Lengwalo le le Yago go Baefeso 5:1-33
5 Ka gona ekišang Modimo, ka gobane le bana ba gagwe bao a ba ratago.
2 Le tšwele pele le bontšha lerato go swana le Kriste, o re ratile gomme a neela bophelo bja gagwe go swana le sehlabelo seo se nkgago bose go Modimo.
3 Anke boitshwaro bjo bobe bja tša thobalano le ditšhila tša mohuta o mongwe le o mongwe goba megabaru, le se ke la ba la leka la boledišana ka tšona ka gobane le ba bakgethwa.
4 Le gona le se ke la bolela le ka boitshwaro bjo bo lešago dihlong, dilo tša botlaela goba metlae e lešago dihlong, e lego dilo tšeo di tšwelego tseleng. Go e na le gore le bolele ka dilo tše, le lebogeng Modimo.
5 Lena ka bolena le tseba gabotse gore ga go na motho yo a tlago go tsena Mmušong wa Kriste le wa Modimo ge e ba a itshwere gampe ka tša thobalano, a dira dilo tša ditšhila goba a na le megabaru yeo e swanago le go rapela medimo ya diswantšho.
6 Go se be le motho yo a le forago ka mantšu a lefeela, ka gobane Modimo o tlo otla batho ba go se kwe bao ba dirago dilo tša mohuta woo.
7 Ka gona, le se ke la gwerana le batho ba mohuta woo,
8 ka gobane le kile la ba leswiswing, eupša bjale le seetšeng ka ge le le balatedi ba Morena. Le tšwele pele le itshwere bjalo ka batho bao ba sepelago seetšeng.
9 Seetša seo se re thuša gore re be botho dilong ka moka, re sepele tseleng ya go loka le ya therešo.
10 Dulang le kgonthišetša gore dilo tšeo le di dirago di a amogelega go Morena.
11 Le tlogeleng go dira mediro ya leswiswi yeo e se nago mohola, eupša le bontšheng gore ga le dumelelane le yona.
12 Ka gobane re lewa le ke dihlong tša go bolela dilo tšeo ba di dirago ka sephiring.
13 Ge le bontšha gore ga le dumelelane le mediro ye, le tla be le bontšha gore le seetšeng ka gobane seetša se dira gore dilo ka moka di bonagale.
14 Ka gona, Mangwalo a re: “Wena o robetšego bjalo ka ge eka o hwile, tsoga, gomme Kriste o tla go bonegela.”
15 Dulang le phafogile gore le se itshware go swana le ditlaela, eupša le swane le ba bohlale.
16 Le diriše nako ya lena gabotse gobane mehla ye re phelago go yona ke e mebe.
17 Ka gona, tlogelang go ba bjalo ka batho bao ba se nago tlhaologanyo, eupša tšwelang pele le kwešiša seo Jehofa a nyakago le se dira.
18 Le gona, le se ke la tagwa* ka gobane seo se tla dira gore le se laolege, eupša tšwelang pele le eba le moya o mokgethwa wa Modimo.
19 Kgothatšanang ka go opela dipsalme, go tumiša Modimo, go opela dikopelo tša borapedi le go opelela Jehofa ka dipelong tša lena.
20 Le dule le leboga Modimo Tatago rena ka baka la dilo tšohle le diriša leina la Morena wa rena Jesu Kriste.
21 Bontšhanang boikokobetšo ka gobane le hlompha Kriste kudu.
22 Basadi a ba ikokobeletše banna ba bona go swana le ge ba ikokobeletša Morena,
23 ka gobane monna ke hlogo ya mosadi wa gagwe go swana le ge Kriste e le hlogo ya phuthego, e lego mmele wa gagwe wo a o phološitšego.
24 Ge e le gabotse, go swana le ge phuthego e ikokobeletša Kriste, basadi le bona ba swanetše go ikokobeletša banna ba bona dilong ka moka.
25 Banna, tšwelang pele le rata basadi ba lena go swana le ge Kriste a ratile phuthego a ba a e hwela,
26 e le gore a e dire e kgethwa, gomme a e hlwekiša ka lentšu la Modimo bjalo ka ge eka o e hlatswa ka meetse.
27 O dirile dilo tše gore phuthego e be yeo e kgahlišago, yeo e se nago sepatso, lešošo, goba selo le ge e le sefe sa mohuta woo, eupša e be e kgethwa gomme e se solege.
28 Ka mo go swanago, banna ba swanetše go rata basadi ba bona go swana le ge ba rata mebele ya bona. Monna yo a ratago mosadi wa gagwe o a ithata,
29 ka gobane ga go na motho yo a kilego a hloya mmele* wa gagwe, eupša o a o rata le go o fepa, go swana le ge Kriste a dira phuthego bjalo,
30 ka gore re ditho tša mmele wa gagwe.
31 “Ka baka le, monna o tla tlogela tatagwe le mmagwe, a kgomarela mosadi wa gagwe gomme bona e tla ba nama e tee.”
32 Sephiri se se sekgethwa se segolo seo ke bolelago ka sona, se mabapi le Kriste le phuthego.
33 Ka gona, monna yo mongwe le yo mongwe o swanetše go rata mosadi wa gagwe bjalo ka ge a ithata. Mosadi yena o swanetše go hlompha monna wa gagwe ka mo go tseneletšego.
Mengwalo ya tlase
^ Phetolelo ya lentšu ka lentšu e re, “tagwa ke beine.”
^ Phetolelo ya lentšu ka lentšu e re, “nama.”
