Diema 8:1-36
8 Bohlale bo dula bo goeletša,
Gomme temogo e dula e hlaboša lentšu la yona.
2 O tla kwa bohlale bo goeletša bo le mebotong,Bo le ditseleng le dikhoneng tša ditsela.
3 Bo goeletša bo le kgauswi le dikeiti tšeo di tsenago motseng,Moo go tsenwago gona.Bo goeletša ka lentšu la godimo bo re:
4 “Lena batho, ke a le bitša,Ke bolela le lena ka moka.
5 Lena bao le se nago tsebo e ntšhi, ithuteng go ba le temogo.Lena ditlaela, lekang ka thata gore le be le kwešišo.*
6 Theetšang, ka gobane dilo tšeo ke di bolelago di bohlokwa.Molomo wa ka o bolela dilo tša go loka.
7 Molomo wa ka o bolela nnete,E bile o hloile maaka.
8 Dilo ka moka tšeo ke di bolelago ke tša go loka.
Ga go na tšeo di raranego goba tšeo di kgopamego.
9 Ka moka ga tšona di kwešišega gabonolo go yoo a nago le temogo,E bile di lokile go yoo a nago le tsebo.
10 Amogelang tayo ya ka go e na le silifera,Gomme le amogele tsebo go e na le gauta e botse.
11 Ka gobane bohlale bo phala maswika a bohlokwa a ka lewatleng,E bile dilo tše dingwe ka moka tše bohlokwa di ka se bapišwe le bjona.
12 Ke nna bohlale, ke dula le temogo.Ke na le tsebo le bokgoni bja go nagana.
13 Ge e ba o boifa Jehofa, o tla hloya se sebe.
Ke hloile batho bao ba ikgodišago, bao ba ikgantšhago, bao ba dirago dilo tše mpe le bao ba bolelago maaka.
14 Ke na le keletšo e botse le bohlale.Kwešišo le matla ke tša ka.
15 Dikgoši di thušwa ke nna gore di kgone go buša,Gomme baetapele ba thušwa ke nna gore ba kgone go bea melao ya go loka.
16 Babuši ba thušwa ke nna gore ba dule ba buša,Gomme batho ba maemo a godimo ba thušwa ke nna gore ba ahlole ka go loka.
17 Ke rata bao ba nthatagoGomme bao ba nnyakago ba tla nkhwetša.
18 Ke humile e bile ke na le letago.Ke na le mahumo ao a sa felego e bile ke lokile.
19 Seo o se hwetšago go nna se phala gauta le gauta yeo e sekišitšwego.Le gona dimpho tšeo o di hwetšago go nna di phala silifera e botse.
20 Ke sepela tseleng ya go lokaE bile ke dula ke dira dilo tša toka.
21 Ke fa bao ba nthatago mahumo,E bile ke tlatša dintlo tša bona tšeo ba bolokelago dilo ka go tšona.
22 Jehofa o mpopile pele,Ke nna wa mathomothomo gare ga dilo tšeo a di dirilego kgalekgale.
23 O mphile boemo bjo bo hlomphegago go tloga kgalekgale,Go tloga mathomong, le pele lefase le ka ba gona.
24 Ke belegwe go sešo gwa ba le mawatle,Go sešo gwa ba le didiba tšeo di tletšego wa go falala.
25 Ke belegwe pele ga ge go ka ba le dithaba,E bile ke belegwe pele ga ge go ka ba le meboto,
26 Pele ga ge Modimo a ka bopa lefase le dinaga tša lona,Le pele ga ge go ka ba le lerole la mathomo lefaseng.
27 Ke be ke le gona ge a be a bopa magodimo,Le ge a be a dira mollwane magareng ga lefaufau le lewatle.
28 Ge a be a bea maru kua godimo,Ge a be a dira gore mawatle a be le meetse a mantšhi,
29 Ge a be a beela lewatle mellwaneYa gore meetse a lona a se tshele taelo ya gagwe,Ge a be a thea metheo ya lefase,
30 Ke be ke le kgauswi le yena ke le mošomi yo a nago le bokgoni.
Ke be ke mo thabiša letšatši le lengwe le le lengweE bile ke dula ke thabile pele ga gagwe ka mehla.
31 Ke be ke thabela lefase leo a le diretšego gore le dulwe ke batho,E bile ke be ke kgahlwa kudu ke batho.*
32 Bjale lena barwa ba ka, ntheetšeng.Go thaba bao ba kwago mantšu a ka.
33 Theetšang tayo le hlalefeGomme le se ke la e hlokomologa.
34 Go thaba motho yo a ntheetšago.Letšatši le lengwe le le lengwe o tla mejakong ya ntlo ya ka e sa le mesong,Gomme a leta kgauswi le mojako wa ntlo ya ka.
35 Ka gobane yo a nkhwetšago o tla hwetša bophelo,E bile Jehofa o a mo amogela.
36 Eupša yo a se nago taba le nna o a ikgobatša,Gomme bao ba ntlhoilego ba rata lehu.”
Mengwalo ya tlase
^ Goba, “le be le pelo e kwešišago.”
^ Phetolelo ya lentšu ka lentšu e re, “bana ba batho.”
