go opela woo o thomilwego ke Dafida le Gada yoo a bego a kgona go bona dipono tšeo di amago kgoši gotee le mokgwa wa go opela wa moporofeta Nathane, ka gobane Jehofa o be a laetše bjalo a diriša baporofeta ba gagwe.
26 Ka gona Balefi ba be ba eme ba swere diletšo tša mmino tša Dafida, gomme baperisita bona ba swere diphalafala.
27 Ke moka Hesekia a laela gore go neelwe sehlabelo sa go fišwa aletareng. Koša ye e bego e opelelwa Jehofa e ile ya thoma, ebile go letšwa diphalafala, go latelwa tlhahlo ya diletšo tša mmino tša Kgoši Dafida wa Isiraele.
28 Phuthego ka moka e ile ya khunama ge koša e dutše e opelwa gomme diphalafala di lla. Dilo tše ka moka di ile tša direga go fihlela go feditšwe go neelwa sebego sa go fišwa.
29 Ge ba se na go fetša go neela sebego sa go fišwa, kgoši le batho ka moka bao ba bego ba na le yona ba ile ba inamišetša difahlego tša bona fase go bontšha gore ba hlompha Modimo.
30 Ke moka Kgoši Hesekia le baetapele ba botša Balefi gore ba tumiše Jehofa ka dipsalme tša Dafida le tša Asafa yo a bego a kgona go bona dipono. Ka gona ba tumiša Modimo ba thabile kudu gomme ba inama go bontšha gore ba a mo hlompha.
31 Ke moka Hesekia a re: “Ka ge le beetšwe ka thoko gore le hlankele Jehofa, etlang gomme le tliše dihlabelo le dibego tša go leboga ka ntlong ya Jehofa.” Ka gona, phuthego ya thoma go tliša dihlabelo le dibego tša go leboga gomme yo mongwe le yo mongwe a tliša dibego tša go fišwa ka pelo ya gagwe ka moka.
32 Dibego tša go fišwa tšeo di bego di tlišitšwe ke phuthego e le sebego sa go fišwa seo se neelwago Jehofa, e be e le dikgomo tše 70, dinku tše tona tše 100, dikwana tše tona tše 200 (makgolo a mabedi)—
33 gomme dibego tše kgethwa e be e le dikgomo tše 600 (makgolo a tshelelago) le dinku tše 3 000 (dikete tše tharo).
34 Eupša go be go se na baperisita ba lekanego go ka bua diphoofolo ka moka tša dibego tša go fišwa. Ka gona banababo bona ba Balefi ba ile ba ba thuša go fihlela mošomo o fela le go fihlela baperisita ba ikgethagatša, ka gobane Balefi ba be ba tshwenyegile kudu ka go ikgethagatša go feta kamoo baperisita ba bego ba tshwenyegile ka gona.
35 Le gona go be go na le dibego tša go fišwa tše dintšhi gotee le dikarolwana tša makhura le dihlabelo tša go dira khutšo le Modimo, le dibego tša dino tša dibego tša go fišwa. Ka gona modiro wa ntlong ya Jehofa wa boela wa dirwa gape.
36 Ka gona Hesekia le setšhaba ka moka ba thaba ka baka la seo Modimo wa nnete a ba diretšego sona, ka gobane dilo tše ka moka di diragetše kapelapela.
Mengwalo ya tlase
^ Goba, “ba be ba ba kwere.”
^ Goba, “kganyoga.”
^ Goba, “le mo hlankele le le badiredi ba gagwe.”
^ Ke gore, “senkgwa seo se neetšwego Modimo.”
