Lengwalo le le Yago go Baefeso 3:1-21
3 Ka gona, nna Paulo ke golegilwe ka baka la ge ke dumela go Kriste Jesu le ka baka la ge ke thuša lena bao le sego Bajuda.
2 Le kwele gore ke kgethilwe gore ke le thuše go hwetša botho bjo bogolo bja Modimo bjo ke bo neilwego ka baka la lena,
3 gore Modimo o nkutolletše sephiri sa gagwe, go etša ge ke ile ka le ngwalela ganyenyane ka taba ye.
4 Ka gona ge le bala lengwalo le, le tla lemoga kamoo ke kwešišago sephiri sa Modimo se sekgethwa sa mabapi le Kriste.
5 Melokong e fetilego Modimo ga se a ka a utollela batho sephiri se ka botlalo, go etša ge ga bjale moya wa gagwe o mokgethwa o se utolletše baapostola bao ba kgethilwego le baporofeta.
6 Sephiri seo ke sa gore ge batho bao e sego Bajuda ba kwele ditaba tše dibotse gomme ba dumela go Kriste Jesu, le bona ba tla hwetša dilo tšeo Modimo a re tshepišitšego tšona ka ge e le barutiwa ba Kriste Jesu.
7 Ke kgethilwe gore ke le thuše go kwešiša sephiri sa Modimo se sekgethwa go ya ka botho bja gagwe bjo bogolo bjo a mpontšhitšego bjona a diriša matla a gagwe a magolo.
8 Le ge ke le wa tlasana go bakgethwa ka moka, Modimo o mpontšhitše botho bja gagwe bjo bogolo gore ke kgone go botša batho bao e sego Bajuda ditaba tše dibotse tša ditšhegofatšo tše di tšwago go Kriste tšeo di sa lekanego le selo,
9 le go thuša batho ka moka gore ba bone kamoo Modimo yo a bopilego dilo ka moka a utollago sephiri sa gagwe se sekgethwa seo se tšerego nako e telele se utilwe.
10 Modimo o dirile se gore ka phuthego ya gagwe a tsebiše mebušo le balaodi ba legodimong bohlale bja gagwe bjo bo bonagalago ka ditsela tše dintšhi.
11 O dirile se ka go dumelelana le morero wa gagwe wo e lego kgale a o rerile mabapi le Kriste Jesu Morena wa rena,
12 yo a dirilego gore re kgone go bolela re lokologile, le go rapela Modimo re lokologile ka ge re dumela go Kriste.
13 Ka gona ke le kgopela gore le se ke la nyama ka ge ke tlaišega ka baka la lena, ka gobane se se tlo le hola.
14 Ka baka leo ke khunamela Tate,
15 yo lapa le lengwe le le lengwe legodimong le lefaseng le lego gona ka baka la gagwe.
16 Ke rapela gore ka ge a na le letago le legolo a le matlafatše* a diriša moya wa gagwe o mokgethwa,
17 le gore ka tumelo ya lena le dule le dumelela Kriste gore a kgome dipelo tša lena ge le dutše le bontšha lerato. Ke kgopela le gore Modimo a le thuše gore le dule le tiile tumelong,
18 e le gore lena le bakgethwa bohle le kgone go kwešiša ka mo go feletšego bophara, botelele, bophagamo le go iša ga dilo tša Modimo,
19 le go tseba gore Kriste o le rata kudu go feta kamoo motho a ka kwešišago, e le gore le hwetše dika ka moka tša Modimo.
20 Modimo yo a re filego matla o kgona go dira dilo tše dikgolo kudu go feta tšeo re di kgopelago goba re di naganago.
21 Meloko ka moka a e mo tumiše go ya go ile ka baka la phuthego le ka baka la Kriste Jesu. Amene.
Mengwalo ya tlase
^ Phetolelo ya lentšu ka lentšu e re “a matlafatše motho yo le lego yena ka gare.”
