Daniele 7:1-28
7 Ngwageng wa pele wa ge Kgoši Belshatsara wa Babilona a buša, Daniele o ile a lora a ba a bona dipono ge a be a robetše mpeteng wa gagwe. Ke moka a ngwala toro yeo a bego a e lora. O ile a ngwala dilo ka moka.
2 A re:
“Ge ke be ke lebeletše dipono tšeo bošego, ke ile ka bona diphefo tše nne tša magodimo di hudua lewatle le legolo.
3 Go ile gwa tšwelela dibata tše nne tše dikgolo tša go se swane ka lewatleng.
4 “Sa pele se be se swana le tau e bile se na le maphego a ntšhu. Ke ile ka dula ke se lebeletše go fihlela se kgaolwa maphego, sa kukelwa godimo gore se eme ka maoto a mabedi go swana le motho gomme sa newa pelo ya motho.
5 “Ke moka ka bona sebata se sengwe gape sa bobedi, sona se be se swana le bere. Se be se emišitše leoto le letee, e bile se swere dikgopo tše tharo ka meno a sona. Se ile sa botšwa gore: ‘Tsoga o je nama e ntšhi.’
6 “Ka morago, ka tšwela pele ke lebeletše gomme ka bona sebata se sengwe gape sa go swana le lepogo, eupša ka mokokotlong wa sona se be se na le maphego a mane a go swana le a nonyana. Sebata seo se be se na le dihlogo tše nne gomme se be se filwe matla a gore se buše.
7 “Ka morago ga moo, ka tšwela pele ke lebeletše diponong tšeo tša bošego, ka bona sebata sa bone, se be se tšhoša kudu e bile se boifiša, se na le matla a sa tlwaelegago e bile se na le meno a magolo a tšhipi, se be se gagoganya e bile se šilakanya. Tšeo di šetšego se be se di gatakela ka maoto. Sebata se se be se sa swane le dibata tše dingwe ka moka tšeo di bilego gona pele ga sona, e bile se be se na le manaka a lesome.
8 Ge ke be ke sa lebeletše manaka ao, go ile gwa tšwelela lenaka le lengwe le lenyenyane gare ga manaka ao. Ge lenaka leo le lenyenyane le tšwelela, manaka a mararo a mathomo a ile a tumoga. Lenaka leo le be le na le mahlo a go swana le a motho e bile le na le molomo woo o bolelago ka go ikgantšha.
9 “Ke ile ka tšwela pele ke lebeletše go fihlela go bewa ditulo tša bogoši gomme Yo a Bilego Gona go Tloga Kgale* a dula fase. Diaparo tša gagwe e be e le tše ditšhweu go swana le kapoko, gomme moriri wa hlogong ya gagwe o be o swana le boya bjo bošweu. Setulo sa gagwe sa bogoši se be se swana le dikgabo tša mollo, gomme maotwana a sona a swana le mollo o tukago.
10 Go be go na le nokana ya mollo woo o elelago o etšwa go yena. Batho ba milione o tee ba ile ba tšwela pele ba mo hlankela, gomme ba dimilione tše lekgolo ba ema pele ga gagwe. Moahlodi a dula* setulong sa gagwe gomme dipuku tša bulwa.
11 “Ka nako yeo ka tšwela pele ke lebeletše ka baka la mantšu a go ikgantšha ao lenaka leo le bego le a bolela. Ke ile ka lebelela sebata seo go fihlela se bolawa, gomme mmele wa sona wa lahlelwa mollong o tukago ke moka wa senywa.
12 Eupša dibata tšela tše dingwe ka moka, di ile tša tšeelwa bogoši, gomme tša dumelelwa gore di phele nako e itšego.
13 “Ka tšwela pele ke lebeletše dipono tšeo tša bošego gomme ka bona motho yo mongwe yo e kego ke morwa wa motho a etla ka maru a magodimo, a dumelelwa gore a tsene moo Yo a Bilego Gona go Tloga Kgale a bego a le gona, ke moka a batametšwa kgauswi le yena.
