Diema 11:1-31
11 Dikala tša bofora di šišimiša Jehofa,Eupša sekala seo se kalago gabotse se a mo kgahla.
2 Ge motho a ikgantšha o tla nyatšwa,Eupša motho yo a ikokobetšago o bontšha bohlale.
3 Batho bao ba botegago ba kwa Modimo ka dipelo tša bona ka moka gomme seo se ba thuša gore ba dire se se lokilego.Eupša boradia bja batho bao ba sa botegego bo tla dira gore ba fedišwe.
4 Letšatšing leo Modimo a galefilego, mahumo* a ka se hole motho ka selo,Eupša go dira seo se lokilego go tla mo phološa.
5 Batho bao ba dirago dilo tša go loka, dilo di ba sepelela gabotse,Eupša ba babe ba tla wišwa ke dilo tše mpe tšeo ba di dirago.
6 Moloki o tla phološwa ka gobane o dira dilo tšeo di lokilego,Eupša motho wa moradia o tla tanywa ke dilo tšeo a di ratago.
7 Ge motho yo mobe a ehwa, kholofelo ya gagwe e a hwelela,Gomme dilo ka moka tšeo a bego a holofetše gore o tla di dira ka matla a gagwe, le tšona di a hwelela.
8 Moloki o tla ntšhwa mathateng a gagweGomme mathata ao a wela motho yo mobe.
9 Dilo tšeo mohlanogi* a di dirago di gobatša wa gabo,Eupša baloki ba phološwa ke tsebo yeo ba nago le yona.
10 Dilo tše dibotse tšeo batho ba di dirago, di dira gore batho ba motse ba thabe.Le gona, ge batho ba babe ba ehwa, batho ba thaba kudu.
11 Motse e ba o bohlokwa ka gobane Modimo a šegofatša baloki,Eupša dilo tšeo motho yo mobe a di bolelago di a o phušola.
12 Motho wa setlaela o nyatša wa gabo,Eupša motho yo a nago le temogo o dula a ikhomoletše.
13 Motho yo a senyago batho maina o utolla diphiri,Eupša yo a tshepegago o boloka sephiri.
14 Batho ba a tlaišega ge ba sa hlahlwe ke motho yo bohlale,Eupša dilo di a atlega ge go na le baeletši ba bantšhi.
15 Motho yo mongwe le yo mongwe yo a tshepišago motho yo a sa mo tsebego gore o tlo mo patelela sekoloto, dilo di ka se mo sepelele gabotse.Eupša yo mongwe le yo mongwe yo a sa dirego tumelelano* e bjalo o phema mathata.
16 Mosadi wa mekgwa e mebotse o tla retwa,Eupša banna ba sehlogo ba amoga ba bangwe mahumo.
17 Ge motho a le botho* o a ikhola,Eupša motho yo sehlogo o ipakela mathata.
18 Motho yo mobe o hwetša meputso ya bofora,Eupša motho yo a dirago dilo tša go loka o hwetša moputso wa kgonthe.
19 Yo a ikemišeditšego go dira dilo tše dibotse o tla phela,Eupša yo a tlwaetšego go dira dilo tše mpe o tlo hwa.
20 Bao ba nago le dipelo tše mpe ba šišimiša JehofaEupša o thabišwa ke bao ba sa solegego.
21 Kgodišegang ka se: Motho yo mobe o tla otlwa,Eupša bana ba moloki ba tla phonyokga.
22 Mosadi yo mobotse yoo a hlokago tlhaologanyo,O swana le lengina la gauta leo le lego nkong ya kolobe.
23 Dilo tšeo baloki ba di kganyogago di feleletša ka dilo tše dibotse,Eupša dilo tšeo batho ba babe ba di holofetšego di dira gore Modimo a galefe.
24 Motho yo a ratago go fana, o feleletša a eba le dilo tše dintšhi,Eupša wa go timana o tla diila.
25 Motho wa go rata go fa o tla atlega,Gomme yo mongwe le yo mongwe yo a fago ba bangwe meetse a go nwa, le yena o tla fiwa meetse a go nwa.
26 Batho ba tla roga yoo a ganago go rekišetša batho ba bangwe mabele,Eupša ba šegofatša yo a a rekišago.
27 Motho yo a ratago go dira dilo tše dibotse o tla bontšhwa botho,Eupša yo a tsomago dilo tše mpe, ruri di tla mo tlela.
28 Yo a tshepilego mahumo a gagwe o tla tlaišega,Eupša moloki o tla atlega go swana le mohlare woo o hlogago matlakala.
29 Yo a bakelago lapa la gagwe mathata a ka se hwetše selo,Gomme lešilo le tla ba mohlanka wa motho yo bohlale.
30 Dilo tšeo moloki a di dirago di swana le mohlare wa bophelo,Eupša yo a thušago batho* ba bangwe go dira dilo tše dibotse o bohlale.
31 Ge e ba ka nnete moloki yo a lego mo lefaseng a hwetša dilo tšeo di mo swanetšego,Ruri motho yo mobe le yo a dirago sebe, le bona ba tla hwetša dilo tšeo di ba swanetšego le go feta.
Mengwalo ya tlase
^ Goba “dilo tše bohlokwa.”
^ Goba “motho yo a sa dumelego go Modimo.”
^ Phetolelo ya lentšu ka lentšu e re, “tumelelano ka go swarana ka matsogo.”
^ Goba, “motho yo a nago le lerato le le botegago.”
^ Goba, “meoya.” Bona Tlhaloso ya Mantšu.
