Diema 28:1-28
28 Batho ba babe ba a tšhaba le ge go se na yo a ba kitimišago,Eupša baloki ba na le sebete go swana le tau.
2 Ge nageng go tshelwa molao, baetapele ba hlatlamana ka bontšhi,Eupša moetapele o tla buša nako e telele ge e ba a thušwa ke motho yo a nago le temogo le tsebo.
3 Motho yo a diilago yo a radiago batho ba maemo a tlase,O swana le pula yeo e gogolago dibjalo ka moka.
4 Batho bao ba tlogelago molao ba hlompha motho yo mobe,Eupša bao ba kwago molao ba lwa le bao ba o tshelago.
5 Batho ba babe ba ka se kwešiše toka,Eupša bao ba tsomago Jehofa ba ka kwešiša dilo ka moka.
6 Modiidi yo a dirago dilo ka go tshepega,O kaone go phala mohumi yo a dirago dilo ka boradia.
7 Morwa yo a nago le kwešišo o latela molao,Eupša morwa yo a gweranago le dijagobe o hlabiša tatagwe dihlong.
8 Motho yo a oketšago mahumo a gagwe ka go adimiša batho tšhelete le ka go dira tswalo ka tsela e sa lokago,Mahumo a gagwe a tla fiwa yoo a kwelago badiidi bohloko.
9 Yo a sa nyakego go kwa molao,Le thapelo ya gagwe e a šišimiša.
10 Yo a arošetšago baloki tseleng e mpe, o tla tlaišwa ke dilo tše mpe tšeo a di dirilego,Eupša bao ba se nago molato ba tla hwetša dilo tše dibotse.
11 Mohumi o ipona a hlalefile,Eupša modiidi yo a nago le temogo o tla tseba gore ke motho wa mohuta mang.
12 Ge baloki ba atlega, go ba le lethabo le legolo,Eupša ge ba babe ba thoma go buša, batho ba a ikuta.
13 Yo a bipago melato ya gagwe a ka se atlege,Eupša yo a ipobolago yona gomme a e tlogela, o tla gaugelwa.
14 Go thaba motho yo a dulago a hlokometše dilo tšeo a di dirago,*Eupša yo a thatafatšago pelo ya gagwe, o tla wela kotsing.
15 Mmuši yo mobe yo a bušago batho bao ba sa kgonego go itwela,O swana le tau yeo e rorago le bere yeo e hlaselago.
16 Moetapele yo a se nago temogo o diriša matla a gagwe gampe,Eupša yo a hloilego go oketša mahumo a gagwe ka boradia, o tla phela nako e telele.
17 Motho yo a imelwago ke molato wa go bolaya motho yo mongwe, o tla dula a tšhaba go fihlela a eya lebitleng.
Anke go se be le yoo a mo thekgago.
18 Yo a sepelago ka go tshepega o tla phološwa,Eupša yo ditsela tša gagwe di kgopamego o tla welwa ke masetlapelo.
19 Yo a lemago tšhemo ya gagwe o tla ba le dijo tše dintšhi,Eupša yo a phegelelago dilo tša go hloka mohola o tla diila kudu.
20 Motho yo a tshepegago o tla šegofatšwa kudu,Eupša yo a phakišetšago go huma o tla ba le molato.
21 Go ba le kgethollo ga se gwa loka,Eupša motho a ka dira phošo e bjalo ge e ba a nyaka sa go ja.
22 Motho yo a nago le mona,* o lwela gore a hwetše mahumoA sa tsebe gore o tla welwa ke bodiidi.
23 Yo a kgalemelago motho yo mongwe, ka morago o tla hlomphiwa kuduGo feta yo a mo gegeago.
24 Yo a radiago tatagwe le mmagwe gomme a re: “Ga se phošo,”
Go no swana le ge a dirišana le motho yo a senyago.
25 Motho wa megabaru* o baka ditshele,Eupša yo a ithekgago ka Jehofa o tla atlega.
26 Yo a tshepago pelo ya gagwe ke setlaela,Eupša yo a dirago dilo ka bohlale, o tla phologa.
27 Yo a neago badiidi a ka se hloke selo,Eupša yo a itirago eka ga a ba bone, o tla rogwa kudu.
28 Ge batho ba babe ba thoma go buša, batho ba a ikutaEupša ge ba fedišwa, baloki ba a oketšega.
Mengwalo ya tlase
^ Goba, “yo a dulago a boifa.”
^ Goba, “wa megabaru.”
^ Goba mohlomongwe, “yo a ikgantšhago.”