14 A fiwa matla a go buša, seriti le mmušo, e le gore batho ba ditšhaba ka moka le maleme ka moka ba mo hlankele. O buša go ya go ile, le gona mmušo wa gagwe o ka se fele e bile o ka se ke wa senywa.
15 “Nna Daniele, ke ile ka tlalelwa ka gobane dipono tšeo ke di bonego di ile tša ntšhoša.
16 Ka ya kgauswi le yo mongwe wa bao ba bego ba eme moo gore ke mmotšiše gore ge e le gabotse dilo tšeo di ra goreng. Ka gona o ile a nkaraba gomme a mpotša gore dilo tšeo di ra goreng.
17 A re: “‘Dibata tše tše dikgolo tše nne, ke dikgoši tše nne tšeo di tlago go tšwa lefaseng.
18 Eupša bakgethwa ba Modimo yo a Phagamego ba tla hwetša mmušo, e bile mmušo woo e tla ba wa bona go ya go ile le ka mo go sa felego.’
19 “Bjale ke be ke nyaka go tseba ka mo go oketšegilego ka sebata sa bone seo se bego se sa swane le dibata tše dingwe ka moka. Se be se tšhoša kudu, se na le meno a tšhipi le manala a koporo. Se be se gagoganya e bile se šilakanya. Tšeo di šetšego se be se di gatakela ka maoto a sona.
20 Se be se na le manaka a lesome hlogong ya sona. Lenaka le lengwe leo le ilego la tšwelela ge ale a mararo a mathomo a tumoga, le be le na le mahlo a go swana le a motho e bile le na le molomo wo o bolelago ka go ikgantšha. Le gona e be e le le legolo go feta a mangwe ka moka.
21 “Ka dula ke lebeletše ge lenaka leo le elwa le bakgethwa gomme le ba fenya,
22 go fihlela ge Yo a Bilego Gona go Tloga Kgale a etla gomme a ntšha kahlolo yeo e thekgago bakgethwa ba Modimo yo a Phagamego. Ke moka gwa fihla nako yeo e beilwego ya gore bakgethwa ba tšee mmušo gore e be wa bona.
23 “O ile a re: ‘Ge e le ka sebata sa bone, go tla ba le mmušo wa bone woo o tlago go tšwa lefaseng, o tla fapana le mebušo e mengwe ka moka. O tla gagoganya lefase ka moka, wa le gatakela, wa ba wa le šilaganya.
24 Manaka a lesome ke dikgoši tše lesome tšeo di tlago go tšwelela mmušong woo, gomme kgoši e nngwe ya tšwelela ka morago ga tšona. Le gona yona e tla fapana le dikgoši tše dingwe tša mathomo gomme e tla kokobetša dikgoši tše tharo.
25 Kgoši yeo e tla bolela gampe ka Modimo yo Godimodimo, gomme ya tšwela pele e hlakiša bakgethwa ba Modimo yo a Phagamego. E tla ikemišetša go fetoša dinako le molao, ya ba ya gafelwa bakgethwa ka nako, dinako le seripa sa nako.*
26 Eupša Moahlodi a dula,* gomme ba e tšeela nako ya go buša e le gore ba e fedišetše sa ruri.
27 “‘Ke moka mmušo, matla a go buša le bogolo bja mebušo ka moka yeo e lego ka tlase ga magodimo ka moka, tša newa batho bao e lego bakgethwa ba Modimo yo a Phagamego. Ba buša go ya go ile, e bile mebušo e mengwe ka moka e tla ba hlankela le go ba kwa.’
28 “Taba ye e felela mo. Nna Daniele ke ile ka tšhošwa kudu ke dilo tšeo ke bego ke di nagana, moo mmala wa sefahlego sa ka o ilego wa fetoga, eupša ke ile ka dula ke beile taba ye pelong ya ka.”
Mengwalo ya tlase
^ Goba, “Motala wa Mabaka.”
^ Phetolelo ya lentšu ka lentšu e re, “Kgoro ya dula.”
^ Ke gore, dinako tše tharo le seripa sa nako.
^ Phetolelo ya lentšu ka lentšu e re, “Kgoro ya dula.”
