Puku ya Bobedi ya Dikoronika 5:1-14
5 Ka gona, Solomone a fetša mošomo ka moka woo a bego a swanetše go o dira ntlong ya Jehofa, ke moka a tliša dilo tšeo Dafida tatagwe a bego a di kgethagaditše. A tšea silifera, gauta le dilo tše dingwe ka moka gomme a di bea moo go bewago dilo tše bohlokwa ka ntlong ya Modimo wa nnete.
2 Ka nako yeo, Solomone a kgoboketša banna ba bagolo ba Isiraele, dihlogo ka moka tša meloko ya bona, e lego dihlogo tša malapa a botatago bona ba Baisiraele, ba tšea areka ya kgwerano ya Jehofa Motseng wa Dafida, ke gore Tsione, gomme ba e iša Jerusalema.
3 Banna ka moka ba Isiraele ba kgobokana pele ga kgoši nakong ya monyanya woo o swarwago kgweding ya bošupa.
4 Ka gona banna ba bagolo ka moka ba Isiraele ba tla gomme Balefi ba rwala Areka.
5 Ba tliša Areka, tente ya kopano le dibjana ka moka tše kgethwa tšeo di bego di le ka tenteng. Tšona di tlišitšwe ke baperisita le Balefi.
6 Kgoši Solomone o be a eme pele ga Areka a na le setšhaba ka moka sa Isiraele seo se bego se laetšwe gore se tle se kopane le yena. Go ile gwa dirwa dihlabelo ka dinku le dikgomo tše dintšhi tšeo di bego di sa balege.
7 Ke moka baperisita ba tliša areka ya kgwerano ya Jehofa lefelong la yona, ka phapošing ya ka garegare ya ntlo, e lego ka Sekgethwakgethweng, ba e bea ka fase ga maphego a bakerubi.
8 Maphego a bakerubi a be a phurolletše ka godimo ga lefelo leo go bego go dutše Areka, moo bakerubi bao ba bego ba khupeditše Areka le dikota tša yona go tloga godimo.
9 Dikota tša yona e be e le tše ditelele kudu, moo dintlhana tša tšona di bego di bonagala ge o le ka Sekgethweng seo se bego se le ka pele ga phapoši ya ka garegare, eupša di be di sa bonagale ge o le ka ntle. Di sa dutše di le bjalo go fihla lehono.
10 Go be go se na selo ka Arekeng ge e se diphaphathi tše pedi tšeo Moshe a bego a di beile kamoo ge a be a le kua Horebe, ge Jehofa a be a dira kgwerano le setšhaba sa Isiraele ge se be se etšwa Egepeta.
11 Ge baperisita ba etšwa lefelong le lekgethwa (ka gobane baperisita ka moka bao ba bego ba le gona ba be ba ikgethagaditše, go sa šetšwe gore ke ba dihlopha dife),
12 Balefi ka moka bao e bego e le diopedi, bao ba bego ba eteletšwe pele ke Asafa, Hemane, Jeduthune, barwa ba bona le banababo bona, ba be ba apere mašela a mabotse ebile ba swere disimbala, diletšo tša metato le diharepa. Ba be ba eme ka bohlabela bja aletare gomme kgauswi le bona go be go na le baperisita ba 120 (lekgolo-masomepedi) ba letša diphalafala.
13 Ge baletši ba diphalafala le batho ba go opela ba dutše ba tumiša Jehofa le go mo leboga ka nako e tee, go be go kwagala modumo wa diphalafala, disimbala le wa diletšo tše dingwe tša mmino ge ba dutše ba tumiša Jehofa, “ka gobane o lokile, gomme lerato la gagwe le le botegago le dula le le gona go ya go ile.” Ke moka ntlo, e lego yona ntlo ya Jehofa e ile ya tlala leru.
14 Baperisita ba be ba sa kgone go ema moo gore ba dire mešomo ya bona ka baka la leru ka gobane letago la Jehofa le be le khupeditše ntlo ya Modimo wa nnete.
